Ho shoa ha Samuele
1Samuele a shoa. Baiseraele bohle ba phutheha, ba mo llela, ba mo epela motseng oa habo oa Rama. Kamor'a moo Davida a tsamaea, a theohela lehoatateng la Parane.
Litaba tsa Nabele le Abikaele
2Ho ne ho e-na le monna e mong Maone, eo motebo oa hae o neng o le Karamele. Monna eo o ne a ruile haholo, a e-na le linku tse likete tse tharo, le lipōli tse sekete. O ne a le teng Karamele, ha ho ntse ho kutoa linku tsa hae. 3Lebitso la monna eo e ne e le Nabale, la mosali oa hae e le Abikaele. Mosali eo o ne a le bohlale, a bile a le motle, empa monna oa hae o ne a le lekhōnatha, le liketso tsa hae li le mpe. E ne e le oa ntlo ea Kalebe.
4Ha Davida a le lehoatateng, a utloa hore Nabale o ntse a kuta linku tsa hae. 5Eaba Davida o rōma bahlankana ba leshome, 'me a re ho bahlankana bao: “Nyolohelang Karamele, le ee ho Nabale, le ntumelisetse eena. 6Le tle le re ho eena: ‘Helele! Khotso e be le uena, khotso e be le ba ntlo ea hao, 'me khotso e be le tsohle tseo u nang le tsona!
7“ ‘Ke utloile hore u na le bakuti; joale balisa bao, bao u nang le bona, re ne re èmèla le bona. Ha rea ka ba etsa hampe, ebile le ka nako eohle, ha ba ntse ba le Karamele, ha baa ka ba utsoetsoa letho. 8Botsa bahlankana bao ba hao, 'me ba tla u bolella. Ka baka lena, ak'u hauhele bahlankana bana, hobane re tlile ka letsatsi la mokete. Kea u rapela: Ak'u ba fe eng kapa eng eo u nang le eona, u be u fe le mora oa hao Davida.’ ”
9Bahlankana ba Davida ba fela ba fihla, ba bua le Nabale ba le lebitsong la Davida, ba 'molella tsohle tseo a li buileng, eaba baa khutsa.
10Nabale a araba bahlanka ba Davida, a re: “Davida ke mang? Mora oa Jese eena ke mang? Mehleng ena ho na le bahlanka ba bangata, ba thobelang beng ba bona. 11Joale le re ke nke bohobe ba ka, le metsi a ka, le nama ea ka, eo ke e hlabetseng bakuti ba ka, ke li nee batho bao ke sa tsebeng le moo ba tsoang teng?”
12Eaba bahlankana ba Davida ba khutlela hae, ba fihla ba 'molella tsohle tseo Nabale a li buileng. 13Davida a re ho banna ba hae: “Hlomelang ka lisabole tsa lōna!” Eaba monna ka mong o hlomela ka sabole ea hae; Davida le eena a hlomela ka sabole ea hae. Banna ba makholo a mane ba nyoloha ba latetse Davida; ba makholo a mabeli bona ba sala ba lebetse thōtō.
14Empa e mong oa bahlankana a bolella Abikaele, mohats'a Nabale, a re: “Hela! Davida o ne a rōmme maqosa a tsoang lehoatateng, ho tlisa litumeliso ho mong'a rōna, empa mong'a rōna a a khōbōla. 15Banna bao ba ne ba le molemo haholo ho rōna, 'me ha baa ka ba re etsa hampe; esita le ka nako eohle ha re ntse re èmèla le bona, ha ho letho leo re kileng ra le utsoetsoa. 16Ka nako eohle ha re ntse re èmèle le bona, ba ne ba re sireletsa motšeare le bosiu. 17Ka baka leo, imamelle hore na u tla etsa joang, hobane mong'a rōna, le bohle ba lelapa la hae, ba reretsoe bobe. Mong'a rōna ke motho ea khopo hoo ho seng motho eo a ka mo mamelang.”
18Eaba Abikaele oa potlaka, o nka linkhoa tse makholo a mabeli, le makuka a mabeli a veine, le nama e phehiloeng ea linku tse hlano, le likilo tse leshome le metso e supileng tsa koro e halikiloeng, le masihla a lekholo a morara oa mangangajane, le maqebekoane a makholo a mabeli a mangangajane a feiee, o li bofa litonking. 19A re ho bahlanka ba hae: “Tsoelang pele, 'na ke tla le sala morao.” Empa a se ke a bolella Nabale, monna oa hae.
20Ha a ntse a palame tonki, a theosa khohlo ea thaba, a bona Davida le banna ba hae ba theohela ho eena, 'me a kopana le bona. 21Davida o ne a qeta ho re: “Ruri ke sebelelitse ntat'a selala ka ho baballa tsohle tseo monna enoa a neng a e-na le tsona koana lehoatateng, hoo a sa kang a lahleheloa ke letho la tsohle tsa maruo a hae. Joale o mputsitse ka bobe. 22Haeba letsatsi le ka chaba ke siile monna leha a le mong oa banna bohle ba hae, Molimo a nkotle joaloka lira tsa Davida, le ho feta.”
