Morena Molimo o otla Antiokose
1Ka nako eo, Antiokose a khutla naheng ea Peresiea habohlasoa. 2O ne a ile a kena motseng oa Peresepolise, 'me a leka ho hapa matlotlo a tempele ea moo, le ho hatella baahi ba motse. Ka baka leo letšoele la phallela lihlomo ho itoanela 'me la mo qhala; 'me ha etsahala hore, ha Antiokose a hlotsoe ke baahi ba naha joalo, a cheche a le lihlong. 3Eitse ha a fihla Ekebatana, a utloa tse hlahetseng Nikanore le makhotla a Timothea. 4Ka ho tlokoma ke khalefo, a nahana ho iphetetsa ka Bajuda ka baka la tsietsi eo a e hlahiselitsoeng ke ba ileng ba mo phalalisa. Ka hona a laela hore kariki ea hae e khannoe e sa eme kae kapa kae, ho fihlela qetellong ea leeto la hae. Empa kahlolo ea Molimo e ne e mo setse morao, hobane motho eo boikhohomosong ba hae o ne a re: “Ha ke fihla mane, ke tla etsa Jerusalema lebitla le leholo la Bajuda.”
5Empa Morena ea bonang tsohle, Molimo oa Iseraele, a mo otla ka lefu le sa bonoeng, le sa foleng. Hang ha a qetile ho bolela mantsoe ana, a jeoa ke mala a sa phekoleheng, a ba le bohloko bo tšabehang ka mpeng. 6Hona ho ne ho mo hlahetse ka toka, kaha a ile a hlokofatsa ba bang ka maleng a bona ka mekhoa e mengata e sehloho. 7Leha ho le joalo, a se ke a fokotsa boikakaso; boikhohomoso ba hae ba eketseha, a sokela Bajuda ka bohale bo tukang, 'me a laela hore kariki e khannoe ka matla ho feta pele. Joale ha etsahala hore, lebelong leo, a oele kariking ea hae. A oela fatše habohloko, hoo litho tsohle tsa 'mele oa hae li ileng tsa opa. 8Eena eo pelenyana a neng a italima, boikhohomosong ba hae bo fetang le ba botho, e le ea ka laolang maqhubu a leoatle, 'me a inka e le ea ka lekanyang lithaba tse phahameng sekaleng, a rapalla, a ba a jaroa ka lempara; 'me ka hona a etsa hore matla a Molimo a bonoe ke bohle. 9O bile a tsoa liboko ka bongata le ka mahlong a hae, 'me linama tsa 'mele oa hae li ne li hlephoha, a le mahlokong a boima, hoo bobe ba monko oa hae bo neng bo hlopha mphi eohle ea hae. 10Eena eo pejana ho moo a neng a lekanya hore a ka fihlela linaleli tsa leholimo, ho ne ho se motho joale ea ka mo jarang, ka baka la seputa se neng se sitoa ho mamelloa.
Antiokose o etsetsa Molimo kano
11Joale boikhohomoso ba hae bo boholo ba qala ho fokotseha; a robehile tjena, a qala ho lumela hore tsena li mo hlahetse ka kotlo ea Molimo, mahloko a hae a ntse a eketseha ka motsotso o mong le o mong. 12Eitse ha, le eena, a se a sitoa ho mamella seputa sa hae, a bua joana: “Hoa lokela ho ipea tlas'a Molimo, le hore motho ea shoang a se itekanye le Molimo.” 13Eaba motho eo ea nyonyehang, ea neng a ke ke a fumana mohau ho Morena, o mo etsetsa kano ea hore, 14motse o halalelang, oo a neng a phalletse ho o batalatsa hore e tle e be qalo ea mabitla, o tšepisa hore o tla o nea tokoloho; 15le hore Bajuda, bao a itseng ha ba tšoanele le ho patoa, empa bona le bana ba bona ba tšoanela ho lahleloa libata, e le lijo tsa manong, o tla ba lekanya le baahi ba Athene ka boholo. 16A tšepisa le hore Tempele e halalelang, eona eo pele ho moo a neng a e tlatlapile, o tla e khabisa ka limpho tse ntlehali; le hore o tla busetsa halekholo lipitsa tsa eona, 'me a lefe litšenyehelo tse amanang le mahlabelo ka chelete e tsoang mokotleng oa hae. 17Ho feta moo, a bolela hore o rata ho ba Mojuda, 'me o tla ea libakeng tsohle tsa lefatše ho phatlalatsa teng matla a Molimo.
Lengolo la Antiokose ho Bajuda
18Eitse ha mahloko a hae a sa kokobele, hobane kahlolo e mo lokelang ea Molimo e ne e mo oetse holimo, a lahla tšepo ea ho phela, 'me a ngolla Bajuda, ka mokhoa oa thapeli, lengolo ka mantsoe ana:
19“Antiokose, khosi le molaoli, o lumelisa Bajuda, batho ba hae, ba molemo haholo, 'me o ba lakaletsa bophelo bo botle le katleho.
20“Haeba lona le bana ba lona le phela hantle 'me mesebetsi ea lona e tsamaea kamoo le lakatsang kateng, kea leboha. Ke ntse ke tšepile Molimo, 21ke hopola ka thabo tlhompho ea lona le maikutlo a matle ao le mpontšitseng 'ona.
“Ha ke khutla libakeng tsa Peresiea, ka oeloa ke lefu le bohloko, 'me ke hopotse hore hoa hlokahala hore ke ele polokeho ea bohle hloko. 22Bokuling ba ka ha ke e-s'o lahleheloe ke tšepo, empa ke na le tšepo e kholo ea ho thuseha. 23Empa ka hopola hore ntate le eena, nakong eo a neng a futuhela linaheng tse holimo, o ile a khetha ea tla mo hlahlama pusong; 24e le ka morero oa hore, ha ho ka etsahala se sa lebelloang, kapa ho hlaha tse bohloko, baahi ba naha ea hae, ka ho tseba ea sietsoeng 'muso, ba se ferekane. 25Ho feta moo, ka ho elelloa hore mahosana a ka mathoko, le ba meeling ea 'muso oa rona, ba lebeletse monyetla 'me ba emetse tse tla etsahala, ke khethile mora oa ka, Antiokose, ho ba khosi, eena eo ke ileng ka le siela eena 'me ka khothaletsa bongata ba lona ho mo amohela, ha ke leba literekeng tse holimo. Ke mo ngoletse lengolo leo ke le hlomathisang mona. 26Kea le rapela ka hona, 'me kea le kopa, hore, ka ho hopola lithuso tseo ke ileng ka le etsetsa tsona, ho sechaba ka kakaretso le ho motho ka mong, le 'ne le tsoele pele, e mong le e mong oa lona, ho tšepahala ho 'na le ho mora oa ka. 27Ha ke na pelaelo hore o tla phethisa merero ea ka ka mosa le ka mohau, 'me le tla phelisana le eena hantle.”
28Joale 'molai le monyefoli, hoba a mamelle mahloko a tšabehang, kamoo le eena a ileng a hlokofatsa ba bang kateng, a falla bophelong a le naheng ea balichaba, har'a lithaba, 'me qetello ea hae ea e-ba mahlomola-pelo. 29Eaba Filipi, eo ba neng ba ntšana se inong le eena, o khutlisetsa setopo hae. Kamorao ho mona, hobane a ne a tšaba mora oa Antiokose, a ea Egepeta, ho Potolemea Filometore.
