Bajuda ba hlorisoa ka baka la tumelo
1Ka moraonyana ho moo, khosi ea romela monna-moholo e mong, oa motse oa Athene, ho ea qobella Bajuda ho kheloha melao ea bo-ntat'a bona le ho khaotsa ho phela ka ho ea ka melao ea Molimo; 2le ho silafatsa Tempele ea Jerusalema, le ho e bitsa ea Seuse oa Olimpose. Tempele e thabeng ea Garisime, eona ea bitsoa ea Seuse oa Boeti, ka ho ea ka kopo ea baahi ba moo.
3Ho tota ha bobe ea e-ba ntho e boima 'me e bohloko ho bohle. 4Tempele ea tlala mofere-fere oa mekete e khopo ea balichaba, ba ileng ba bapala le liotsoa, ba robala le basali mabaleng a halalelang, 'me ba tlisa lintho tse fapaneng le molao. 5Aletare le eona ea tlatsoa lintho tseo e seng tsa molao, tse hanetsoeng ke oona. 6Ho ne ho se ho sa lumellehe ho boloka Sabatha kapa 'ona matsatsi a mekete a bo-ntat'a; 'me motho o ne a haneloa esita le ho ipolela hore ke Mojuda. 7Khoeli le khoeli, tsatsing la khopotso ea tsoalo ea khosi, batho ba khannoa, ka qobello e bohloko, ho ja lijo tsa mahlabelo a sehetene; 'me ha ho fihla letsatsi la mokete oa Dionisiose, ba tlamelloa ho hlonepha molimo oo ka ho tsamaea le mokoloko ba roetse meqhaka ea mahlaku. 8Ka tšusumetso ea Potolemea, metseng e ka mathoko ea Bagerike, ha phatlalatsoa taelo ea hore Bajuda ba teng le bona ba etsoe joalo, ba qobelloe ho ja lijo tsa mahlabelo. 9Ba neng ba sa ikhethela ho amohela meetlo ea segerike ba fenethoa. Bohle ba ne ba ka bona masetlalibete a tlang.
10Basali ba babeli ba isoa khotla ba qositsoe ka hore ba bololitse bana ba bona. Ba hlahisoa motseng oohle hore bohle ba ba bone, masea a bona a maname lifubeng tsa bona; eaba ba hloesetsoa lerakong la motse 'me ba liheloa fatše. 11Batho ba bang ba neng ba phuthehetse mahaheng a neng a le haufi ho keteka letsatsi la Sabatha ka lekunutu, 'me ba neng ba tlalehuoe ho Filipi, ba chesoa hammoho ka mollo. Ba tlohela ho itoanela ka baka la ho hlompha khalalelo ea letsatsi lena.
Morena Molimo oa otla 'me oa hauhela
12Joale ke kopa bao ba tla bala buka ena hore ba se ke ba lahleheloa ke tšepo ka baka la litaba tseo tse bohloko, ba mpe ba hopole hore sepheo sa lihloriso tseo e ne e se ho timetsa ba moloko oa habo rona, empa ho ba laea. 13Ke pontšo ea lerato le leholo ha baetsalibe ba sa tlohelloe ho tsoela pele tseleng tsa bona nako e telele, 'me ba otloa kapele-pele. 14Ho fapana le lichaba tse ling, tseo Morena a iphapanyetsang tsona ho fihlela ha tekano ea libe e tletse, pele a li otla, ha aa ka a hopola e le tokelo ho re etsa joalo. 15Rona ha a re lumelle ho qetela ka libe tsa rona, hore a tle a re otle kamorao feela. 16Ka hona ha a re amohe mohau oa hae le ka mohla; 'me ha a furalle sechaba sa hae mohla a se otlang ka tse bohloko. 17E ne e ka khona ke le hopotse 'nete ena. Joale, ka mora mantsoe ao a seng makae, a re ntšetseng pale ea rona pele.
Eleasare o shoela tumelo ea hae
18Eleasare, sebsebi se ka sehlohong sa Molao oa Moshe, motho ea neng a se a holile, ea tšobotsi e ntlehali, a qobelloa ho ahlama hore a jesoe nama ea kolobe. 19Empa eena, ka ho rata ho shoa lefu le tlotlehang ho e-na le ho phela bophelo bo silafetseng, a ikisa ka boeena qalong ea tlhokofatso, 20hoba a tšoele sejo se ka hanong. A bontša se tšoanetseng ho etsoa ke ba nang le sebete sa ho hana se sa lumelloang ho jeoa, esita le ka lebaka la ho rata ho pholosa bophelo. 21Ba neng ba ikarabella lijong tsena tsa mahlabelo, tse fapaneng le Molao oa Moshe, kaha ba tsebeletse Eleasare khale, ba mo nkela lekunutung. Ba mo eletsa ho tlisa nama eo a lumeletsoeng ho e ja, e se ntse e lokisitsoe ke eena, le ho etsa sa mokana a ja nama e tsoang mahlabelong, eo khosi e neng e mo laetse ho e ja. 22Ka ho etsa joalo, o ne a tla phema lefu, 'me a tšoaroe hantle, ka baka la mohau o bakiloeng ke setsoalle sa khale sa bona le eena. 23Eleasare eena a ikhethela bokhabane, a rata ho etsa ka mokhoa o tšoanelang bongata ba lilemo tsa hae, le tlhompho e mo lokelang ka baka la boqheku ba hae le moriri oa hae o moputsoa le metsamao ea hae e metle ho tloha bonnyaneng; empa haholo-holo a rata ho boloka molao o halalelang oa Molimo. Ka mabaka ana a araba ka ho re a ka mpa a liheloa hang-hang Qalong ea bafu. 24“Boikaketsi ha bo tšoanele botsofali ba ka,” a rialo; “hobane bacha ba bangata ba ka tšoha ba kholoa hore Eleasare o sokolohetse boheteneng a le lilemo li mashome a robong; 25'me ka baka la boikaketsi ba ka, le ka baka la takatso ea ho phela nakoana e seng kae, bona ba ka khelosoa; ebile e ka ba ho silafatsa le ho tlontlolla botsofali ba ka. 26Leha eba hajoale nka phema kotlo ea batho, nke ke ka phonyoha liatleng tsa Ea matla 'ohle, ke phela kapa ke shoele. 27Ka baka lena, ka ho shoa senna, ke tla iponahatsa ke le motho ea neng a lokela ho phela halelele tjee; 28ke be ke siele bacha sesupiso sa lefu le letle, ka ho shoela melao e hlomphehang, e halalelang, ka boithatelo bo tletseng le ka sebete.” Hoba a rialo, a phakisa a leba qalong ea tlhokofatso.
29Ba mo qhobelang teng, e leng bao pejana ba neng ba mo utloela bohloko, joale ba mo hloea ka baka la seo a neng a qeta ho se bua, ba re o fapane hlooho. 30Eitse ha a shapuoa, hoo a seng a le lekhatheng la lefu, a re: “Morena ea nang le tsebo e halalelang o tseba hantle hore, leha ke ne nka phonyoha lefung, 'meleng oa ka ke hlokofatsoa hampe ka ho shapuoa; empa, moeeng oa ka, ke mamella tsena tsohle ka thabo, hobane kea mo tšaba.”
31Motho eo a falla bophelong joalo, 'me ka lefu la hae a siela e seng moloko o mocha feela, empa sechaba ka kakaretso, mohlala oa sebete le khopotso ea bokhabane.
