Khang ea Oniase le Simone
1Eitse ha baahi ba Jerusalema ba phela ka khotso e tletseng, 'me melao e ntse e bolokiloe hantle ka baka la borapeli ba Oniase, moprista e moholo, le tlhoeo ea hae ea bokhopo, 2ho 'nile ha etsahala hore esita le likhosi li hlonephe Qalo e halalelang, 'me li tlotlise Tempele ka limpho tse kholohali. 3Khosi ea Asia Seleukose ka sebele o ne a lefella, ka chelete ea hae, litšenyehelo tsohle tsa tšebeletso ea mahlabelo. 4Empa Simone ea itseng oa leloko la Benjamine, ea neng a khethiloe ho ba mookameli oa Tempele, a hanyetsana le moprista e moholo ka tsamaiso ea limmaraka ka motseng. 5Kaha a ile a sitoa ho hlola Oniase, a ea ho Apoloniose, mora oa Therasease, eo ka nako eo e neng e le molaoli oa Siria e Kholo le Fenisia. 6A mo tlalehela hore polokelo ea Jerusalema e tletse matlotlo a ke keng a lekanngoa, hoo chelete ena e sitoang ho baloa 'me e leng e fapanang le e ngotsoeng bukeng ea litšenyehelo ea mahlabelo. A ba a 'molella hore ke ntho e ka etsuoang hore chelete eo e oele liatleng tsa khosi.
Heliodorose o romeloa Jerusalema
7Hoba Apoloniose a chakele khosi ho e tsebisa taba ea matlotlo ao a utloileng ka 'ona, khosi ea khetha Heliodorose, tona-kholo, 'me ea mo romela ho ea lata matlotlo a seng a boletsoe. 8Heliodorose a phakisa a kena tseleng, a etsa sa mokana a tlil'o lekola metse ea Siria e Kholo le Fenisia, empa 'nete e le ho tla phethahatsa morero oa khosi. 9Eitse ha a fihla Jerusalema 'me a amohetsoe ka mofuthu ke moprista e moholo, a mo phetela tsa tlaleho e entsoeng, 'me a mo hlalosetsa lebaka leo a tlileng ka lona, le hore o batla ho tseba bonnete ba litaba. 10Moprista e moholo a mo tsebisa hore matlotlo ao e ne e le leruo le boloketsoeng bahlolohali le likhutsana; 11le hore karolo e 'ngoe e ne e le ea Hirekanose, mora oa Tobiase, motho ea hlomphehang haholo. A eketsa ka hore Simone ea khopo o ile a mo etselletsa, le hore kaofela ha eona chelete eo e ne e le ea litalenta tse makholo a mane a silefera le tse makholo a mabeli a khauta. 12A qetela ka hore ho senyetsa batho ba neng ba tšepile khalalelo ea Qalo eo, e leng Tempele e tlotlehang, e sa tlontlolloeng, e hlonepshoang lefatšeng lohle, ke ntho e sitoang ho etsoa ho hang.
Heliodorose o rera ho kena ka Tempeleng
13Empa Heliodorose, ka baka la litaelo tseo a li filoeng ke khosi, a 'na a pheella ho bolela hore e ka khona matlotlo ao a nkeloe polokelong ea borena. 14Joale tsatsing leo a neng a le beile, a kena ka Tempeleng ho hlahloba boemo ba mokotla. Tšabo e kholo ea oela batho bohle ba motse 15Baprista ba ithapalatsa ka pele ho aletare ka liaparo tsa bona tsa boprista, 'me ba ipiletsa ho Ea leholimong, eo e leng mofani oa molao o amanang le matlotlo a bolokeloang batho, hore a a baballele beng ba 'ona. 16Mang le mang ea neng a bona sefahleho sa moprista e moholo o ne a utloa bohloko pelong; hobane ho fetoha ha 'mala oa sona ho ne ho bontša ho hlora ha moea oa hae. 17O ne a keneletsoe ke tšabo e thothometsang 'mele oa hae; ka hona ho totobetse mahlong a batho masoabi a ka pelong ea hae. 18Batho ba tsoa matlung a bona ka lihlopha ho ea etsa thapelo hammoho, hobane Qalo e halalelang e ne e le lekhatheng la ho oeloa ke sekhobo. 19Basali ba phasa-phasa literateng, ba ikhahlotse matsoele ba tenne tse mahoashe. Baroetsana ba neng ba e-s'o lumelloe ho tsoela kantle ba mathela menyakong kapa ba hloella marakong kapa ba hlaha ba shebile ka lifestere. 20Kaofela ha bona ba phahamisetsa matsoho a bona maholimong, ba ikopanya le ba bang thapelong. 21E ne e le ntho e sisimosang ho bona letšoele lena le tsoaka-tsoakaneng, le khathetseng matla, le moprista e moholo ea tšohileng a lebeletse tse bohloko.
