Daniele le baprista ba Bele
1Hoba khosi Astieagese a orohele ho bo-ntat'ae, Siruse oa Leperesiea a amohela 'muso oa hae. 2Daniele e ne e le lehlahana la khosi 'me e ne e le motšepuoa e moholo oa khosi har'a metsoalle eohle ea eona.
3Joale Bababilona ba ne ba e-na le setšoantšo sa molimo oa bohata o bitsoang Bele, 'me ka matsatsi ba ne ba fana ho oona ka merula e leshome le 'metso e 'meli ea phofo ea koro e thumisehileng, le linku tse mashome a mane, le merula e tšeletseng ea veine. 4Khosi e ne e o hlompha, 'me e e-ea ka matsatsi ho o khumamela. Ha e le Daniele, eena o ne a khumamela Molimo oa hae.
5Eaba khosi e re ho eena: “Ke'ng u sa khumameleng Bele?” A araba, a re: “Ke hobane ha ke hlonephe melimo ea bohata e entsoeng ke motho, haese Molimo ea phelang ea bopileng leholimo le lefatše, 'me ea busang libopuoa tsohle.”
6Khosi ea re: “Na ha u hopole hore Bele ke molimo o phelang, ha u bone hore na o ja le ho noa hakaakang ka matsatsi?” 7Eaba Daniele oa tšeha 'me a re: “U se ke ua thetsoa, oho khosi; hobane hoo ke letsopa kahare, ke lethose kantle, 'me le kamohla ntho eo ha e e-s'o ka ba e e-ja leha e le ho noa letho.”
8Joale khosi ea halefa, 'me ea bitsa baprista ba Bele, ea re ho bona: “Haeba le sa mpolelle hore ana ke mang ea jang lijo tsena, le tla shoa; 9empa haeba le paka hore Bele oa li ja, Daniele o tla shoa, hobane o nyefotse Bele.” Daniele a re ho khosi: “A ho etsoe joalokaha u boletse.” 10Baprista ba Bele ba ne ba le mashome a supileng, ka ntle ho basali le bana ba bona. Joale khosi ea kena le Daniele ka tempeleng ea Bele.
11Baprista ba Bele ba re: “Bona, re tla tsoa. Joale uena ka sebele, khosi, u tla bea lijo, u b'u tsoake le ho bea veine; u nt'o koala lemati le ho le notlela ka ho le tiisa ka letšoao la hao. 12Ha u khutla hoseng 'me u sa fumane tsohle li jeloe ke Bele, re tla shoa; ho seng joalo, ho tla shoa Daniele ea re etselletsang.”
13Ba ne ba se na motsoto, hobane ka tlas'a tafole ba ne ba hlophile tsela ea ho kena e patiloeng, eo ba neng ba tloaetse ho kena ka eona nako le nako le ho ja lijo kaofela.
14Eare hoba ba tsoele kantle, khosi ea beela Bele lijo. Eaba joale Daniele o laela bahlanka ba hae ho tlisa molora, 'me ba o sefela kahohle ka har'a tempele, moo khosi e inotši e leng teng. Eaba baa tsoa, 'me ba koala lemati, ba ba ba le tšoaea ka letšoao la khosi; ba nt'o ikela.
15Bosiung boo baprista ba tla le basali le bana ba bona, joalokaha ba ne ba tloaetse ho etsa joalo, 'me ba e-ja le ho noa tsohle. 16E sa le hoseng khosi ea tsoha, 'me ea tla le Daniele.
17Khosi ea re; “Ua bona, matšoao ha aa rojoa, Daniele?” Daniele a araba, a re: “Ha aa rojoa, khosi.” 18Eare hang hoba lemati le buloe, khosi ea sheba tafoleng, 'me ea hooa ka lentsoe le phefa, e re: “U moholo, oho Bele, 'me ho uena ha ho thetso ea letho!”
19Daniele a tšeha, 'me a thibela khosi ho kena kahare, a re: “Ak'u shebe fatše, 'me u bone hore na mehato ena ke ea mang.”
