2 LIKETSAHALO 7

₁Hoba Solomone a qete ho rapela, mollo oa theoha leholimong, oa fihla oa chesa nyehelo ea secheso le mahlabelo, 'me tlōtla ea Morena ea tlala ka Tempeleng. ₂Baprista ba ne ba sitoa ho kena ka Tempeleng ea Morena, hobane e ne e tletse tlōtla ea Morena.

₃Ha bana ba Iseraele bohle ba bona mollo o theoha leholimong, le tlōtla ea Morena e le holim'a Tempele, ba obamela fatše ka lifahleho ba le lebaleng, ba khumamela Morena, ba mo rorisa, ba re:

₄Eaba khosi, 'moho le sechaba sohle, e nyehella Morena ka mahlabelo. ₅Khosi Solomone a nyehela ka lipohoana tse likete tse mashome a mabeli a metso e 'meli, le ka likhutšoane tse likete tse lekholo le mashome a mabeli. Joale khosi, 'moho le sechaba ea khakola Tempele ea Morena. ₆Baprista ba e-ba litulong tsa bona, le Balevi ba neng ba letsa liletsa tsa Morena tsa 'mino, tseo khosi Davida a neng a li etselitse ho rorisa Morena. Balevi, ba shebane le baprista, ba letsa literompeta, ba boka Morena, ba re: “Mohau oa hae ke oa kamehla eohle.” Baiseraele bohle bona ba ne ba eme ka maoto.

₇Solomone a halaletsa bohare ba seotloana se kapele ho Tempele ea Morena, 'me hona moo a etsetsa linyehelo tsa secheso. Ka mafura a etsa linyehelo tsa teboho, hobane aletare ea lethose, eo a neng a e entse, e ne e ke ke ea lekana ho etsetsa nyehelo ea secheso, le nyehelo ea lijo, le nyehelo ea mafura.

₈Ka eona nako eo Solomone a etsa mokete, a e-na le Baiseraele bohle ba neng ba khōbōkane ka bongata bo boholo, ho tloha Hamate, ho ea fihla molatsoaneng oa Egepeta. Mokete ona oa ketekoa ka matsatsi a supileng. ₉Ka letsatsi la borobeli ea e-ba mokete o moholo oa mapomelo. Ba ne ba ile ba ketekela ho khakōla aletare ka matsatsi a supileng, 'me ba boela ba keteka ka matsatsi a supileng hape. ₁₀Ka letsatsi la mashome a mabeli a metso e meraro la khoeli ea bosupa, Solomone a qhala sechaba hore se ee malapeng a sona. Sechaba se ne se thabile, se nyakaletse, ka baka la molemo oohle oo Morena a o etselitseng Davida, le Solomone, le sechaba sa hae sa Iseraele.

₁₁Solomone a qeta ho haha Tempele ea Morena le ntlo ea khosi. Tsohle tseo Solomone a neng a rerile ho li etsa ka Tempeleng ea Morena, le ka tlung ea hae ea bokhosi, a li phetha hantle. ₁₂Joale Morena a iponahatsa ho eena, bosiu, a re: “Ke utloile thapelo ea hao, 'me ke ikhethetse sebaka sena hore e be Tempele eo ke tla etsetsoa mahlabelo ho eona.

₁₃“Ha ke etsa hore letsatsi le eme, pula e se ke ea na, kapa ke laela litsie ho kumōla naha, kapa ke rōmela seoa har'a sechaba sa ka, ₁₄haeba sechaba sa ka, se bitsoang ka 'na, se ka ikokobetsa, sa rapela, sa mpatla, 'me sa khutla mekhoeng ea sona e khopo, ke tla utloa ke le leholimong, ke se tšoarele sebe sa sona, 'me ke nchafatse naha ea sona. ₁₅Mahlo a ka a tla ba nchocho, litsebe tsa ka li be lethoèthoè ho utloa lithapelo tse tla etsetsoa sebakeng sena. ₁₆Ke khethile Tempele ena, ka e halaletsa, e le hore ke tle ke lule ka ho eona kamehla eohle. Ke tla e baballa, ke e rate kamehla eohle.

₁₇“Haeba le uena u ka tsamaea litseleng tsa ka joalokaha Davida, ntat'ao, a ile a etsa, ua etsa tsohle tseo ke u laetseng tsona, 'me ua bōlōka litaelo tsa ka le melao ea ka, ₁₈ke tla tiisa bokhosi ba hao, joalokaha ke ne ke etse selekane le Davida, ntat'ao, ka re: ‘Bokhosi ba hao bo ke ke ba hloka mohlahlami ea tla busa Iseraele.’

₁₉“Empa haeba lona le ka nkoenehela, la furalla litaelo tsa ka le melao ea ka, eo ke le beetseng eona, eaba le sebeletsa melimo e meng, la e khumamela, ₂₀ke tla falatsa Baiseraele naheng ena ea ka, eo ke ba neileng eona. Tempele ena, eo ke e ikhalalelitseng eona, ke tla e furalla, 'me e tla ba pale le sesomo har'a lichaba tsohle. ₂₁Tempele ena, leha e phahame hakana, bohle ba fetang pel'a eona ba tla e khōtsa, ba re: ‘Ke ka baka la'ng Morena a entseng naha ee tjee, le Tempele ee tjee?’ ₂₂Ho tla arabeloa, ho thoe: ‘Ke kahobane ba furaletse Morena Molimo oa bo-ntat'a bona, ea ileng a ntša bo-ntat'a bona naheng ea Egepeta. Joale ba khomaretse melimo e meng, baa e khumamela, baa e sebeletsa, 'me ka baka lena Morena o ba tliselitse bobe bona bohle.’ ”