Morena o bitsa Samuele
1Moshanyana, Samuele, a 'na a sebeletsa Morena tlas'a bookameli ba Eli. Mehleng eo lentsoe la Morena le ne le utluoa seoelo, le lipono li sa ata.
2Ka tsatsi le leng Eli o ne a robetse moo a neng a robala teng. Mahlo a hae a ne a se a qala ho foufala, hoo a neng a se a sa bone hantle. 3Lebone la Molimo le ne le e-s'o ka le tima, Samuele eena a robetse ka Tempeleng ea Morena, moo areka ea Molimo e neng e le hona teng. 4Morena a bitsa Samuele, 'me Samuele a re: “Ke 'na enoa!”
5Samuele a mathela ho Eli, a re: “Ke 'na enoa; u mpitsitse!”
Eli a re: “Ha kea u bitsa; tsamaea u e'o robala.” Eaba oa tsamaea, o il'o robala.
6Morena a boela a bitsa Samuele. Samuele a ema, a ea ho Eli, a re: “Ke 'na enoa; u mpitsitse!”
Eli a araba, a re: “Ha kea u bitsa, ngoan'aka; tsamaea u e'o robala hape.”
7Samuele o ne a e-s'o ka a tseba Morena; le lentsoe la Morena o ne a e-s'o ka a le senoleloa.
8Morena a bitsa Samuele khetlo la boraro. Eaba oa tsoha, o ea ho Eli, o re: “Ke 'na enoa; u mpitsitse!”
Eli a elelloa hore ke Morena ea bitsang moshanyana. 9Ka baka leo, Eli a re ho Samuele: “Tsamaea u e'o robala. Haeba a ka u bitsa hape, u tle u re: ‘Bua Morena, hobane mohlanka oa hao o mametse.’ ” Samuele a tsamaea, a fihla a robala moo a neng a ntse a robetse teng.
10Morena a tla, a fihla a ema pel'a hae, 'me a 'mitsa joalokaha a ile a 'mitsa ka makhetlo a pele: “Samuele! Samuele!”
Eaba Samuele o re: “Bua Morena, hobane mohlanka oa hao o mametse.”
11Morena a re ho Samuele: “Bona mona, ho na le ntho eo ke tla e etsa naheng ena ea Iseraele, hoo litsebe tsa e mong le e mong ea tla e utloa li tla lla mangenengene. 12Ka letsatsi leo, ke tla etsetsa Eli tsohle tseo ke li buileng malebana le ntlo ea hao, ho tloha qalong ho isa qetellong. 13Ke 'moleletse hore kahlōlo ea ntlo ea hae e tla ba ea mehla eohle, ka baka la bokhopo ba eona, hobane o tsebile hore bana ba hae ba itliselitse thōhako, empa ha aa ka a ba khalemela. 14Ka baka leo, ke hlapanyelitse ntlo ea Eli hore bokhopo ba ntlo ena ea hae bo ke ke ba lefelloa ka sehlabelo kapa ka nyehelo kamehla eohle.”
15Samuele a robala ho fihlela hoseng; eaba o bula mamati a ntlo ea Morena. Empa Samuele a tšaba ho bolella Eli pono eo. 16Eaba Eli o botsa Samuele, o re: “Samuele, ngoan'aka!”
Samuele a re: “Ke 'na enoa.”
17Eli a re: “Morena o itse'ng ho uena? Kea u rapela: U se ke ua mpatela. Haeba u ka mpatela lentsoe lefe kapa lefe la mantsoe 'ohle ao u a boleletsoeng, Molimo a u etse joalo, le ho feta moo.” 18Samuele a 'molella tsohle, a se ke a mo patela letho. Eli a re: “Eo he, ke Morena. Ha a ke a etse seo a bonang se lokile mahlong a hae.”
Samuele o tsejoa e le moporofeta
19Samuele a 'na a hōla, Morena a 'na a ba le eena, 'me Morena a phethahatsa mantsoe 'ohle a hae. 20Ho tloha Dane ho ea fihla Beeresheba, Baiseraele bohle ba tseba hore Samuele o beiloe hore e be moporofeta oa Morena. 21Morena a boela a iponahatsa Shilo, hobane Morena o ne a ile a iponahatsa Shilo, ho Samuele, ka lentsoe la Morena.
