Likeletso tsa ho qetela le litumeliso
1Lena e tla ba lekhetlo la boraro ke le etela. Taba efe kapa efe e tla tiisoa ka bopaki ba batho ba babeli kapa ba bararo. 2Ba entseng sebe ka nako e fetileng, le ba bang bohle, ke ne ke ba bolelle mohl'a ketelo ea ka ea bobeli, 'me le kajeno ke sa ba bolella hape ke e-s'o tle, hore mohl'a ke tlang hape, ha ke na ho qenehela motho, 3kaha le batla bopaki ba hore Kreste o bua ka 'na. Eena ha a le fokolle, empa o matla har'a lōna. 4Ke 'nete, bofokoling ba hae, o ile a thakhisoa, empa, ka matla a Molimo, oa phela. Le rōna re fokola joaloka Kreste, empa, ka matla a Molimo, re tla phela le eena, ho le sebeletsa.
5Itekoleng, 'me le itlhahlobe, le tle le fumane hore na le phela ka tumelo. Ha ke re, lea tseba hore Kreste Jesu o teng ho lōna, haese haeba le le ba sa amoheleheng? 6Kea tšepa, lea tseba hore rōna re amohelehile. 7Joale re le rapella ho Molimo hore le sesefe bobe bohle, e se hore rōna re bonahale re le ba amohelehileng, empa e le hore lōna le etse botle, leha e ka rōna ha rea amoheleha. 8Re sitoa ho loantša 'nete, empa seo re nang le sona feela ke matla a ho e sebeletsa. 9Re thabile ha rōna re fokola, empa lōna le le matla. Hape, seo re se rapellang ke hore le phethehe. 10Ka baka leo, ke le ngolla tsena ke e-s'o tle, e le hore ha ke se ke tlile, ke se ke ka le hlekefetsa, ho ea ka matla ao Morena a mphileng 'ona, e leng a ho haha, e seng a ho heletsa.
11Joale, bana beso, ke qetela ka ho re: Thabang, phethahalang, khothalang, e-bang le maikutlo a le mang, le phele ka khotso, 'me Molimo oa lerato, le oa khotso o tla ba le lōna.
12Lumelisanang ka kako e halalelang. Balumeli bohle baa le lumelisa.
13Mohau oa Morena Jesu Kreste, le lerato la Molimo, le phelisano le Moea o Halalelang li ke li be le lōna bohle.
