Petrose le Kornele
1Monna e mong o ne a le teng Sesaria, ea bitsoang Kornele, e le molaoli oa ba lekholo lebōthong le bitsoang la Italia. 2E ne e le morapeli ea tšabang Molimo, eena le lelapa la hae lohle, a etsetsa sechaba sa Bajuda lithuso tse ngata, a rapela Molimo kamehla. 3Ha e batla e e-ba hora ea boraro motšeare oa mantsiboea, a bona ponong, ka mokhoa o hlakileng, lengeloi la Molimo le kena ka ho eena, le re: “Kornele!”
4A le talima, a tšoha, 'me a re: “Ke'ng, Morena?”
La re ho eena: “Lithapelo le lithuso tsa hao ho mafutsana li amohelehile ho Molimo, 'me o u hopotse. 5Joale rōmela banna Jopo, u bitse Simone ea bitsoang Petrose; 6ke moeti oa motho e mong, ea bitsoang Simone, sesuhi sa matlalo, ea nang le ntlo pel'a leoatle.”
7Eare hoba lengeloi le buang le eena le tlohe, a bitsa bahlanka ba hae ba babeli le mohlabani e mong oa ba mo lebelang, ea hlomphang Molimo, 8a ba hlalosetsa tsohle tse etsahetseng, a nt'o ba rōma Jopo.
9Ka la hosasane, ha bao ba ntse ba le tseleng, 'me ba se ba atametse motse, Petrose a hloella kaholim'a ntlo ho ea rapela; e ne e ka ba har'a mpa ea motšeare. 10A lapa, a lakatsa ho ja. Eare ha ho ntse ho lokisoa lijo, a ba le pono. 11A bona leholimo le bulehile, 'me ho theoha ntho e 'ngoe e kang lesela le leholo, le lepelletsoang fatše le tšoeroe ka liqola tse 'ne. 12Ka ho lona ho ne ho e-na le liphoofolo tsohle tse maoto-mane, lihahabi tsa lefatše le linonyana tse fofang. 13Lentsoe la re ho eena: “Petrose, ema, u hlabe, u je!”
14Empa Petrose a re: “Che, le khale, Morena! Ha ke e-s'o ka ke e-ja letho le ilehang, le sa hloekang.”
15Lentsoe la bua le eena khetlo la bobeli, la re: “Tseo Molimo a li hloekitseng, uena u se ke ua re lia ileha.”
16Hona ha etsahala ka makhetlo a mararo, 'me hang-hang ntho eo ea nkeloa hape leholimong.
17Eare ha Petrose a ntse a ipotsa hore na pono eo a e boneng e bolela'ng, banna ba rōmiloeng ke Kornele, hoba ba batle, ba botse hore na ha Simone ke kae, ba fihla monyako. 18Ba hōoeletsa, ba botsa hore na ho na le moeti ea bitsoang Simone Petrose moo.
19Ha Petrose a ntse a nahana ka pono eo, Moea oa re ho eena: “Bona, banna ba babeli baa u batla. 20Ema he, u theohe, u ee le bona u sa qea-qee, hobane ba rōmiloe ke 'na.”
21Petrose a theohela ho banna bao, a re: “Ke 'na eo le 'matlang! Lebaka leo le tlileng ka lona ke lefe?”
22Ba re: “Molaoli oa lebōtho la ba lekholo, Kornele, monna ea lokileng, ea tšabang Molimo, ea pakoang ke sechaba sohle sa Bajuda, o lemositsoe ke lengeloi le halalelang, hore a u bitsetse ha hae, a tle a utloe seo u tla 'molella sona.” 23Eare hoba a re ba kene, a ba amohela.
Ka la hosasane a itokisa, a ea le bona, 'me balumeli ba bang ba Jopo ba mo felehetsa. 24Ka le hlahlamang a kena Sesaria. Kornele o ne a ba lebeletse, a bitsitse bang ka eena le metsoalle ea hae ea hlooho ea khomo. 25Eare ha Petrose a fihla, Kornele a mo khahlanyetsa, a itihela maotong a hae, a khumama. 26Empa Petrose a mo emisa, a re: “Ema; le 'na ke motho.”
