Sechaba se kōpa ho ba le khosi
1Ha Samuele a se a tsofetse, a bea bara ba hae hore e be baahlōli ba Baiseraele. 2Lebitso la mora oa hae oa matsibolo e ne e le Joele, lebitso la mora oa hae oa bobeli e le Abiea. E ne e le baahlōli ba Beeresheba. 3Bara ba hae ba se ke ba latela mehlala ea hae, ba kheloha, ba batla maruo ka bolotsana; ba amohela tjotjo, ba sokamisa toka.
4Joale baholo bohle ba Baiseraele ba bōkana, ba tla ho Samuele a le Rama. 5Ba re ho eena: “Bona, u tsofetse, 'me bara ba hao ha ba latele mehlala ea hao. Joale he, re khethele khosi e tla re busa joaloka lichaba tsohle.”
Molimo o ananela kōpo ea sechaba
6Empa ntho ena ea se ke ea thabisa Samuele, ha ba re: “Re nee khosi e tla re busa.” Eaba Samuele o rapela Morena. 7Morena a re ho Samuele: “U mamele tsohle tseo sechaba se li buang ho uena, hobane hase uena eo se mo lahlang; se mpa se lahla 'na, hore ke se ke ka se busa. 8Ho ea ka liketso tsohle tsa sona, tseo se li entseng ho tloha mohla ke se ntšang Egepeta, ho fihlela kajeno, se ntahlile, sa sebeletsa melimo e meng; joale le uena se u etsa joalo. 9Ka baka leo, mamela tseo se li buang. Empa u se eletse u se u tiile, e sa le pele, u se bolelle mokhoa oo khosi e tla se busa ka oona.”
Mokhoa oo khosi e tla busa ka oona
10Samuele a phetela sechaba se mo kōpileng khosi mantsoe 'ohle a Morena. 11A re ho sona: “Ona e tla ba mokhoa oo khosi e tla le busa ka oona: Khosi e tla nka bara ba lōna, e ba khethele ho ba bahlabani ba eona ba likariki tsa ntoa le ba lipere, 'me ba tla matha kapele ho likariki tsa eona tsa ntoa. 12E tla ikhethela bona hore e be balaoli ba ba likete, le balaoli ba ba mashome a mahlano; le ho lema masimo a eona, le ho a kotula; le ho e etsetsa lihlomo tsa ntoa, le lihlomo tsa likariki tsa eona tsa ntoa. 13E tla nka barali ba lōna hore ba e etsetse sente e monko o monate, ba e phehele, ba e bakele bohobe. 14E tla nka masimo a lōna a matle ka ho fetisisa a morara, le a mohloaare, e a nee bahlanka ba eona. 15E tla nka karolo e le 'ngoe ho tse leshome tsa koro ea lōna le tsa morara oa lōna, e e nee balaoli ba eona le bahlanka ba eona. 16E tla nka bahlanka ba lōna, le makhabunyane a lōna, le litonki tsa lōna tse ntle ka ho fetisisa, 'me tsena tsohle e li sebelise. 17Khosi e tla nka karolo e le 'ngoe ho tse leshome tsa mehlape ea lōna ea likhutšoane, 'me lōna le tla ba bahlanka ba eona. 18Mohl'a letsatsi leo le fihlang, le tla ipelaetsa haholo ka baka la khosi ea lōna, eo le e khethileng, empa mohl'a letsatsi leo Morena ha a na ho le araba.”
19Sechaba sa hana ho mamela lentsoe la Samuele, sa re: “Che, re batla ho ba le khosi e re busang, 20e le hore le rōna re be joaloka lichaba tsohle, khosi ea rōna e re buse, e re etelle pele, e re loanele lintoeng tsa rōna.”
21Samuele a mamela lipuo tsohle tsa sechaba, 'me a li bolella Morena. 22Morena a re ho Samuele: “Mamela lipolelo tsa sona, u se khethele khosi.”
Samuele a re ho banna ba Iseraele: “Monna e mong le e mong a tsamaee, a khutlele motseng oa habo.”
