Matlapa a bobeli a Molao
1“Ka nako eo Morena a re ho 'na: ‘Ipètlèlè matlapa a mabeli, a tšoanang le a pele, u nyolohele ho 'na, thabeng, u etse areka ea lehong. 2Holim'a matlapa ao ke tla ngola mantsoe a neng a ngotsoe holim'a matlapa a pele, ao u a pshatlileng, ebe u kenya matlapa ao ka arekeng.’
3“Eaba ke etsa areka ka lithupa tsa sefate sa mositsane, ke bètla matlapa a mabeli, a tšoanang le a pele, ke nyolohela thabeng, ke nkile matlapa ao a mabeli. 4Joalokaha a ne a ngole pele holim'a matlapa ao, Morena a ngola melao e leshome, eo Morena a neng a le bolelle eona thabeng, a le kahar'a mollo, mohla le neng le phuthehile. Morena a 'nea melao eo. 5Ka khutla, ka theoha thabeng, ka kenya matlapa ka arekeng eo ke e entseng. Matlapa a lula kamoo, joalokaha Morena a ntaetse.”
6Bana ba Iseraele ba tsamaea, ba tloha Beerote-Bene-Jakane, ba leba Mosera, moo Arone a ileng a shoela teng, a ba a epeloa hona teng. Mora oa hae Eleasare ea e-ba moprista sebakeng sa ntat'ae. 7Ba tloha moo ba leba Gudegoda; ho tloha Gudegoda ba leba Jotebata, e leng naha ea linōkana tse phallang metsi.
8Ka eona nako eo Morena a khetha ba morabe oa Levi, hore ba jare areka ea selekane sa Morena, ba eme kapele ho Morena, ba mo sebeletse, ba hlohonolofatse ka lebitso la hae ho fihlela kajeno. 9Ka baka leo, Levi ha a na kabelo lefeng la bana babo. Morena ke eena lefa la hae, joalokaha Morena Molimo ao hao, a boletse.
10“Ka lula thabeng ka matsatsi a mashome a mane, le ka masiu a mashome a mane, joaloka lekhetlo la pele, 'me le ka eona nako eo Morena a 'mamela, a se ke a rata ho le timetsa. 11Morena a re ho 'na: ‘Ema, u tsoele pele leetong, u etelle sechaba sena pele. Sona se tla kena, se hape naha eo ke hlapanyelitseng bo-ntat'a sona hore ke tla se nea eona.’ ”
Seo Molimo a se batlang
12“Joale, Iseraele, seo Morena Molimo oa hao, a se batlang ho uena ke sefe, haese hore u tšabe Morena Molimo oa hao, u tsamaee litseleng tsa hae tsohle, u mo rate, u sebeletse Morena Molimo ao hao, ka pelo ea hao eohle, le ka moea oa hao oohle; 13u bōlōke melao ea Morena, le litaelo tsa hae tseo ke u laelang tsona kajeno, hore u tle u atlehe?
14“Bona, leholimo, le leholimo la maholimo, le lefatše, le tsohle tse ho lona, ke tsa Morena Molimo oa hao. 15Empa Morena o ne a rata bo-ntat'a lōna, hoo a ileng a ikhethela litlōhōlō tsa bona, e leng lōna, a le khetha har'a lichaba tsohle, joaloka kajeno. 16Ka baka leo, bōlōtsang lipelo tsa lōna, 'me le ke ke la hlola le e-ba manganga. 17Morena Molimo oa lōna, ke Molimo e moholo; ke Molimo oa melimo, ea matla, ea tšabehang. Ha a na leeme, ha a amohele tjotjo. 18O ahlōla khutsana le mohlolohali ka toka, o rata mojaki, oa mo fepa, oa mo apesa. 19Ka baka leo, ratang bajaki, hobane le lōna le ne le le bajaki naheng ea Egepeta. 20Le tšabe Morena Molimo oa lōna. Le mo sebeletse, le mo khomarele, le hlapanye ka lebitso la hae. 21Ke eena thoriso ea lōna, ke eena Molimo oa lōna, ea le etselitseng lintho tsena tse kholo, tse tšabehang, tseo le li boneng.
22“Bo-ntat'a lōna ba ne ba theohele Egepeta e le batho ba mashome a supileng, empa joale Morena Molimo oa lōna, o le ngatafalitse joaloka linaleli tsa leholimo.”
