Baasiria ba sokela baahi ba Jerusalema
1Kamora' tsohle tseo Hesekiea a ileng a li etsa ka botšepehi, Saneheribe, khosi ea Asiria, a fihla, a futuhela naha ea Juda. A etsetsa metse e hahelelitsoeng ea Juda thibella, a hopotse ho ikhapela eona. 2Ha Hesekiea a bona hore Saneheribe o se a le teng, 'me o morerong oa ho futuhela Jerusalema, 3a eletsana le mahosana le bahale ba hae, hore ho katoe liliba tse neng li le kathōko ho motse, 'me ba mo thusa. 4Sechaba se sengata sa khōbōkana, sa kata liliba tsohle, sa thiba le metsi a nōkana e neng e haola har'a naha eo, 'me sa re: “Ha likhosi tsa Asiria li fihla li se ke tsa fumana metsi.”
5Khosi Hesekiea a tsoha molota, a tsosa lerako hohle moo le neng le helehile teng. Holim'a lona a haha litora, a haha le lerako le leng kathōko ho leo. A matlafatsa le Milo, e Motseng oa Davida. A etsa marumo a mangata le lithèbè tse ngata. 6A bea balaoli ba ntoa ho okamela sechaba sohle. A ba khōbōkanyetsa ho eena, lebaleng le pel'a khoro ea motse, a ba khothatsa, a re: 7“E-bang matla, le tsohe molota, le se ke la tšaba kapa la nyahamisoa lipelo ke khosi ea Asiria, kapa ke letšoelehali leo a nang le lona, hobane ea re thusang o matla ho feta ea mo thusang. 8Eena o tšepile matla a hae, athe rōna, Molimo o na le rōna, o tla re thusa, a re loanele.” Mantsoe a Hesekiea, khosi ea Juda, a tsosa sechaba molōta.
9Kamora' tsena, ha Saneheribe, khosi ea Asiria, a ntse a etselitse Lakishe thibella ka mabōtho 'ohle a hae, a rōmela bahlanka ba hae Jerusalema ho Hesekiea, khosi ea Juda, le ho sechaba sohle sa Juda se neng se le Jerusalema, a re: 10“Saneheribe, khosi ea Asiria, o bua tjena: ‘Le tšepile'ng, ha e le moo re le etselitse thibella Jerusalema? 11Na ha le bone hore Hesekiea oa le thetsa, hore le tle le bolaoe ke tlala le lenyora, ha a ntse a re: “Morena Molimo oa rōna, o tla re namolela matsohong a khosi ea Asiria?” 12Na hase eena Hesekiea ea felisitseng libaka tsa Molimo tsa borapeli, le lialetare tsa hae, 'me a ba a laela sechaba sa Juda, le baahi ba Jerusalema, a re: “Le rapelle kapele ho aletare e le 'ngoe, 'me le chesetse mokubetso holim'a eona?”
13“ ‘Na ha le tsebe seo 'na le bo-ntate re ileng ra se etsa ho lichaba tsohle tsa linaha tse ling? Na melimo ea lichaba tseo e ile ea tseba ho li namolela matsohong a ka? 14Ke molimo ofe, har'a melimo eohle ea lichaba tseo, tseo bo-ntate ba ileng ba li timetsa, o kileng oa tseba ho pholosa sechaba sa oona matsohong a ka? Joale lōna, Molimo oa lōna a ka le pholosa joang matsohong a ka? 15Bonang mona, Hesekiea a se ke a 'na a le thetsa, a 'na a le khelosa ka mokhoa o tjena. Le se ke la mo mamela, hobane ha ho molimo oa sechaba sefe kapa sefe, leha e le oa 'muso ofe kapa ofe, o kileng oa pholosa batho ba oona matsohong a ka, le matsohong a bo-ntate. Le lōna, Molimo eo oa lōna a ke ke a le pholosa matsohong a ka!’ ”
16Bahlanka ba Saneheribe ba 'na ba tsoela pele ho nyefola Morena Molimo, le ho nyefola Hesekiea, mohlanka oa hae. 17Mangolong ao Saneheribe a neng a a ngotse, o ne a nyefotse Morena Molimo oa Iseraele, a mo hanyelitse, a itse: “Joalokaha melimo ea lichaba tsa linaha tse ling e sa ka ea namolela lichaba tseo tsa eona matsohong a ka, le Molimo oa Hesekiea o ke ke oa namolela sechaba sa hae matsohong a ka.” 18Sechaba sa Jerusalema, se neng se le holim'a lerako, ba se hōoeletsa haholo ka puo ea Seheberu ho se tšosa le ho se kenya letsoalo, e le hore ba tle ba tsebe ho hapa motse. 19Ba nyefola Molimo oa Jerusalema, joalokaha eka ba nyefola melimo ea lichaba tsa linaha tse ling, e leng e entsoeng ka matsoho a batho.
