2 BAKORINTHE 11

₁Hoja la ka la mamella bothotonyana ba ka! Etsang joalo hle! ₂Ke le boulela joalokaha Molimo a le boulela, hobane ke le khethetse ho nyaloa ke monna a le mong, e leng Kreste, hore ke tle ke le ise ho eena, le le joaloka moroetsana ea hloekileng. ₃Empa kea tšaba, esere mohlomong maikutlo a lōna a senyeha, la khelosoa botšepehing ba lōna ba 'nete ho Kreste, joalokaha nōha e ne e thetse Eva ka mano a eona. ₄Le fela le mamella ka thabo ha e mong a e-tla ho lōna, a le tsebisa Jesu osele, eo re sa kang ra le tsebisa eena; kapa ha le amohela moea osele, ho fapana le oo le seng le o amohetse; kapa molaetsa o molemo osele, ho fapana le oo le seng le o amohetse. ₅Empa ha ke kholoe hore baapostolahali bao ba mpheta ka letho. ₆Leha ke se kheleke, tsebo ke na le eona, 'me re le bontšitse hona ka linako tsohle le ka mekhoa eohle.

₇Na ke ile ka etsa phoso ha ke ikokobetsa hore lōna le phahamisoe, 'me ke le boleletse molaetsa o molemo oa Molimo, ke sa le lefise? ₈Ke hanyapelitse likereke tse ling ka ho amohela moputso, hore ke tle ke le sebeletse. ₉Nakong eo ke neng ke e-na le lōna, ha kea ka ka khōka motho ha ke ne ke hloka, hobane bana babo rōna ba tsoang Masedonia ba 'nile ba mphallela ka tsohle tseo ke neng ke li hloka. Joaloka nakong e fetileng, esita le ka nako e tlang, nke ke ka ba ka le imetsa. ₁₀Ke ikana ka 'nete ea Kreste e ka ho 'na, hore boithoriso bona ba ka bo ke ke ba khaotsa libakeng tsa Akaea. ₁₁Hobane'ng? Hobane ke sa le rate? Che, Molimo oa tseba, kea le rata.

₁₂Joale seo ke se etsang ke tla 'ne ke se etse, e le hore ba ipatlelang sebaka sa ho ithorisa ka ho re ba joaloka rōna, ke tle ke ba hlokise sona. ₁₃Bao ke baapostola ba bohata, basebetsi ba mano, ba iketsang e ka ke baapostola ba Kreste. ₁₄Hoo ha ho makatse, hobane le Satane o iketsa e ka ke lengeloi la leseli. ₁₅Ka hona hase mohlolo ha basebeletsi ba hae ba iketsa e ka ke basebeletsi ba ho loka. Bana hè, qetello ea bona e tla tšoana le liketso tsa bona.

₁₆Ke sa bua hape, ke re: Ho se be ea hopolang hore ke sethoto. Empa haeba ho joalo, nkukeng ke le sethoto hè, e le hore ke tle ke be le boithorisonyana! ₁₇Tabeng ena ea ho itšepa le ho ithorisa, ha ke bue ka ho ea ka thato ea Morena, empa ke bua ka bothoto. ₁₈Erekaha ba bangata ba ithorisa ho ea ka botho, le 'na ke tla ithorisa joalo. ₁₉Lōna le bohlale, empa le mamella lithoto ka thabo, ₂₀hobane le mamella motho ha a le etsa makhoba, ha a le ja, kapa ha a le qhekella, kapa a ikhōhōmōsetsa lōna, kapa a le oahlela sefahlehong. ₂₁Ke hlajoa ke lihlong ho lumela hore re ile ra fokola tabeng ena, empa moo motho a sa tšabeng ho ithorisa, le 'na ha ke tšabe. Feela ke bua ka bothoto. ₂₂Na ke Baheberu? Le 'na ke eena. Na ke Baiseraele? Le 'na ke eena. Na ke litlōhōlō tsa Aborahama? Le 'na ke sona. ₂₃Na ke bahlanka ba Kreste? Ke bua joaloka lehlanya, ke re: Kea ba feta! Ke sebelitse ka thata ho ba feta, ke bile chankaneng hangata ho ba feta, ka shapuoa haholo ho ba feta, 'me ka makhetlo-khetlo ke bile ntšing tsa lefu. ₂₄Ka makhetlo a mahlano Bajuda ba ile ba nchapa lithupa tse mashome a mararo a metso e robong. ₂₅Ka makhetlo a mararo ka shapuoa ka khotla, ka tlepetsoa ka majoe hanngoe; ka makhetlo a mararo ke bile likepeng tse pshatlehang, ka qeta letsatsi le bosiu ke fefoha holim'a boliba. ₂₆Maetong a ka a mangata ke bile likotsing tsa linōka, likotsing tsa linokoane, likotsing tsa ba heso, likotsing tsa balichaba, likotsing metseng, likotsing mafeelleng, likotsing leoatleng, likotsing tsa balumeli ba bohata. ₂₇Ka ba mesebetsing le makaqabetsing; ka hloka boroko ka makhetlo, ka lapa, ka nyoroa, ka bolaoa ke tlala, ka hatsela, ka hlōbōla. ₂₈Kantle ho tsena tse ntlhahetseng, ka letsatsi le letsatsi ke ntse ke imeloa ke ho hlokomela likereke tsohle. ₂₉Ha e mong a fokola, le 'na kea fokola; ha e mong a khōpisoa, le 'na kea khōpeha.

₃₀Haeba ke tšoanela ho ithorisa, ke tla ithorisa ka bofokoli ba ka. ₃₁Molimo, Ntat'a Morena oa rōna Jesu Kreste, ea bokoang kamehla eohle, oa tseba hore ha ke bue leshano. ₃₂Ha ke ne ke le Damaseka, 'musisi, leqosa la khosi Aretase, o ne a beile balebeli motseng ho ntšoara, ₃₃empa ke ile ka ntšoa ka fesetere, ka theoloa lerakong ke le ka sesiung, 'me ka phonyoha matsohong a hae.