Morena Molimo o sireletsa Tempele ea hae
22Joale ha batho ba ne ba ntse ba ipiletsa ho Morena ea matla 'ohle, hore ba bolokeloang matlotlo a bona ka Tempeleng, Molimo a ba baballele 'ona, a a sireletse, 23Heliodorose eena a phethisa seo a neng a se rerile. 24Empa ha a se a le teng, ka seqo sa hae, pel'a polokelo, a e-na le balebeli ba hae, Morena oa meea eohle le oa matla afe kapa afe a etsa ponahatso e kholo, hoo bohle ba neng ba bile le sebete sa ho tla mona le Heliodorose ba ileng ba nyarosoa ke matla a Molimo, ba kenoa ke bokoala, ba felloa ke matla.
25Ho ile ha iponahatsa ho bona pere e palangoeng ke mopalami ea tšabehang, 'me e qhanehiloeng ka qhana e ntlehali; ea matha ka bohale, ea leka ho kapa Heliodorose ka tlhako tsa pele. Mopalami oa eona e ne eka o hlometse ka lihlomo tsa khauta. 26Heliodorose a bona le bahlankana ba bang ba babeli, ba matla a makatsang, ba botle bo khanyang, ba apere tse ntlehali, ba ileng ba ema, e mong ka nq'ena e mong ka nq'ane ho eena, 'me ba mo shapa ka ntle ho khaotso, ba mo khakhatha. 27Hang-hang a oela fatše, a apareloa ke lefifi le leholo. Batho ba mo nka, ba 'mea lempareng. 28Joale ea neng a sa tsoa kena ka polokelong e boletsoeng, a e-na le bahlanka ba bangata le balebeli bohle ba hae, a jaroa a se a sitoa ho tsamaea. Batho bohle ba tseba matla a Molimo ka mokhoa o totobetseng. 29Ka matla a Molimo motho eo a rapalla a hloka puo, 'me a se na tšepo ea ho boela a phela. 30Ha e le Bajuda, ba boka Molimo ea ileng a tlotlisa Qalo e halalelang ea hae. Tempele eo, pejana ho moo, e neng e tletsoe ke tšabo le tubeho, kamorao ho boiponahatso ba Morena ea matla 'ohle ea tlaloa ke thabo le nyakallo.
Oniase o rapella Heliodorose
31Kapele-pele ba bang ba metsoalle ea Heliodorose ba kopa Oniase ho mo rapella ho Ea Holimo-limo, hore ea lekhatheng la ho neela moea a tle a neoe bophelo. 32Eaba moprista e moholo, ka ho tšaba hore khosi mohlomong e tla hloma eka Heliodorose o hlahiselitsoe kotsi ke Bajuda, a nyehela ka sehlabelo bakeng sa thuseho ea motho eo. 33Eitse ha moprista e moholo a ntse a etsa sehlabelo sa puseletso, bahlankana bane ba boela ba iponahatsa ho Heliodorose, ka tsona liaparo tsane, ba ema pel'a hae, ba re ho eena: “Leboha moprista Oniase haholo, hobane ke ka baka la hae Morena a u neileng bophelo. 34Ha e le uena, ea ileng a shapuoa ke Molimo, tsebisa batho bohle matla a maholo a Molimo.” Hoba ba bue joana, ba nyamela.
Heliodorose o rorisa Molimo
35Joale Heliodorose, hoba a nyehele ka sehlabelo ho Morena, 'me a etse thapelo tse chesehang ho leboha ea mo neileng bophelo, a re Oniase a sale ka khotso, a ea le mabotho a hae 'me a khutlela ho khosi. 36A phatlalletsa batho bohle mesebetsi ea Molimo ea matla 'ohle, eo a e boneng ka mahlo a hae. 37Eitse ha khosi e 'motsa hore na ke mang ea ka tšoanelang ho romeloa Jerusalema ka nako e tlang, Heliodorose a araba a re: 38“Ha eba u na le sera kapa ea rerang ho fetohela 'muso oa hao, mo romele teng; 'me u tla mo amohela a shapuoe ha a khutla, ha a ka tšoha a phonyohile. Ka ntle ho pelaelo, ho na le matla a Molimo a haheletsang Qalo e halalelang. 39Ea ahileng leholimong o lebela 'me o sireletsa Qalo eo; oa otla 'me o timetsa ba e atamelang ka morero o mobe.” 40Tse amanang le Heliodorose le paballo ea matlotlo li ile tsa etsahala joalo.
