Banna le basali ba bona
1Le lōna basali, le ikokobeletse banna ba lōna, e le hore ha ho le teng ba bang ba banna ba lōna ba sa lumeleng lentsoe la Molimo, ba tle ba sokolohe ka baka la metsamao ea lōna feela, le ntse le ithōletse, 2ka ho hlokomela metsamao ea lōna e hloekileng, e hlomphehang. 3Mokhabo oa lōna e se ke ea e-ba o bonoang, joaloka meriri e lōhiloeng, mekhabiso ea khauta le liaparo tse ntlehali. 4Mokhabo oa lōna o sa senyeheng o tsoe botebong ba lipelo tsa lōna, e leng moea oa mosa le khutso, oo e leng ntho ea bohlokoa ho Molimo. 5Mehleng ea khale basali ba halalelang, ba neng ba tšepile Molimo, ba ne ba ikhabisa ka ho ikokobeletsa banna ba bona. 6Mohlala ke Sara ea neng a mamela Aborahama, 'me a 'mitsa “Mong'a ka”. Lōna le fetohile barali ba hae ka ho etsa tse ntle, le se na tšabo efe kapa efe.
7Le lōna banna, le phelisane le basali ba lōna, le ntse le tseba hore ba fokola ho le feta. Le ba hlomphe hobane le bona, hammoho le lōna, ke majalefa a bophelo boo Molimo a le neang bona. Etsang hona e le hore lithapelo tsa lōna li tle li se ke tsa sitisoa.
Ho hlōkōfaletsoa ho loka
8Ke qetella ka ho re lōna bohle le be pelonngoe, le utloelane bohlōkō, le ratane joaloka bana ba motho, le be mosa, le ikokobetse. 9Se busetseng bobe ka bobe, kapa tlhapa ka tlhapa, empa le hlohonolofatse, hobane Molimo o le bitselitse ho ja lefa la mahlohonolo, hobane ho thoe:
10“Ea ratang ho phela,
le ho bona matsatsi a thabo,
a tšoare leleme la hae
ho bua tse mpe,
le molomo oa hae
ho bua thetso.
11A furalle bobe, a etse botle,
a batle khotso, a e pheelle,
12hobane mahlo a Morena
a talima ba lokileng,
le litsebe tsa hae
li mamela thapelo tsa bona;
sefahleho sa hae se sosobane
se sosobanetse ba etsang bobe.”
13Haeba le thahasella 'nete, ke mang ea ka le etsang hampe? 14Empa haeba batho ba le hlōkōfaletsa ho loka ha lōna, le lehlohonolo. Le se ke la ba tšaba, 'me le se ke la ferekana, 15empa lipelong tsa lōna le hlomphe Kreste, eo e leng Morena. Kamehla le itokisetse ho ikarabella ho bohle ba le botsang tsa tšepo eo le nang le eona. 16Empa etsang hona ka mosa le ka hlompho, matsoalo a lōna a khutsitse, e le hore ba buang hampe ka metsamao ea lōna e metle, ea Bokreste, ba tle ba hlajoe ke lihlong ke liketseletso tseo tsa bona. 17Ho molemo ho hlōkōfaletsoa ho etsa tse ntle, haeba e le thato ea Molimo, ho e-na le ho hlōkōfaletsoa ho etsa tse mpe. 18Kreste le eena o shoetse libe tsa lōna hanngoe, ea lokileng a shoela ba sa lokang, e le hore a tle a le tlise ho Molimo. O ile a bolaoa ka nqeng ea 'mele, empa a khutlisetsoa bophelong ka Moea; 19a ba a ea phatlalletsa meea e chankaneng molaetsa o molemo. 20Ke meea e neng e sa ka ea mamela Molimo, ha eena a ne a e mameletse halelele mehleng eo Nōoe a neng a haha areka ka eona. Ka areka, ba seng bakae feela, e leng ba robeli, ba ile ba pholosoa metsing. 21Metsi ana ke setšoantšo sa kolobetso e re pholosang joale. Kolobetso hase ho hlatsuoa litšila tsa 'mele, empa ke ho itlama ho Molimo ka letsoalo le khutsitseng. E le pholosa ka tsoho ea Jesu Kreste, 22ea nyolohetseng leholimong, ea leng ka letsohong le letona la Molimo, 'me ea busang mangeloi, le bookameli bohle, le matla 'ohle.
