1Tsena ke lipolelo tsa Amose, e mong oa balisa ba linku ba Tekōoa. Ke lipolelo tseo a ileng a li senoleloa mabapa le Iseraele. E ne e le mehleng ea puso ea Usiea, khosi ea Juda, le mehleng ea puso ea Jeroboame, mora oa Jehōoashe, khosi ea Iseraele, e le ha ho setse lilemo tse peli tšisinyeho ea lefatše e e-ba teng.
2Eaba Amose o re:
“Morena o puruma a le Sione,
O thoathoaretsa a le Jerusalema;
makhulo a balisa aa omella,
tlhōrō ea Karamele eona ea pona.”
Molimo o ahlōla balichaba
Kahlōlo ea Damaseka
3Morena o bua tjena:
“Baahi ba Damaseka ba ntšitetsoe
ka makhetlo a se na palo,
kahoo ha nka ke ka ba tšoarela;
ba silitse Gileade ka lilei,
ka lilei tse nang le meno a tšepe.
4Ntlo ea Hasaele ke tla e chesa,
matlo a likoele tsa Bene-Hadade
ke a timetse.
5Ke tla roba mekoallo
ea khoro tsa Damaseka,
ke timetse ba ahileng
ka Khohlong ea Afene,
le ea tšoereng lere la puso,
puso ea Bete-Edene
baahi ba Arame ba thōpeloe Kire,”
ho rialo Morena.
Kahlōlo ea Filesitiea
6Morena o bua tjena:
“Baahi ba Gasa ba ntšitetsoe
ka makhetlo a se na palo,
kahoo ha nka ke ka ba tšoarela;
ba thōpile sechaba,
ba se thōpa kaofela ha sona,
ba se rekisetsa Baedomo
hore e be makhoba.
7Marako a Gasa ke tla a chesa,
matlo a likoele tsa eona
ke a timetse.
8Ke tla timetsa baahi ba Ashedode,
le ea tšoereng lere la puso,
puso ea Ashekelone;
motse oa Ekerone ke tla o otla,
masalla 'ohle a Bafilesita
ke a timetse,”
ho rialo Morena Molimo.
Kahlōlo ea Tire
9Morena o bua tjena:
“Baahi ba Tire ba ntšitetsoe
ka makhetlo a se na palo,
kahoo ha nka ke ka ba tšoarela;
ba thōpetse sechaba kaofela Edomo,
ba sa llelane letsetse
sa bana ba motho.
10Marako a Tire ke tla a chesa,
matlo a likoele tsa eona
ke a timetse.”
Kahlōlo ea Edomo
11Morena o bua tjena:
“Baahi ba Edomo ba ntšitetsoe
ka makhetlo a se na palo,
kahoo ha nka ke ka ba tšoarela.
Ba manakisitse bana babo bona,
ba ba manakisa ka sabole,
ba ba manakisa ba se na mohau,
ba pheella khalefong ea bona,
bohale ba bona ba tuka malakabe,
ba tuka sa malakabe a sa time.
12Motse oa Temana ke tla a chesa,
matlo a likoele tsa Bosera
ke a timetse.”
Kahlōlo ea Amone
13Morena o bua tjena:
“Baahi ba Amone ba ntšitetsoe
ka makhetlo a se na palo,
kahoo ha nka ke ka ba tšoarela.
Ba tabotse baimana ba Gileade,
ba ba tabola limpa,
ba tle ba atolose meeli ea bona.
14Marako a Raba ke tla a chesa,
matlo a likoele tsa eona ke a timetse,
har'a mokorotlo,
mohl'a tsatsi la ntoa,
har'a leholuotsoana,
mohl'a tsatsi la sefefo.
15Khosi ea Amone e tla thōpuoa,
eona le mahosana a eona kaofela,”
ho rialo Morena.
