Puso ea Amasiea, khosi ea Juda
1Amasiea o ne a e-na le lilemo tse mashome a mabeli a metso e mehlano ha a qala ho busa. A busa ka lilemo tse mashome a mabeli a metso e robong, a le Jerusalema. Lebitso la 'm'ae e ne e le Jehōoadane, eo hahabo e neng e le Jerusalema. 2Amasiea a khahlisa Morena, feela e seng ka pelo ea hae eohle.
3Eare ha a se a tsitsitse bokhosing ba hae, a bolaea bahlanka ba hae, ba neng ba bolaee khosi, e leng ntat'ae. 4Empa a se ke a bolaea bana ba babolai bao, a mpa a etsa joalokaha ho ngotsoe Bukeng ea Molao oa Moshe, moo Morena a laetseng, a re: “Bo-ntat'a bana ha ba ka ke ba bolaoa ka baka la bana ba bona, le bana ha ba ka ke ba bolaoa ka baka la bo-ntat'a bona, empa motho ka mong o tla bolaeloa sebe sa hae.”
Amasiea o futuhela Edomo
5Amasiea a khōbōkanya sechaba sa Juda kaofela. Har'a ba morabe oohle oa Juda, le oa Benjamine, a khetha balaoli ba bahlabani ba likete, le balaoli ba ba makholo, ho ea ka malapa a bo-ntat'a bona. A ba bala ho tloha ka ba lilemo tse mashome a mabeli ho ea holimo, 'me kaofela ea e-ba mokhetho oa bahlabani ba likete tse makholo a mararo, e le banna ba ka eang ntoeng, ba ka loanang ka thèbè le lerumo. 6Le naheng ea Iseraele a hira bahlabani ba likete tse lekholo ka silefera e ka etsang boima ba likilo tse likete tse tharo le makholo a mane.
7Empa moporofeta oa Molimo a fihla ho Amasiea, a re: “Oho hle, khosi, lebōtho la Iseraele le se ke la ea ntoeng le uena, hobane Morena ha a eo har'a bana ba Iseraele, ha a eo le har'a bohle ba morabe oa Efraime. 8Haeba u rata ho futuha, futuha, u imatlafaletse ntoa. Molimo o tla etsa hore sera sa hao se u hlōle, hobane Molimo o na le matla a ho thusetsa, le matla a hore motho a hlōloe.”
9Eaba Amasiea o re ho moporofeta oa Molimo: “Joale re tla etsa joang ka silefera e etsang boima ba likilo tse likete tse tharo le makholo a mane, eo re seng re lefile lebōtho la Iseraele ka eona?”
Moporofeta oa Molimo a araba, a re: “Morena a ka u nea e ngata ho feta ena.”
10Amasiea a hloaea lebōtho la ba morabe oa Efraime le neng le tlile ho eena, a le khutlisetsa hae. Ka baka leo, bao ba halefela sechaba sa Juda haholo, 'me ba khutlela mahahabo bona ba halefile haholo.
11Amasiea a imatlafatsa, 'me a etella bahlabani ba hae pele ho ea fihla Khohlong ea Letsoai, moo a ileng a bolaela bahlabani ba Seire ba likete tse leshome hona teng. 12Sechaba sa Juda sa thōpa ba likete tse leshome, sa ba hloesetsa holim'a lefika, sa ba lihela, 'me bao ba suhlamana.
13Empa ha e le bahlabani ba lebōtho leo Amasiea a ileng a le khutlisetsa hae, hore le se ke la ea le eena ntoeng, ba futuhela metse ea Juda, ho tloha Samaria ho ea fihla Bete-Horone, 'me teng ba bolaea batho ba likete tse tharo, ba nka khapo e ngata.
