Puso ea Jehōoakase, khosi ea Iseraele
1Ka selemo sa mashome a mabeli a metso e meraro sa puso ea Jōoashe, mora oa Akasiea, khosi ea Juda, Jehōoakase, mora oa Jehu, a qala ho busa naha ea Iseraele, a le Samaria. A busa ka lilemo tse leshome le metso e supileng. 2A etse bobe mahlong a Morena, a etsa libe tse kang tsa Jeroboame, mora oa Nebate, ea neng a etse hore Baiseraele ba siteloe Morena, 'me a se ke a li tlohela. 3Bohale ba Morena ba tlōkōmela Baiseraele, 'me ka nako e telele a neelana ka bona matsohong a Hasaele, khosi ea Arame, le matsohong a Bene-Hadade, mora oa Hasaele.
4Eaba Jehōoakase o rapela Morena, 'me Morena a mo utloa, kaha a ne a bona kamoo Baiseraele ba neng ba hateletsoe kateng, hobane khosi ea Arame e ne e ba hateletse. 5Empa Morena a fa Baiseraele mopholosi, 'me ba tsoa tlas'a puso ea Baarame. Bana ba Iseraele ba boela ba iphelela malapeng a bona joaloka pele. 6Leha ho le joalo, ha baa ka ba tlohela libe tsa ntlo ea Jeroboame, ea neng a etse hore Baiseraele ba siteloe Morena. Ba etsa libe tseo; le setšoantšo sa Ashera sa se ke sa tlosoa Samaria.
7Jehōoakase a se ke a salloa ke bahlabani, haese bapalami ba lipere ba mashome a mahlano, le likariki tsa ntoa tse leshome, le bahlabani ba litaaso ba likete tse leshome. Khosi ea Arame e ne e ba ripitlile, e ba entse hore ba be joaloka lerōle ha ho pōloa.
8Liketso tse ling tsa Jehōoakase, le tsohle tseo a ileng a li etsa, le tsa bohlabani ba hae, li ngotsoe Bukeng ea Liketsahalo tsa Likhosi tsa Iseraele. 9Jehōoakase a shoa, 'me a epeloa Samaria. Jehōoashe, mora oa hae, a mo hlahlama.
Puso ea Jehōoashe khosi ea Iseraele
10Ka selemo sa mashome a mararo a metso e supileng sa puso ea Jōoashe, khosi ea Juda, Jehōoashe, mora oa Jehōoakase, a qala ho busa naha ea Iseraele, a le Samaria. A busa ka lilemo tse leshome le metso e tšeletseng. 11A etsa bobe mahlong a Morena, a se ke a tlohela libe tsohle tsa Jeroboame, mora oa Nebate, ea neng a etse hore Baiseraele ba siteloe Morena, 'me a phela ka tsona.
12Liketso tse ling tsa Jehōoashe, le tsohle tseo a ileng a li etsa, le tsa bohlabani ba hae, boo a neng a loantše Amasia, khosi ea Juda, ka bona, li ngotsoe Bukeng ea Liketsahalo tsa Likhosi tsa Iseraele. 13Jehōoashe a shoa, 'me setulo sa hae sa nkoa ke Jeroboame. Jehōoashe a epeloa Samaria, le likhosi tsa Iseraele.
Lefu la Elisha
14Elisha o ne a kulela lefu. Eaba Jehōoashe, khosi ea Iseraele, o theohela ho eena; ha a ntse a lla, meokho ea hae ea keleketlela holim'a sefahleho sa Elisha, a re: “Ntate! Ntate! Uena mohlabaneli le thèbè ea Iseraele!”
15Elisha a re ho eena: “Nka seqha le metsu!” Khosi ea nka seqha le metsu. 16Elisha a re ho khosi ea Iseraele: “Hula seqha!” Khosi ea hula seqha, Elisha a beile matsoho a hae holim'a matsoho a khosi.
17Elisha a re: “Bula fesetere e ka bochabela!” Khosi ea e bula. Elisha a re: “Betsa!” Khosi ea betsa. Elisha a boela a re: “Ona ke motsu oa Morena, o hlōlang; ke motsu o hlōlang, o tla hlōla Baarame. U tla hlōla Baarame Afeke, ho fihlela u ba timetsa!”
18Elisha a re: “Nka metsu!” Khosi ea e nka. A boela a re ho khosi ea Iseraele: “Betsa fatše!” Khosi ea betsa fatše hararo, ea nt'o emisa. 19Moporofeta oa Molimo a e halefela, a re ho eona: “U ne u tšoanetse ebe u betsitse hahlano kapa hatšelela! U ne u tla hlōla Baarame ho fihlela u ba timetsa. Empa joale u tla ba hlōla hararo feela!”
20Elisha a shoa, 'me a epeloa.
Ha selemo se thoasa, mabōthoana a Bamoabe a futuhela naha. 21Ka tsatsi le leng, batho ba ne ba epela setōpō, 'me ba bona lebōthoana la bahlabani. Ba akhela setōpō ka lebitleng la Elisha, ba baleha. Ha setōpō se thetsa masapo a Elisha, sa tsoha, motho eo a ema ka maoto a hae.
Jehōoashe o hlōla Bene-Hadade
22Hasaele, khosi ea Arame, a hatella Baiseraele ka matsatsi 'ohle a puso ea Jehōoakase. 23Morena a hauhela Baiseraele, a ba utloela bohlōkō; a ba hlomohela ka lebaka le selekane sa hae le Aborahama, le Isaka, le Jakobo, 'me a se ke a rata ho ba timetsa, leha e le ho ba furalla.
24Hasaele, khosi ea Arame, a shoa, 'me Bene-Hadade, mora oa hae, a mo hlahlama. 25Jehōoashe, mora oa Jehōoakase, a amoha Bene-Hadade, mora oa Hasaele, metse eo a neng a e hape ho Jehōoakase, ntat'a Jehōoashe. Jehōoashe a hlōla Bene-Hadade ka makhetlo a mararo, 'me a hapa metse eo ea Iseraele.
