1Ke rata ha le ka tseba kamoo ke le loanetseng haboima kateng, lōna, le baahi ba Laodisea, le ba bang ba bangata ba sa tsebeng le sefahleho sa ka. 2Ke entse joalo hore lipelo tsa bona li tšelisehe, li kopane 'moho ka lerato, ba tle ba rue tsebo e tletseng, e tlisang kutloisiso ea sephiri sa Molimo, e leng Kreste. 3Ke ho eena Kreste moo matlotlo 'ohle a bohlale le a tsebo a patiloeng teng. 4Ke le bolella tsena e le hore ho se be ea ka le khelosang ka lipuo tse hapang. 5Le hoja ke le sieo ka seqō, ke ntse ke e-na le lōna ka moea, 'me ke thabela ho bona kamoo le itlhophisitseng, le tiileng kateng tumelong ea lōna ho Kreste.
Bophelo bo phethehileng bo fumanoa ka Kreste
6Joale, kaha le amohetse Kreste Jesu e le Morena, phelang 'moho le eena. 7Metso ea bophelo ba lōna e ke e tebe ka ho eena, e be eena mothèo oa bona; le tiee tumelong kamoo le e rutiloeng kateng, 'me teboho ea lōna e khaphatsehe.
8Hlokomelang, esere e mong a le tšoasa, a le thetsa ka mafeela a bohlale ba botho, bo ipapisitseng le meetlo ea batho, boo e leng ba meea e busang lefatše, e seng ba Kreste.
9Bomolimo bohle, ka ho tlala ha bona, bo ahile ho eena, bothong ba hae. 10Ka eena, eo e leng hlooho ea meea eohle e busang, le e okamelang, le neiloe bophelo ka ho tlala. 11Hape ho eena le bōlōlitsoe ka lebōllo leo e seng la batho, empa leo e leng lebōllo la Kreste, le le lokollang matleng a 'mele ona oa botho. 12Ka kolobetso le epetsoe le eena, la ba la tsosoa le eena bafung, ka ho tšepa matla a Molimo ea mo tsositseng bafung.
13Le ne le shoele ka baka la libe tsa lōna, le ne le sa bōlla moeeng, empa Molimo o ile a le phelisa 'moho le Kreste, a le tšoarela litšito tsohle tsa lōna. 14O hlakotse lengolo la molato 'moho le litaelo tsa lona tse neng li re ahlōla, a le khokhothela sefapanong. 15Ka sona meea e busang le e okamelang, ea amohuoa matla a eona ke Kreste; a e hōbōsa, a e kenya mokolokong oa hae oa tlhōlo e le bathōpuoa.
16Joale ho se be ea ka le ahlōlelang tseo le li jang, kapa tseo le li noang, kapa ho bōlōka matsatsi a mekete, kapa a ho thoasa ha khoeli, kapa a Lisabatha. 17Tsena tsohle e ne e le seriti feela sa tse tlang ho tla; hoo e leng ha 'nete ke Kreste. 18Le se ke la hlokisoa moputso oa lōna ke ba ikokobetsang ka mokhoa o fosahetseng, 'me ba rapelang mangeloi, ba reng ba bona lipono, ba ikhōhōmōsang ka lintho tsa lefeela ka baka la menahano ea bona ea botho. 19Ba khaolitse ho itšoarella ka hlooho, e leng eona e kopanyang 'mele oohle ka manonyeletso le mesifa ea oona, e o laole, 'me o hōle kamoo Molimo a ratang kateng.
Bophelo bo bocha bo fumanoa ka Kreste
20Erekaha le shoele le Kreste, 'me le lokolotsoe matleng a meea e busang lefatše, ho ea ka'ng ha le ntse le phela joaloka hoja le ba lefatše lee, le ntse le hlompha litaelo tse kang tsena: 21“Se k'a ama hona; se k'a latsoa hono; se k'a thetsa hane?” 22Tsena tsohle ke tse senyehang ha li sebelisoa. Hona ke ho latela melaoana le lithuto tse tsoang ho batho. 23Leha ho ba le borapeli ba maiketsetso, ho ikokobetsa ka mokhoa o fosahetseng, ho hlōkōfatsa 'mele, li bonahala eka li na le bohlale, ha li na thuso, haese ho chachehisa litakatso tsa botho.
