Baapostola ba tšepisoa Moea o Halalelang
1Theofile ea khabane, bukeng ea ka ea pele ke ngotse tsohle tseo Jesu a ileng a li etsa le ho li ruta ho tloha qalong, 2ho fihlela ka letsatsi leo a neng a nyolleloe leholimong ka lona, kamora' hoba, ka matla a Moea o Halalelang, a laele baapostola bao a neng a ba khethe. 3Kamora' tlhōkōfatso ea hae, o ile a iponahatsa ho bona a phela, ka bopaki bo bongata, ba 'nete; ba 'mona ka matsatsi a mashome a mane, a ntse a bua ka tsa 'Muso oa Molimo. 4Eare ha a e-na le bona, a ba laela, a re: “Le se ke la ba la tloha Jerusalema, le mpe le emele seo le se tšepisitsoeng ke Ntate, seo le se utloileng ka 'na. 5Johanne o ne a kolobetsa ka metsi, empa lōna le tla kolobetsoa ka Moea o Halalelang ho e-s'o fete matsatsi a mangata.”
Jesu o nyolohela leholimong
6Eare ha ba phuthehile, ba 'motsa, ba re: “Morena, na ka nako ee u tla boela u tsosetsa Baiseraele borena?”
7A re ho bona: “Ha lea tšoanela ho tseba linako kapa mehla e taolong ea Ntate, 8empa le tla amohela matla ha Moea o Halalelang o se o theohetse holim'a lōna. Le tla ba lipaki tsa ka Jerusalema, le Judea eohle, le Samaria, le ho ea fihla lipheletsong tsa lefatše.”
9Eare hoba a bue tsena, a nyolleloa holimo ba ntse ba mo shebile, 'me leru la mo tlosa mahlong a bona.
10Eare ba sa ntse ba talimile leholimong ha a ntse a nyoloha, bonang, banna ba babeli, ba liaparo li tšoeu, ba ema pel'a bona. 11Eaba ba re: “Banna ba Galelea, le emetse'ng le shebile leholimong? Jesu enoa ea nyolletsoeng leholimong, a tloha har'a lōna, o tla boela a khutla ka mokhoa oo le 'moneng a nyolohela leholimong ka oona.”
Ho khethoa mohlahlami oa Judase
12Eaba ba theoha thabeng e bitsoang Thaba ea Mehloaare, e haufi le Jerusalema, ba khutlela Jerusalema, e leng leeto le lekanang le la letsatsi la Sabatha. 13Ha ba se ba kene teng, ba nyolohela ka kamoreng e kaholimo, moo Petrose, le Johanne, le Jakobo, le Andrease, le Filipi, le Thomase, le Baretholome, le Matheu, le Jakobo mora oa Alefiose, le Simone Mochesehi, le Judase mora oa Jakobo, ba neng ba emisitse teng. 14Bana kaofela, ba e-na le basali, le Maria 'm'a Jesu, le bana babo Jesu, ba tiisetsa thapelong ka maikutlo a le mang.
15Matsatsing ao Petrose a ema har'a balumeli ba ka bang lekholo le mashome e mabeli ka palo, a re: 16“Banna ba heso, e ne eka khona ho phethahale Mangolo a neng a boleloe e sa le pele ke Moea o Halalelang, ka molomo oa Davida, ha a ne a bua ka Judase ea neng a etelle pele ba neng ba tšoare Jesu. 17E ne e le e mong oa rōna, 'me a e-na le kabelo tšebeletsong ena.”
18Eaba Judase eo o reka tšimo ka moputso oa bokhopo ba hae, 'me eare hoba a tabane fatše moo, mpa ea hae ea phatloha ka lehare, mala a petletseha. 19Baahi bohle ba Jerusalema ba tseba taba ena, 'me ka puo ea bona tšimo eo ba e bitsa Akeledama, e leng ho re: Tšimo ea Mali.
20“Bukeng ea Lipesalema, ho ngotsoe ho thoe:
“ ‘Leaho la bona le ke le fetohe lesupi,
ho se be motho
metlotloaneng ea bona.’
“Hape ho thoe:
“ ‘E mong a nke mosebetsi oa hae.’
21“Ka baka lena eka khona hore har'a banna ba 'nileng ba tsamaea le rōna ka nako eohle, eo Morena Jesu a neng a ntse a e-na le rōna ka eona, 22ho tloha ha Johanne a kolobetsa, ho fihlela ka letsatsi leo Jesu a neng a tlosoe ho rōna, a nyolleloa leholimong ka lona, e mong oa bona e be paki ea tsoho ea hae 'moho le rōna.”
23Ba thonya ba babeli: Josefa ea bitsoang Barasabase kapa Jusetuse, le Matiase. 24Ba rapela, ba re: “Uena Morena, u tsebang lipelo tsa bohle, ak'u supe hore na ho ba babeli bana u khethile ofe, 25hore e be mohlahlami tšebeletsong ena ea boapostola, eo Judase a e furaletseng, a ea sebakeng se mo lokelang.” 26Ba khetha ka lōtho, la ntša Matiase, eaba o balelloa le baapostola ba leshome le motso o mong.