Saneheribe oa hlōloa
20Ka baka la taba ena, khosi Hesekiea le moporofeta Esaea, mora oa Amose, ba rapela, 'me ba ipeletsa ho Molimo. 21Morena a rōmela lengeloi, le ileng la ea liahelong tsa khosi ea Asiria, la bolaea bahale bohle, le baetapele, le balaoli. Saneheribe a khutlela naheng ea hae ka lihlong. Eare ha a kena ka tempeleng ea molimo oa hae, bara ba tsoetsoeng ke eena ba fihla ba 'molaea ka sabole.
22Ka mokhoa o tjena Morena a namolela Hesekiea le baahi ba Jerusalema matsohong a Saneheribe, khosi ea Asiria, le matsohong a bohle ba bang, 'me khotso ea e-ba teng kahohle. 23Batho ba bangata ba tlisetsa Morena limpho Jerusalema; ba tlisetsa le Hesekiea khosi ea Juda limpho tsa bohlokoa. Ho tloha mohlang oo, Hesekiea a tlōtleha mahlong a lichaba tsohle.
Ho kula ha Hesekiea le boikhōhōmōso ba hae
24Mehleng eo Hesekiea a kulela lefu, 'me a rapela Morena. Morena a mo araba, a mo etsetsa mohlolo. 25Empa Hesekiea a se ke a leboha seo a se etselitsoeng, hobane o ne a ikhōhōmōsa. Ka baka lena, khalefo ea Molimo ea tlōkōmela eena le sechaba sa Juda, le baahi ba Jerusalema. 26Le hoja Hesekiea a ne a ikhōhōmōsa joalo, o ile a ikokobetsa, eena le baahi ba Jerusalema. Ka baka lena, mehleng ea Hesekiea Molimo a se ke a ba halefela.
Matlotlo a Hesekiea le tlōtla ea hae
27Hesekiea o ne a ruile haholo, 'me a tlōtleha haholo. A haha matlo ao ka ho 'ona ho bolokoang silefera, le khauta, le mahakoe a bohlokoa, le linōko, le lithèbè, le lintho tsohle tseo motho a ka lakatsang ho ba le tsona. 28A haha le matlo ao ho bōlōkoang lijo ho 'ona, ha chai e le ngata, le ao ho bōlokoang veine e ncha ho 'ona, le ole; a haha le masaka a mefuta eohle ea liphoofolo, le masaka a mehlape ea likhutšoane. 29A ikhahela metse, a ba le mehlape a mengata ea likhutšoane le ea likhomo, hobane Molimo o ne a mo file maruo a mangata.
30Hesekiea a khelosa metsi a tsoang mohloling oa Gihone kaholimo, a a lebisa tlase, ka bophirimela ho Motse oa Davida, 'me a atleha mesebetsing ea hae eohle.
31Empa ha ho fihla maqosa a babusi ba Babilona, a neng a rōmiloe ho Hesekiea, ho tla batlisisa tsa mohlolo o ileng oa etsahala naheng ea hae, Molimo o ile a mo tlohela, a 'mea tekong, hore a tle a tsebe sohle se ka pelong ea hae.
32Liketso tse ling tsa Hesekiea, le tsa ho sebeletsa Molimo, li ngotsoe Bukeng ea Lipono tsa Moporofeta Esaea, mora oa Amose, le Bukeng ea Likhosi tsa Juda le tsa Iseraele. 33Hesekiea a shoa, 'me a epeloa leralleng, kaholimo ho mabitla a bara ba Davida. Baahi bohle ba naha ea Juda, le ba Jerusalema, ba mo tlōtla lefung la hae. Manase, mora oa hae, a mo hlahlama.
