Hushai o lahla Abosalome
1Ahitofele a re ho Abosalome: “E-re joale ke khethe banna ba likete tse leshome le metso e 'meli. Bosiung bona bona ke tla tsoha, ke e'o phalalisa Davida. 2Ke tla mo khaoletsa a sa khathetse, a nyahame pelo. Ke tla mo tšosa, 'me ere ha bohle ba nang le eena ba phasaphasa, ke 'molaee. 3Ke tla u tlisetsa batho bohle. Ha bohle ba se ba khutlile, haese feela motho eo u 'matlang, sechaba sohle se tla ba khotso.”
4Taba ena ea khahla Abosalome le baholo ba sechaba sa Iseraele. 5Eaba Abosalome o re: “Mpitsetseng le Hushai oa Moareke, re tl'o utloa hore na eena o tla re'ng.”
6Ha Hushai a fihla ho Abosalome, Abosalome a bua le eena, a re: “Ahitofele o buile tjena le tjena; na re tla ea ka lipolelo tsa hae? Haeba ho se joalo, uena u re'ng?”
7Hushai a re ho Abosalome: “Ha e le kajeno, keletso ena ea Ahitofele ha e ntle.” 8Hushai a tsoela pele, a re: “Uena u tseba ntat'ao le banna ba hae; ke bahale ba pelo li mpe, ba joaloka bèrè e amohiloeng malinyane a eona naheng. Ntat'ao ke monna ea tsebang ntoa; ha a na ho robala le bahlabani ba hae. 9Le hona joale o ipatile mahaheng, kapa sebakeng se seng. Haeba ba bang ba bahlabani ba rōna ba ka bolaoa sethathong, ea utloang o tla re: ‘Balateli ba Abosalome ba entsoe mofela.’ 10Esitana le mohale eo bohale ba hae ekang ba tau, o tla nyahama pelo. Baiseraele bohle baa tseba hore ntat'ao ke mohlabani, le hore banna bao a nang le bona ke bahale.
11“'Na ke u eletsa hore u khōbōkanye Baiseraele bohle, ho tloha Dane ho ea fihla Beeresheba, e be letšoele le lengata joaloka lehlabathe lebōpong le leoatle; ebe uena ka sebele sa hao ua futuha. 12Joale re tla mo futuhela hohle moo re tla mo fumana teng, re mo oele holimo joaloka phōka ha e lala holim'a lefatše. Eena le banna bohle bao a nang le bona ha ho ea tla phonyoha. 13Haeba a ka etsa sealō ho ea kena motseng, Baiseraele bohle ba tla tlisa mehala, 'me ka eona re hulele motse oo ka nōkeng, ho fihlela ho se lejoe le le leng la motse oo le setseng.”
14Eaba Abosalome le banna bohle ba Iseraele, ba re: “Keletso ena ea Hushai oa Moareke e ntle ho feta keletso ea Ahitofele.” Morena o ne a rerile hore keletso e ntle ea Ahitofele e nyōpe, e le hore Morena a tle a lihele koluoa holim'a Abosalome.
Davida oa eletsoa, 'me oa phonyoha
15Joale Hushai a re ho bo-Sadoke le Abiatare, e leng baprista: “Ahitofele o ile a eletsa Abosalome le baholo ba Iseraele tjena le tjena, empa 'na ke ile ka mo eletsa tjena le tjena. 16Ka baka lena he, rōmelang molaetsa ho Davida ka potlako, le 'molelle, le re: ‘Bosiung bona bona u se ke ua ba ua robaletsa liphuleng tsa lehoatata, u mpe u tšelele kamose ho noka ea Jorodane, esere khosi le batho bohle bao e nang le bona ba timetsoa.’ ”
17Bo-Jonathane le Ahimase ba ne ba ee ba ipate pel'a Seliba sa Rogele. Lekhabunyane le ne le ee le ee, le e'o ba bolella litaba, 'me le bona ba ne ba ee ba ee, ba e'o tsebisa khosi, hobane ba ne ba sa tšoanela ho bonoa ba kena motseng. 18Empa moshanyana a ba bona, 'me a bolella Abosalome. Bobeli ba bona ba tloha ka lehlapha-hlapha, ba fihla tlung ea monna e mong, mane Bahurime. Lebaleng la ntlo ea monna eo ho ne ho e-na le sekoti, 'me ba theohela ka ho sona. 19Mosali a nka lesela, a le ala holim'a molomo oa sekoti, eaba o aneha koro e tutsoeng holim'a lona, hore ho se ke ha bonahala letho.
20Joale bahlanka ba Abosalome ba kena ka tlung ea mosali eo, ba re: “Bo-Ahimase le Jonathane ba kae?”
Mosali a re ho bona: “Ba se ba tšetse nōka ea Jorodane.” Ha ba se ba batlile, 'me ba sa ba fumana, ba khutlela Jerusalema.
21Eare ha bao ba se ba tsamaile, bo-Ahimase le Jonathane ba tsoa ka sekoting, ba tsamaea, ba ea bolella khosi Davida, ba re ho eena: “Ema, u tšele nōka ka potlako, hobane Ahitofele o le lōhetse mano tjena le tjena.” 22Davida le batho bohle ba neng ba e-na le eena ba tsamaea, ba tšela Jorodane. Ha mafube a hlaha, ho ne ho se le ea mong ea e-s'ong ho ka a tšela Jorodane.
23Ha Ahitofele a bona hore ha ho uoe ka keletso ea hae, a qhaneha tonki ea hae, a tsamaea, a ipoella tlung ea hae, motseng oa habo. Ha a se a laile ba lelapa la hae, a ikhama, a shoa, 'me a epeloa lebitleng la ntat'ae.
24Ha Abosalome le banna bohle ba Baiseraele, ba neng ba e-na le eena, ba tšela Jorodane, Davida o ne a se a fihlile Mahanaime. 25Abosalome a bea Amasa litulong tsa Joabe, hore e be molaoli oa mabōtho. Amasa e ne e le mora oa monna oa Moishemaele, ea neng a bitsoa Jitera. 'M'ae e ne e le Abikale, morali oa Nahashe, e leng moena oa Seruea, 'm'a Joabe. 26Bo-Abosalome le Baiseraele ba hloma naheng ea Gileade.
27Ha Davida a fihla Mahanaime a khahlanyetsoa ke Shobi, mora oa Nahashe, ea tsoang motseng oa Baamone oa Raba, le Makiri, mora oa Amiele oa Lo-Dabare, le Barasilai oa Mogileade ea tsoang Rogeleme. 28Ba tlisa mealo, le likotlolo, le lipitsana tsa letsopa, le koro, le harese, le phofo, le sebèra, le linaoa, le lierekisi, le lipabi, 29le mahe a linotši, le mafi, le sereleli, le likhutšoane, le lipholo; tsena ba li nea Davida, le batho bao a neng a e-na le bona, hore ba je, hobane ba ne ba re: “Batho bana ba lapile, ba khathetse, 'me ba nyoriloe mona lehoatateng.”
