Baporofeta ba bohata le baruti ba bohata
1Sechabeng sa Iseraele le teng ho bile le baporofeta ba bohata. Ka mokhoa o joalo ho tla ba le baruti ba bohata har'a lōna, ba tla tlisa ka sekhukhu lithuto tse khelohileng, tse isang timelong. Ba tla be ba latole Morena ea ba lopolotseng, 'me ka hona ba itlisetse timelo ka potlako. 2Ba bangata ba tla ba latela tseleng ea bokhopo, 'me ka baka la bona tsela ea 'nete e tla nyefoloa. 3Ka baka la meharo ea bona ba tla le hanyapetsa ka lipolelo tseo ba iqapetseng tsona. E se e le khale moahlōli oa bona a ba emetse, 'me motimetsi oa bona ha a khalehe.
4Molimo ha aa ka a qehenela mangeloi a entseng sebe, empa o ile a a lihela liheleng, malumeleng a lefifi, moo a bōlōketsoeng letsatsi la kahlōlo. 5Hape Molimo ha aa ka a qenehela lefatše la khale, empa o ile a tlisa morallo oa metsi lefatšeng la ba khopo; a mpa a pholosa Nōoe, ea neng a phatlalatsa tsa ho loka, le ba bang ba supileng. 6Hape-hape Molimo o ile a ahlōla metse ea Sodoma le Gomora ka ho e chesa lore! Hona ea e-ba mohlala oa se tla hlahela ba khopo. 7Empa o ile a pholosa Lota, monna ea lokileng, ea neng a tennoe ke boitšoaro bo manyala ba batho bao ba khopo. 8Ka matsatsi 'ohle, pelo ea monna eo ea lokileng, ea neng a phela har'a bona, e ne e tšoenngoa ke ho bona le ho utloa liketso tsa bona tse khopo. 9Morena o tseba ho ntša ba lokileng molekong, empa ba khopo o ba bōlōkela kotlo ea mohl'a letsatsi la kahlōlo, 10haholo-holo ba busoang ke litakatso tse litšila tsa nama, ba nyefolang borena ba Molimo.
Ke ba itšepang, ba ikhopolang, ba sa tšabeng ho nyefola mangeloi a tlōtlehang; 11athe mangeloi, a ba fetang ka boholo le ka matla, 'ona a ke ke a ba qosa ho Morena ka ho ba nyefola, hore ba tle ba ahlōloe. 12Empa batho bao, ba kang liphoofolo tse hlokang kelello, tse bōpetsoeng ho tšoasoa le ho bolaoa, ba nyefola lintho tseo ba sa li tsebeng. Ba tla timetsoa joaloka liphoofolo, 13ba amohele moputso oa bokhopo boo ba bo entseng. Boithabiso ba bona ke ho qeta letšeare lohle ba le meketeng ea lijo le lino. Ke tlontlollo le mahlabisa-lihlong hore ba je le lōna, athe ba ithabisa ka mekhoa ea bona e khelosang. 14Mahlo a bona a tsōma bofebe kamehla, ba lakatsa sebe ho-ea-ho-ile, ba tšoasa ba fokolang, lipelo tsa bona li tletse meharo. Ke batho ba rōhakehileng. 15Ba khelohile tsela e nepahetseng, 'me ba lahlehile ka ho latela tsela ea Bileame, mora oa Bosore, ea neng a hoheloa ke moputso oa bokhopo, 16empa o ile a khalemelloa phoso ea hae, ha tonki, ntho e sa tsebeng ho bua, e bua joaloka motho, 'me e thibela bohlanya ba moporofeta.
17Batho bao ba joaloka liliba tse psheleng, ba joaloka maru a fefoloang ke sefefo; ba bōlōketsoe lefifi le letšo. 18Lipuo tsa bona ke tsa boikhōhōmōso, tsa mafeela; ka litakatso tse khopo tsa nama, ba tšoasa ba sa tsoa phonyoha ho ba phelang bokhelohing. 19Ba tšepisa batho bolokolohi, athe bona ke makhoba a litloaelo tse bolileng, hobane motho ke lekhoba la se mo hlōtseng. 20Haeba batho ba ile ba phonyoha tšilafatsong ea tsa lefatše ka ho tseba Jesu Kreste, Morena le Mopholosi oa rōna, empa joale ba boela ba tšoasoa, ba hlōloa hape ke tsona. Ba joalo litaba tsa bona tsa morao li ba mpe ho feta tsa pele. 21Ho ka be ho bile molemo ho bona, hoja ba ne ba sa ka ba tseba tsela ea ho loka, ho e-na le hore, ha ba se ba e tsebile, ba koenehele litaelo tse halalelang tseo ba li neiloeng. 22Se ba hlahetseng se bontša hore maele ana ke a 'nete, a reng:
“Ntja e boetse e khutletse
mahlatseng a eona,”
le a reng:
“Kolobe e qetang ho itlhatsoa
e boetse ea ipitika seretseng.”
