Jakobo oa bolaoa, Petrose o kenngoa chankaneng
1Ka nako eo, khosi Heroda a tšoara batho ba bang ba kereke, ho ba hlōkōfatsa. 2A bolaea Jakobo ngoan'abo Johanne ka sabole. 3Eare ha a bona hore taba eo e khahlile Bajuda, a eketsa ka ho tšoara Petrose. E ne e le matsatsi a mokete oa bohobe bo sa lomosoang. 4Hoba a mo tšoare, a mo kenya chankaneng, a mo neela lihlopha tse 'ne tsa bahlabani ba bane sehlopheng ka seng, hore ba mo lebele, a hopotse ho mo hlahisa kapele ho sechaba kamora' Paseka.
5Ka baka leo, Petrose a bōlōkoa chankaneng, empa kereke e ne e mo rapella ho Molimo e tiile.
Petrose o lopolloa chankaneng
6Bosiung boo Heroda a neng a tla tsoha a mo hlahisa ho sechaba ka bona, Petrose o ne a robetse pakeng tsa bahlabani ba babeli, a tlamiloe ka mahlaahlela a mabeli, 'me balebeli ba lebetse monyako oa chankana. 7Hang-hang lengeloi la Morena la ema moo, 'me leseli la khanya ka chankaneng. Lengeloi la sisinya Petrose lehlakoreng, la mo tsosa, la re: “Tsoha kapele!” Mahlaahlela a matsohong a hae a oa.
8Lengeloi la re ho eena: “Tena, u roale meqathatso ea hao.” A etsa joalo. La re ho eena hape: “Apara seaparo sa hao, u ntatele.” 9A tsoa, a le latela, a sa tsebe hore se etsoang ke lengeloi ke 'nete: A mpa a lekanya hore o bona pono. 10Eare hoba ba fete molebeli oa pele le oa bobeli, ba fihla monyakong oa tšepe o tsoelang motseng; oa ipula, eaba baa tsoa, ba theosa ka seterata se le seng, 'me hang-hang lengeloi la tloha ho eena.
11Petrose ha a re qoatsi! Eaba o re: “Joale ke tseba kannete hore Morena o rōmile lengeloi la hae, 'me o 'namoletse matsohong a Heroda le ho tsohle tse neng li lebeletsoe ke sechaba sa Bajuda.”
12Hoba a elelloe joalo, a ea tlung ea Maria, 'm'a Johanne ea bitsoang Mareka, moo ba bangata ba neng ba phuthehetse teng, ba rapela. 13Ha a kokota lemating la mathule, lekhabunyane le bitsoang Roda la atamela, ho tla mamela. 14La tseba lentsoe la Petrose, 'me ka baka la thabo, la se ke la bula lemati, la mpa la mathela ka tlung, la ba tsebisa hore Petrose o eme mathuleng.
15Empa ba re ho eena: “Ua hlanya!” Eena a tiisa ka matla hore ho joalo. Eaba ba re: “Ke lengeloi la hae.”
16Empa Petrose a 'na a kokota; ha ba bula, ba 'mona, 'me ba makala. 17A ba phōka ka letsoho hore ba khutse, a ba phetela kamoo Morena a mo ntšitseng chankaneng kateng, a ba a re: “Tsebisang Jakobo le balumeli litaba tsena.” A tsoa, a ea sebakeng se seng.
18Eare ha bo e-sa, ha e-ba le moferefere o se kaa ka letho har'a bahlabani, ba re na hantle-ntle ho etsahetse'ng ka Petrose. 19Ha Heroda a 'matla, 'me a sa mo fumane, a botsisisa balebeli, a nt'o laela hore ba bolaoe. Eaba Heroda o theoha Judea, o ea Sesaria, 'me a lula teng.
Lefu la Heroda
20Joale Heroda o ne a halefetse ba Tire le Sidone haholo. Ba tla ho eena ba le ntsoeleng, 'me hoba ba qekise Belasetose, molisa oa ntlo ea khosi ea ho robala, ba kōpa khotso, hobane naha ea bona e ne e phelisoa ke ea khosi.
21Ka letsatsi le khethiloeng, Heroda a apara seaparo sa hae sa bokhosi, a lula setulong sa hae, a bua le batho. 22Letšoele la hōoa, la re: “Lentsoe lena ke la molimo, e seng la motho!” 23Hang-hang lengeloi la Morena la mo otla, kahobane a sa ka a hlompha Molimo, 'me a jeoa ke libōkō, a shoa.
24Empa lentsoe la Molimo la ata, la anafala.
25Ha Baranabase le Saule ba se ba phethile mosebetsi oa bona, ba khutla Jerusalema, ba tla le Johanne ea bitsoang Mareka.