20Khosi ea re: “Ke bona mehato ea banna le basali le bana.” 21Eaba khosi ea halefa, 'me ea tšoara baprista le basali ba bona. Ba e bontša mamati a patehileng, oa ka 'ona ba neng ba tloaetse ho kena le ho ja se beiloeng tafoleng. 22Ka baka lena, khosi ea ba bolaea, 'me ea neelana ka Bele ho Daniele, ea ileng a e ripitla le tempele ea eona.
Daniele o bolaea noha
23Ho ne ho le teng hape noha e kholo, eo Bababilona ba neng ba e hlonepha. 24Khosi ea re ho Daniele: “U ke ke ua latola hore hona ke molimo o phelang; ka baka lena u o khumamele.”
25Daniele a re: “Ke tla khumamela Morena, Molimo oa ka, hobane ke eena Molimo ea phelang. 26Empa, ha u ka ntumella, oho khosi, ke tla bolaea noha ka ntle ho sabole kapa koto.” Khosi ea re: “Ke u fa tumello.”
27Eaba Daniele o nka tiri, mafura le boea, 'me a li belisa 'moho, a etsa lithobela, tseo a ileng a li nea Noha ho li ja. Noha ea li ja, 'me ea qhashoha. Daniele a re: “Bonang seo le 'nileng la se khumamela!”
28Bababilona ha ba utloa hoo, ba halefa haholo, 'me ba rera khosi ba re: “Khosi e s'e fetohile Mojuda, e ripitlile Bele, e bolaile noha, 'me e fenethile baprista.” 29Eare hoba ba tle ho khosi, ba re: “Re neele Daniele, kapa re tla u bolaea, uena le ba ntlo ea hao.”
30Khosi ea bona hore ba e beile morebele, 'me tlas'a qobello a neelana ka Daniele ho bona. 31Ba akhela Daniele ka lemeneng la litau, 'me a ba kamoo matsatsi a tšeletseng. 32Ho ne ho le teng litau tse supileng ka lemeneng, 'me ka matsatsi li ne li fuoa litopo tse peli tsa batho le linku tse peli; empa mohlang oo ha lia ka tsa feptjoa letho, e le hore li tle li harole Daniele.
Daniele o phonyoha lemeneng la litau
33Joale moporofeta Habakuke o ne a le Judea. O ne a ile a apeha moroho, 'me a rathela bohobe ka mokekeng; 'me o ne a ea masimong ho isetsa bakotuli. 34Empa lengeloi la Morena la re ho Habakuke: “Isa lijo tsena ho Daniele Babilona ka lemeneng la litau.”
35Habakuke a re: “Morena, ha ke e-s'o ee Babilona, 'me ha ke tsebe letho ka lemena.”
36Eaba lengeloi la Morena le mo nka ka ntlha ea hlooho, la mo hlothola ka moriri, 'me ka lebelo la moea la 'mea Babilona, holim'a lemena hantle. 37Eaba Habakuke oa hoeletsa, a re: “Daniele, Daniele, amohela lijo tseo Molimo a u romeletseng tsona.”
38Daniele a re: “U nkhopotse, oho Molimo, 'me ha ua ka ua furalla ba u ratang.” 39Eaba Daniele oa ema 'me oa ja, 'me hang lengeloi la busetsa Habakuke ha habo.
40Ka letsatsi la bosupa khosi ea tla ho llela Daniele. Ha e fihla lemeneng, ea talima kahare, 'me Daniele o ne a lutse kateng. 41Khosi ea hooa ka lentsoe le phefa, ea re: “U moholo, oho Morena Molimo oa Daniele, 'me ha ho e mong ka thoko ho uena.” 42Eaba e ntša Daniele lemeneng. Ha e le ba neng ba ile ba leka ho timetsa Daniele, ea ba akhela ka lemeneng 'me ba haroloa hang-hang ke litau mahlong a khosi.