14Ha Amasiea a khutla ho tsoa timetsa Baedomo, a tla le melimo ea bana ba Seire, a e etsa melimo ea hae, a e khumamela, 'me a e chesetsa mokubetso. 15Ka baka leo, khalefo ea Morena ea tlōkōmela Amasiea, 'me Morena a rōma moporofeta ho eena, ea ileng a fihla a re: “Ke ka baka la'ng ha u batlile thuso ea melimo ea balichaba, e sitiloeng ho namolela beng ba eona matsohong a hao?”
16Eare ha moporofeta a ntse a bua le Amasiea, khosi Amasiea a re ho eena: “Ke ho tloha neng re u khethileng ho ba moeletsi oa khosi? Khutsa, esere ka u bolaea!”
Eaba moporofeta oa khutsa, a nt'o re: “Kea tseba hore Molimo o rerile ho u timetsa, hobane u entse hona, 'me ha ua ka ua mamela keletso ea ka.”
Sechaba sa Juda se futuhela Iseraele
17Hoba khosi Amasiea a eletsoe ke banna ba hae, a rōmela molaetsa ho Jehōoashe, mora oa Jehōoakase, setlōhōlō sa Jehu, khosi ea Iseraele, a re: “Tloo, re tl'o lebanya lithèbè!”
18Eaba Jehōoashe, khosi ea Iseraele, o rōmela maqosa ho Amasiea, khosi ea Juda, o re: “Hlabahlabane ea Lebanone e kile ea rōmela molaetsa ho kedare ea Lebanone, ea re: ‘Nea mora oa ka morali oa hao, a mo nyale!’ Eaba ho feta sebata sa Lebanone, se fihla se hatakela hlabahlabane eo. 19U re u hlōtse Baedomo, 'me u se u le makōkōnyana. Itulele ha hao mono! U ratel'ang ho ikenya tsietsing e tla u timetsa, e be e timetse le sechaba sa Juda?”
20Empa Amasiea a se ke a mo mamela, hobane hona ho ne ho entsoe ke Molimo, hore a tle a neelane ka bona matsohong a lira tsa bona, kaha ba ile ba batla thuso ea melimo ea Edomo. 21Ka baka leo, Jehōoashe, khosi ea Iseraele, a nyoloha, 'me eena le Amasiea, khosi ea Juda, ba lebanya lithèbè ba le Bete-Shemeshe e naheng ea Juda. 22Baiseraele ba imela sechaba sa Juda, 'me sa baleha, e mong le a mong a balehela lapeng ha hae. 23Moo Bete-Shemeshe, Jehōoashe, khosi ea Iseraele, a thōpa Amasiea, khosi ea Juda, setlōhōlō sa Jehōoakase, mora oa Jōoashe. A mo isa Jerusalema, a fihla a heletsa lerako la Jerusalema, ho tloha Khorong ea Efraime, ho ea fihla Khorong e Hukung. E ne e le sebaka se ka bang limethara tse makholo a mabeli. 24A hahara khauta eohle le silefera, le thepa eohle e neng e le ka Tempeleng ea Molimo, e neng e hlokomeloa ke Obede-Edomo, le e neng e le ka letlōleng le ka tlung ea khosi. A thōpa le batho, eaba o khutlela Samaria.
25Amasiea, mora oa Jōoashe, khosi ea Juda, a phela ka lilemo tse leshome le metso e mehlano kamorao ho lefu la Jehōoashe, mora oa Jehōoakase, khosi ea Iseraele.
26Liketso tse ling tsa Amasiea, ho tloha qalong ho isa qetellong, li ngotsoe Bukeng ea Likhosi tsa Juda le tsa Iseraele.
27Kamora' hoba Amasiea a furalle Morena, ba mo kunuta a le Jerusalema, eaba o balehela Lakishe, empa ba mo salisa bahlabani morao ho ea fihla Lakishe, mo o ba ileng ba 'molaela hona teng. 28Ba bofa setōpō sa hae pereng, ba mo epela le bo-ntat'ae, Motseng oa Davida.
