Mesebetsi e meng ea Solomone
1Qetellong ea lilemo tse mashome a mabeli, tseo ka tsona Solomone a ileng a haha Tempele ea Morena le ntlo ea bokhosi, 2Solomone a tsosa metse eo Hirame a ileng a 'museletsa eona, 'me a bea bana ba Iseraele ho eona. 3Joale Solomone a futuhela Hamate-Soba, a e hapa. 4A tsosa le Tademore e lehoatateng, le metse e meng eo ho bōlōkoang lijo le lihlomo ho eona, eo a neng a ile a e haha Hamate. 5A tsosa Bete-Horone e kaholimo, le Bete-Horone e katlase, e leng metse e hahelelitsoeng ka marako, e nang le likhoro, le mekoallo. 6A tsosa le Baalate, le metse e meng ea hae, eo ho bōlōkoang lijo le lihlomo ho eona, le metse eohle eo ho bōlōkoang likariki tsa ntoa ho eona, le metse ea bahlabani ba palamang. A haha tsohle tseo a neng a rata ho li haha Jerusalema, le Lebanone, le naheng eohle eo a neng a e busa.
7Masalla 'ohle a sechaba sa Bahete, le sa Baamore, le sa Baperise le sa Bahife, le sa Bajebuse, ao e neng e se Baiseraele, 8e leng litlōhōlō tsa bona, tse ileng tsa sala naheng eo, tseo bana ba Iseraele ba sa kang ba li timetsa, a li fetola makhoba ho fihlela kajeno-ea-bokajeno. 9Empa Solomone ha aa ka a fetola bana ba Iseraele makhoba; bona e ne e le bahlabani, le baokameli ba balaoli ba mabōtho a hae, le balaoli ba likariki tsa hae tsa ntoa, le balaoli ba bahlabani ba palamang. 10Bana e ne e le baokameli ba baholo ba khosi Solomone, ba neng ba busa sechaba. Ba ne ba le makholo a mabeli, le mashome a mahlano.
11Solomone a lata morali oa Faro Motseng oa Davida, a mo isa tlung eo a neng a mo hahetse eona. O ne a re: “Mohats'a ka a ke ke a lula tlung ea Davida, khosi ea Iseraele, hobane sebaka seo areka ea Morena e kileng ea e-ba ho sona, sea halalela.”
12Solomone a etsetsa Morena linyehelo tsa secheso holim'a aletare eo a neng a e hahetse Morena kapele ho lethule. 13A etsa ho ea kamoo ho neng ho hlokahala kateng ka letsatsi le letsatsi, ho latela molao oa Moshe o amanang le lisabatha, le mekete ea ho thoasa ha khoeli, le mekete e meraro e halalelang, e leng mokete oa bohobe bo sa lomosoang, mokete oa libeke, le mokete oa maphèphè.
14Ho ea ka taelo ea Davida, ntat'ae, a khethela lihlopha tsa baprista mesebetsi ea tsona, le Balevi a ba khethela hore ba rorise Molimo, ba thuse le baprista, ho ea kamoo ho neng ho hlokahala kateng ka letsatsi le letsatsi. A khetha le lihlopha tsa balebeli ba monyako o mong le o mong oa Tempele, hobane Davida, mohlanka oa Molimo, o ne a laetse joalo. 15Ha baa ka ba fapoha litaelo tsa khosi malebana le baprista le Balevi tabeng efe kapa efe, le tabeng e amanang le matlōle.
16Solomone a etsa mosebetsi oohle oa hae, ho tloha mohla ho thèoang Tempele ea Morena, ho fihlela e fela. Eaba mosebetsi oa ho haha Tempele ea Morena oa phethoa.
17Joale Solomone a ea Esione-Gebere le Elate, lebōpong la leoatle le naheng ea Edomo. 18Hurame a mo rōmela likepe tse khannoang ke bahlanka ba hae, e leng banna ba tsebang leoatle. Banna bana ba ea Ofire ba e-na le bahlanka ba Solomone, ba khutla ba nkile khauta e boima ba likilo tse ka fetang likete tse leshome le metso e mehlano, 'me ba e nea Solomone.