27Petrose a kena ha Kornele a ntse a buisana le eena, 'me a fumana ho phuthehile batho ba bangata. 28A re ho bona: “Ha ke re le tseba kamoo ho sa lumellehang kateng hore monna oa Mojuda a tloaelane le molichaba, kapa a mo chakele? Empa 'na Molimo o mpontšitse hore ha ho motho ea ilehang kapa ea sa hloekang. 29Ka baka leo, ke tlile ke se na pelaelo ha ke bitsoa. Ha ho le joalo, ke botsa hore na le mpitselitse'ng?”
30Kornele a re: “Maobeng, ha ke ne ke ntse ke rapela ka tlung ea ka, ka nako e ka bang eona ena, e leng hora ea boraro motšeare oa mantsiboea, monna ea apereng seaparo se halimang, a ema kapele ho 'na. 31Eaba o re: ‘Kornele, thapelo ea hao e utloiloe, 'me lithuso tsa hao ho mafutsana li hopotsoe ke Molimo. 32Ka baka leo, rōmela Jopo, u bitse Simone ea bitsoang Petrose: ke moeti ha Simone, sesuhi sa matlalo, ea ahileng pel'a leoatle.’ 33Ka hona ke ile ka rōmela ho uena ka potlako, 'me u entse hantle ha u tlile. Joale rōna bohle re teng mona pel'a Molimo, ho utloa tseo u li laetsoeng ke Morena.”
Puo ea Petrose ha Kornele
34Petrose a bua, a re: “Kannete kea hlokomela hore Molimo ha a ee ka tšobotsi, 35empa, lichabeng tsohle, ea mo tšabang, ea etsang toka, oa amoheleha ho eena. 36O ile a rōmela lentsoe la hae ho bana ba Iseraele ka ho bolela molaetsa o molemo oa khotso ka Jesu Kreste, eo e leng Morena oa bohle. 37Le tseba se etsahetseng Judea eohle, ho qala Galelea, kamora' kolobetso e ileng ea phatlalatsoa ke Johanne; 38kamoo Molimo a neng a tlotse Jesu oa Nasaretha kateng, ka Moea o Halalelang le ka matla. Jesu a tsamaea hohle a ntse a etsa tse molemo, a folisa ba neng ba hateletsoe ke Diabolosi, hobane Molimo o ne a e-na le eena.
39“Re lipaki tsa lintho tsohle tseo a ileng a li etsa naheng ea Bajuda le Jerusalema; eena eo ba 'molaileng ka ho mo thakhisa sefapanong. 40Empa Molimo o ile a mo tsosa bafung ka letsatsi la boraro, 'me a etsa hore a iponahatse, 41e seng ho batho bohle, empa ho lipaki tse khethiloeng ke Molimo e sa le pele, e leng rōna ba ileng ba e-ja, ba e-noa le eena kamora' ho tsoha ha hae bafung. 42O ile a re laela ho phatlalletsa sechaba le ho paka hore ke ea beiloeng ke Molimo ho ba moahlōli oa ba phelang le ba shoeleng. 43Baporofeta bohle baa mo paka, ba re e mong le e mong ea lumelang ho eena o tla amohela tšoarelo ea libe ka lebitso la hae.”
Balichaba ba amohela Moea o Halalelang
44Eare Petrose a sa ntse a bua mantsoe ana, Moea o Halalelang oa theohela holim'a bohle ba mametseng lentsoe. 45Balumeli bohle ba bōlōtseng, e leng Bajuda, ba felehelitseng Petrose, ba hlolloa ha mpho ea Moea o Halalelang e theoleloa le ho balichaba, 46hobane ba ne ba utloa ba bua lipuo-puo, ba tlotlisa Molimo.
Joale Petrose a re: 47“Na ho ka ba teng ea ka thibelang hore batho baa, ba amohetseng Moea o Halalelang joaloka rōna, ba kolobetsoe ka metsi na?” 48A laela hore ba kolobetsoe ka lebitso la Jesu Kreste. Eaba ba mo kōpa hore a hlole le bona matsatsi a se makae.