23Eitse ha Abikaele a bona Davida, a potlaka, a thōlōha tonki ea hae, a itihela kapele ho Davida ka sefahleho, a isa hlompho ho eena. 24A itihela maotong a Davida, a re: “Mong'a ka, molato ona e mpe e be oa ka. Kea u rapela: E-re lekhabunyane la hao le ke le bue le uena, 'me u ke u le mamele. 25Kea a rapela, mong'a ka, u se ke ua tsotella Nabale eno ea khopo, hobane bitso-lebe ke seromo. Lebitso la hae ke Nabale, 'me le eena a khopo. Empa 'na, lekhabunyane la hao, ha kea ka ka bona bahlankana bao mong'a ka a neng a ba rōmme.
26“Joale he, mong'a ka, Morena o u thibetse ho tšolla mali, le ho hlatsa bohale ba hao, ka ho iphetetsa ka letsoho la hao. Ka baka leo, ke hlapanya ka Molimo ea phelang, le ka uena, hore lira tsa hao, le ba u lakaletsang bobe, ba tla ba joaloka Nabale. 27Joale mpho ena, eo lekhabunyane la hao le u tliselitseng eona, e ke e neoe bahlankana ba tsamaeang le uena, mong'a ka. 28Kea u rapela: Ak'u tšoarele lekhabunyane la hao litšito tsa lona, hobane ruri Morena o tla hlomamisa lelapa la hao le tiee, ka baka la lintoa tsa Morena tseo u mo loanetseng tsona. Ka matsatsi 'ohle a ho phela ha hao e se eka u ke ke ua hlaheloa ke bobe. 29Ha motho a u sokela, a batla ho u bolaea, bophelo ba hao bo tla sireletsoa ke Morena Molimo oa hao. Empa bophelo ba lira tsa hao bo tla lahleloa hōle, joalokaha eka bo betsoa ka letjeketjane. 30Ha Morena a se a phethile tsohle tse molemo, tseo a u tšepisitseng tsona, a se a bile a u entse 'musi oa Iseraele, 31u ke ke ua itšoabela, kapa ua tšoenyeha pelong, ka hore u ile ua tšolla mali ntle ho lebaka, kapa ua iphetetsa ka bouena. Ha Morena a se a u atlehisitse, u tle u mpe u hopole lekhabunyane la hao.”
32Davida a re ho Abikaele: “Ho bokoe Morena Molimo oa Iseraele, ea ileng a u rōmela ho 'na letsatsing lena. 33Ho bokoe keletso ea hao, le uena u bokoe ka ho nthibela tsatsing lena hore ke se ke ka tšolla mali, le hore ke se ke ka iphetetsa ka letsoho la ka. 34Ke hlapanya ka Morena Molimo oa Iseraele ea phelang, ea nthibetseng hore ke se ke ka u ntša kotsi, hore hoja ua se ke ua potlaka ua nkhahlanyetsa, ruri e ne etlare pele le chaba ho be ho se na monna le ea mong oa ba Nabale ea ntseng a phela.”
35Davida a amohela tseo Abikaele a neng a mo tliselitse tsona, a re ho eena: “Khutlela ha hao ka khotso; bona, ke mametse lipolelo tsa hao, 'me ke amohetse kōpo ea hao.”
Lefu la Nabale
36Ha Abikaele a fihla ho Nabale, a fumana ho nooa, e le mokete o kang oa khosi. Nabale o ne a nyakaletse, hobane o ne a tahiloe haholo. Ka baka leo, Abikaele a se ke a 'molella letho ho fihlela ka le hlahlamang. 37Ka le hlahlamang, ha Nabale a hlaphohetsoe, mosali oa hae a mo phetela tsohle. Nabale a taboha letsoalo, a ea le mailiili. 38Kamora' matsatsi a leshome, Morena a otla Nabale, 'me Nabale a shoa.
39Ha Davida a utloa hore Nabale o shoele, a re: “A ho bokoe Morena, ea phetelitseng tlhapa eo Nabale a ntlhapaotseng ka eona, ea ileng a thibela mohlanka oa hae hore a se ke a etsa bobe, ea entseng le hore Nabale a jeoe ke bokhopo ba hae.”
Eaba Davida o bua le Abikaele ka tsa ho mo nyala.
Davida o nyala Abikaele
40Bahlanka ba Davida ba fihla ho Abikaele a le Karamele, ba re ho eena; “Davida o re rōmetse ho uena, hore re tl'o u lata, u e'o ba mosali oa hae.”
41Abikaele a ema, a sheba fatše, a re: “Bonang, 'na ke lekhabunyane la hae, 'me nka hlatsoa le maoto a bahlanka ba hae.” 42Abikaele a ema ka potlako, a palama tonki, makhabunyane a hae a mahlano a tsamaea le eena; eaba ba latela barōmuoa ba Davida, 'me Abikaele ea e-ba mosali oa Davida. 43Davida a nka le Ahinoame oa Jesereele, bobeli ba bona ea e-ba basali ba hae. 44Saule o ne a ile a nka morali oa hae Mikale, mohats'a Davida, a mo nea Paleti, mora oa Laishe, ea neng a ahile Galeme.
