Paulosi sehlekehlekeng sa Maleta
1Ha re se re phonyohile, ra utloa hore sehlekehleke seo se bitsoa Maleta. 2Baahi ba teng ba re bontša mosa o moholo. Ka baka la pula e neng e e-na, le ka baka la mohatsela, ba besa mollo, ba re amohela bohle. 3Eare hoba Paulosi a bōkelle leqhaoana la patsi, a le akhele mollong, nōha e ntšoang ke mofuthu ea ithatela letsohong la hae. 4Ha baahi ba bona nōha eo e leketla letsohong la hae, ba bolellana, ba re: “Ruri motho enoa ke 'molai, eo le hoja a phonyohile leoatleng, ka toka a ke keng a lumelloa ho phela.” 5Empa Paulosi a hlōhlōrela nōha mollong, 'me a se ke a tsoa kotsi. 6Ba ne ba lebeletse hore o se a le lekhatheng la ho ruruha, kapa la ho otlana fatše hang-hang, 'me a shoe. Empa hoba ba lebelle halelele, 'me ba se ke ba bona letho le phoso le etsahalang ho eena, ba fetola maikutlo a bona, ba re: “Ke molimo!”
7Joale, hona likarolong tse haufi le sebaka seo, ho ne ho e-na le masimo a morenana oa moo, ea bitsoang Poboleose. A re amohela ka mosa, a re bōlōka matsatsi a mararo re le baeti ba hae. 8Joale ha etsahala hore ntat'a Poboleose a robale fatše, a tšoeroe ke feberu le letšōllo le lefubelu. Paulosi a kena, a rapela, a 'mea matsoho, 'me a mo folisa. 9Eare hoba hona ho etsahale, le bakuli ba bang ba sehlekehlekeng ba tla, 'me ba folisoa. 10Bao le bona ba re hlompha ka hlompho e kholo, 'me mohla re tsamaeng ba re etsetsa mofao.
Paulosi o fihla Roma
11Kamora' khoeli tse tharo ra kena ka sekepeng se tsoang Alekesanderia, se neng se ile sa tšabela mariha sehlekehlekeng seo. Sekepe seo se ne se e-na le letšoao la melimo ea Bagerike ea Mafahla. 12Eare ha re fihla Sirakuse, ra hlola teng matsatsi a mararo. 13Ho tloha moo ra tsoela pele, ra ea fihla Regione. Kamora' letsatsi le le leng moea oa boroa oa foka, 'me ka letsatsi la boraro ra fihla Poteole. 14Teng ra fumana balumeli. Ba re rapela hore re hlole matsatsi a supileng le bona. Qetellong ra fihla Roma. 15Kamorao ho moo, eare hoba balumeli ba leng Roma ba utloele tsa rōna, ba tla ho re khahlanyetsa lebaleng la motse oa Apiuse, le moo ho thoeng ke Lihoteleng tse Tharo, 'me eare ha Paulosi a ba bona, a leboha Molimo, a khoba matšoafo. 16Ha re fihla Roma, Paulosi a lumelloa ho lula a le mong le mohlabani ea mo lebelang.
Paulosi o ruta motseng oa Roma
17Ha etsahala hore kamora' matsatsi a mararo, Paulosi a meme baetapele ba Bajuda. Ha ba se ba kopane a re ho bona: “Banna ba heso, le hoja ke sa etsa se hananang le sechaba kapa le meetlo ea boholo-holo, ke motšoaruoa ea tsoang Jerusalema, ea neetsoeng matsohong a Baroma. 18Hoba ba mpotsisise, Baroma ba ne ba rata ho ntōkōlla, hobane ho ne ho se lebaka la hore ke bolaoe. 19Ha Bajuda ba hanyetsa taba ena, ke ile ka tlameha ho ipiletsa ho Sesare, feela e se hobane ke rata ho qōsa sechaba sa heso ka letho. 20Ka baka lena he, ke le bitsitse ho le bona le ho buisana le lōna, hobane ke ka baka la tšepo ea Iseraele ke tlamiloeng ka mahlaahlela ana.”
21Eaba ba re ho eena: “Ha re e-s'o ka re amohela mangolo a tsoang Judea a buang ka uena; hape ha ho e-s'o be le ea mong oa balumeli ea kileng a fihla a bolela kapa a bua se sebe ka uena. 22Empa re fumana ho lokela ho utloa tseo uena u li hopolang, hobane seo re se tsebang ke hore ha e le mokha ona, o hanyetsoa hohle.”
23Ha ba se ba mo khethetse letsatsi, ba bangata ba tla ho eena, moo a lulang teng. A ba hlalosetsa, a paka tsa 'Muso oa Molimo. Ho tloha hoseng ho fihlela mantsiboea a leka ho ba kholisa ka tsa Jesu, a ipapisitse le Molao oa Moshe le Baporofeta. 24Ba bang ba kholisoa ke tseo a li buileng, empa ba bang ba se ke ba lumela. 25Eare ha ba sa lumellane, ba qhalana, kamora' hoba Paulosi a bue hape, a re: “Moea o Halalelang o buile hantle ho bo-ntat'a lōna, ka moporofeta Esaea, 26oa re:
“ ‘Tsamaea,
u e'o bolella sechaba sena, u re:
Ho utloa le tla utloa,
empa le ke ke la utloisisa;
ho sheba le tla sheba,
empa le ke ke la bona;
27hobane pelo ea sechaba sena
e thatafetse,
se thibane litsebe,
se itutubalitse;
esere mohlomong
sa bona ka mahlo,
sa utloa ka litsebe tsa sona,
sa utloisisa ka pelo tsa sona,
sa sokoloha,
eaba kea se folisa.’ ”
28“Ka baka lena tsebang hore pholoho ena e tsoang ho Molimo e fetiselitsoe ho balichaba; bona ba tla mamela.” 29Eare hoba a bue mantsoe ana, Bajuda ba tsamaea ba phehisane khang ea letoatoa.
30Paulosi a hlola moo lemo tse peli tse tletseng, a le tlung eo a neng a e hirile, 'me a amohela bohle ba tlang ho eena. 31A phatlalatsa tsa 'Muso oa Molimo, a ruta tsa Morena Jesu Kreste ka sebete, ho se na thibelo.
