Amose o bontšoa litsie
1Sena ke seo Morena Molimo a ileng a mpontša sona: Ha ho se ho hetsoe karolo ea joang, eo e leng ea khosi, joang bo qala ho hlōma hape, Morena a hlahisa boieane ba litsie. 2Ha litsie li kōkōnne naha eohle, ke ile ka hōoeletsa, ka re: “Morena Molimo, hauhela Jakobo hle! A ka phonyoha joang? O sa le monyenyane haholo!”
3Eaba Morena oa hauha, o re:
“Sena se ke ke sa etsahala,”
ho rialo Morena.
Amose o bontšoa mollo
4Sena ke seo Morena a ileng a boela a mpontša sona: Morena Molimo o ne a itokisetsa ho tla ahlōla ka mollo, 'me mollo o ile oa pshesa maliba a maoatle, oa chesa naha. 5Ke ha ke tla hōoeletsa, ke re: “Oho, Morena Molimo, ak'u khaotse hle! Jakobo a ka phonyoha joang? O sa le monyenyane haholo!”
6Eaba Morena Molimo oa hauha, o re:
“Le sena se ke ke sa etsahala,”
ho rialo Morena Molimo.
Amose o bontšoa khoele e lekanyang
7Morena a boela a mpontša sena: Morena o ne a eme pel'a lerako le hahiloeng hantle, le otlolohileng joaloka khoele e lekanyang, e neng e le letsohong la hae. 8Morena a mpotsa, a re: “Amose, u bona'ng?”
Ka araba, ka re: “Ke bona khoele e lekanyang.”
Morena a re: “Bona! Ke tlil'o bea khoele e lekanyang har'a sechaba sa ka sa Iseraele; ha nka ke ka hlola ke se hauhela.
9“Libaka tsa borapeli tsa Isaka,
li tla heletsoa,
le lihalalelo tsa Iseraele
li fetoloe masupi;
ke tla futuhela ntlo ea Jeroboame,
ke e futuhele ka sabole ea ka.”
Amose le Amasiea
10Eaba Amasiea, moprista oa Bethele, o rōmela ho Jeroboame, khosi ea Iseraele, o re: “Amose o ntse a u rèrèla bora hona mona har'a bana ba Iseraele. Naha ha e ka ke ea mamella puo tsena tsa hae. 11Amose o bua tjena:
“ ‘Jeroboame o tla bolaoa,
a bolaoe ka sabole,
ruri Baiseraele ba tla thōpuoa,
ba thōpeloe hōle,
hōle le naha ea habo bona.’ ”
12Eaba Amasiea o bua ho Amose, o re: “Tloha mona, senohe tooe! Khutlela naheng ea Juda koana! Tsamaea u e'o porofetela teng, ba tle ba u ngoathele! 13U se hlole u porofetela mona Bethele, hobane sena ke sehalalelo sa khosi le tempele ea 'muso.”
14Amose a araba Amasiea, a re: “Ke ne ke se moporofeta kapa mora oa moporofeta, empa ke ne ke le molisana, ke bile ke hlokomela lifate tsa feiee. 15Joale Morena a mpitsa ke ntse ke alositse, a re ho 'na: ‘E-ea, u e'o porofetela sechaba sa ka sa Iseraele.’ 16Joale he, utloa seo Morena a se bolelang. Uena u re:
“ ‘U se ke ua porofetela Iseraele,
thutong ea hao
u se k'a nyatsa ntlo ea Isaka.’ ”
17“Ka baka leo, Morena o bua tjena:
“ ‘Mohats'a hao
o tla fetoha seotsoa har'a motse,
bara le barali ba hao
ba bolaoe ka sabole.
Naha ea heno e tla aroleloa basele,
uena u e'o shoela naheng,
naheng e silafetseng.
Ruri Baiseraele ba tla thōpuoa,
ba thōpeloe hōle,
hōle le naha ea habo bona.’ ”
