BAKOLOSE 1

₁'Na Paulosi, moapostola oa Kreste Jesu ka thato ea Molimo, le Timothea ngoan'abo rōna, ₂re lumelisa balumeli ba Kolose, bana babo rōna ba tšepahalang ho Kreste, re re: Mohau le khotso ea Molimo Ntat'a rōna li ke li be le lōna.

₃Kamehla ha re ntse re le rapella, re leboha Molimo, Ntat'a Morena oa rōna Jesu Kreste. ₄Re utloile tsa tumelo ea lōna ho Kreste Jesu, le tsa lerato leo le nang le lona ho balumeli bohle, ₅ka baka la ho tšepa tseo le li bōlōketsoeng maholimong. Le utloile tsa tšepo eo ka lentsoe la 'nete, e leng molaetsa o molemo ₆o le fihletseng. Molaetsa oo o namela lefatšeng lohle, 'me o beha litholoana. O entse joalo le ho lōna, ho tloha mohla le neng le utloa tsa mohau oa Molimo, 'me la fela la utloisisa seo o leng sona. ₇Sena le ile la se rutoa ke Epafarase, molekane oa rōna ea ratehang oa bohlanka, eo e leng mosebeletsi ea tšepahalang oa Kreste, ea lebitsong la rōna. ₈Ke eena ea re tsebisitseng tsa lerato leo Moea o Halalelang o le neileng lona.

₉Ka baka leo, ho tloha mohla re neng re utloa hona, rōna ha rea ka ra khaotsa ho le rapella. Re 'nile ra kōpa Molimo hore a le fe ho tseba thato ea hae, ka ho le nea bohlale bohle le kutloisiso eohle e tsoang ho Moea oa hae. ₁₀Ka tsela ena le tla phela ka mokhoa o tšoanelehang mahlong a Molimo, le mo khahlise linthong tsohle. Le tla atleha mesebetsing eohle e lokileng, 'me le hōle tsebong ea Molimo. ₁₁Le tla matlafatsoa ka mekhoa eohle, ka matla a tsoang tlōtleng ea hae, hore le tle le be le tiisetso le mamello e phethehileng. ₁₂A le ke le leboheng Molimo Ntate ka thabo, eena ea le entseng ba lōkelang ho ba le kabelo lefeng la bahalaleli, leseling. ₁₃O re ntšitse matleng a lefifi, a re fetisetsa 'musong oa Mora oa hae ea ratehang, ₁₄eo ka eena re fumanang topollo le tšoarelo ea libe.

₁₅Kreste ke setšoantšo sa Molimo ea sa bonoeng. Ke eena Letsibolo, ea bileng teng pele ho tsohle tse hloliloeng. ₁₆Ke ka eena Molimo a hlolileng tsohle, maholimong le lefatšeng, tse bonoang le tse sa bonoeng, esita le meea e laolang, leha e le e renang, e busang kapa e okamelang. Tsohle li hloliloe ka eena, 'me li hloletsoe eena. ₁₇Eena o bile teng pele ho tsohle, 'me tsohle li tlamahantsoe ke eena. ₁₈Hape ke eena hlooho ea 'mele, e leng kereke. Ke eena qaleho, ke eena oa pele ea tsohileng bafung, e le hore, linthong tsohle, e tle e be eena oa pele. ₁₉Ho khahlile Molimo hore Kreste a be le bomolimo ka ho tlala, ₂₀le hore, ka Kreste, a boelanye lintho tsohle le eena, leha e le tse lefatšeng kapa tse maholimong, ka ho hloma khotso ka mali a Kreste a tšolohileng sefapanong.

₂₁Pele le lōna le ne le le hōle le Molimo, le le lira tsa hae ka mehopolo ea lōna le ka mesebetsi ea lōna e mebe. ₂₂Empa kajeno Molimo o le boelantse le eena ka lefu la Kreste, ka 'mele oa hae o shoang, e le hore le tsebe ho hlaha pel'a hae le le ba halalelang, ba se nang sekoli, ba hloekileng. ₂₃Feela eka khona le tiisetse tumelong. Le tšoare le tiee, le se khelohe tšepong eo le bileng le eona ha le utloa molaetsa o molemo, o phatlalletsoang libōpuoa tsohle tse tlas'a letsatsi, oo 'na Paulosi ke entsoeng mosebeletsi oa oona.

₂₄Ke thabela ho hlōkōfatsoa ka baka la lōna joale, hobane bothong ba ka ke qetela mahlōkō a saletseng ho ao Kreste a bileng le 'ona ka baka la 'mele oa hae, e leng kereke. ₂₅Ke entsoe mosebeletsi oa kereke, ho ea ka mosebetsi oo Molimo a nkabetseng oona har'a lōna, oa ho le ruta lentsoe la hae ka ho tlala. ₂₆Lentsoe leo ke sephiri se neng se patetsoe melōko e fetileng ho tloha khale, empa kajeno se senoletsoe balumeli ba hae. ₂₇Molimo o ratile ho ba tsebisa menono le tlōtla ea sephiri seo har'a balichaba. Sephiri ke sena: Kreste o ka ho lōna, eo ka eena le nang le tšepo ea tlōtla.

₂₈Ke eena eo re phatlalatsang tsa hae. Re ntse re lemosa batho bohle, 'me re ba ruta bohlale bohle, hore re tle re ba hlahise e le ba phethehileng ho Kreste Jesu. ₂₉Ke sona seo ke se sebeletsang ka thata, seo ke se loanelang ka thuso ea Kreste, ea sebetsang ka matla a hae ka ho 'na.