Ho rapelloe sebakeng se le seng feela
1“Ena ke melao, le litaelo tseo le tšoanetseng ho li phetha naheng eo Morena Molimo oa bo-ntat'a lōna, a le neileng eona hore e be ea lōna, ka matsatsi 'ohle ha le ntse le phela lefatšeng. 2Le felise libaka tsohle moo lichaba tseo le tlang ho li falatsa li neng li sebeletsa melimo ea tsona teng, tse holim'a lithaba, le tse holim'a maralla, le tse katlas'a lifate tsohle tse talana. 3Le heletse lialetare tsa tsona, le thue lifika tsa tsona tseo li li khumamelang. Le chese le litšoantšo tsa tsona tsa Ashera. Litšoantšo tse betliloeng tsa melimo ea tsona le li rathake, le felise mabitso a tsona libakeng tseo.
4“Le se ke la etsa joalo ho Morena Molimo oa lōna. 5Empa le tla batla sebaka seo Morena Molimo oa lōna, a tla se khetha merabeng eohle ea lōna, e leng sebaka seo Morena Molimo oa lōna, a tla ba ho sona, a lule ho sona. Le ee sebakeng seo. 6Le tle le ise ho sona linyehelo tsa lōna tsa secheso, le mahlabelo a lōna, le karolo e le 'ngoe ho tse leshome tsa motho ka mong, le nyehelo tsa lōna tse akhōtsoang, le likano tsa lōna, le linyehelo tsa lōna tsa boithaopo, le matsibolo a mehlape ea lōna ea likhomo le ea linku. 7Le li jelle moo, kapele ho Morena Molimo oa lōna. Uena le ba ntlo ea hao le tla thabisoa ke tsohle tseo le li sebetsang, tseo Morena Molimo oa lōna, a le hlohonolofalitseng ka tsona.
8“Le se ke la etsa joalokaha le etsa kajeno: Monna ka mong o iketsetsa borata, 9hobane ha le e-s'o ka le kena phomolong, le amohela lefa leo Morena Molimo oa lōna, a le neang lona. 10Empa etlare ha le se le tšetse Jorodane, le se le ahile naheng eo Morena Molimo oa lōna, a le neang eona e le ea lōna, a se a le phomolitse lireng tsohle tsa lōna tse le pota-potileng, le tla lula le sireletsehile. 11Sebaka seo Morena Molimo oa lōna, a tla se khetha e le moo a tla lula teng, ke ho sona le tlang ho isa tsohle tseo ke le laetseng tsona: linyehelo tsa lōna tsa secheso, le mahlabelo a lōna, le karolo e le 'ngoe ho tse leshome tsa motho ka mong, le linyehelo tsa lōna tse akhōtsoang, le likano tsa lōna tse khethehileng, tseo le li etselitseng Morena. 12Le tla thaba kapele ho Morena Molimo oa lōna; lōna, le bara ba lōna, le barali ba lōna, le bahlanka ba lōna, le makhabunyane a lōna, le Molevi ea kahar'a metse ea lōna, hobane ha a na seabo kapa lefa joaloka lōna.”
Melao ea mahlabelo
13“Itlhokomeleng le se ke la nyehela ka linyehelo tsa lōna tsa secheso sebakeng sefe kapa sefe seo le se bonang. 14Empa le ee sebakeng seo Morena a tla se khetha, se naheng ea morabe o mong oa merabe ea lōna; ke moo le tla nyehela ka linyehelo tsa lōna tsa secheso teng, le moo le tla etsetsa tsohle tseo ke le laelang tsona teng.
15“Leha ho le joalo, le ka hlabela liphoofolo tsa lōna moo le ratang teng. Le jelle nama ea tsona kahar'a metse ea lōna, ho ea kamoo Morena Molimo oa lōna, a le hlohonolofalitseng kateng. Ba sesila le ba hloekileng ba ka li ja, joalokaha le e-ja nama ea tšèphè, le nama ea khama. 16Ke bobete feela boo le sa tlong ho bo ja; bona le bo qhalle fatše joalokaha le qhala metsi. 17Kahar'a metse ea lōna le se ke la ja tse latelang: karolo e le 'ngoe ho tse leshome tsa motho ka mong, tsa koro ea lōna, kapa tsa veine ea lōna e ncha, kapa tsa ole ea lōna, kapa tsa matsibolo a mehlape ea likhomo tsa lōna, kapa ea linku tsa lōna; kapa efe kapa efe ea likano tseo le ikanneng ka tsona, kapa linyehelo tsa lōna tsa boithaopo, kapa linyehelo tsa lōna tse akhōtsoang. 18Empa tsena tsohle le tla li jella kapele ho Morena Molimo oa lōna, sebakeng seo Morena Molimo oa lōna, a tla se khetha; lōna, le bara ba lōna, le barali ba lōna, le bahlanka ba lōna, le makhabunyane a lōna, le Molevi ea kahar'a metse ea lōna. Kapele ho Morena Molimo oa lōna, le tla thabisoa ke tsohle tseo le li sebetsang. 19Itlhokomeleng, le se ke la furalla Molevi ha feela le ntse le phela naheng ea lōna.
20“Ha Morena Molimo oa lōna, a atolosa meeli ea lōna, joalokaha a le tšepisitse, 'me le re: ‘Ke tla ja nama, hobane ke lakatsa ho ja nama,’ le ka ja nama ho latela litakatso tsa lōna. 21Haeba sebaka seo Morena Molimo oa lōna, a tla se khetha hore a lule ho sona se le hōle haholo ho tloha ho lōna, le ka hlaba khomo kapa nku mehlapeng ea lōna, eo Morena a le neileng eona, joalokaha ke le laetse, 'me le ka e jella kahar'a metse ea lōna, kamoo le lakatsang kateng. 22Le ka e ja joalokaha le ee le je nama ea tšèphe le ea khama. Batho ba sesila le ba hloekileng le bona ba ka e ja. 23Hlokomelang, le se ke la ja bobete, hobane mali ke bophelo, 'me ha lea tšoanela ho ja nama le bophelo. 24Le se ke la bo ja, le bo qhalle fatše joalokaha le qhala metsi. 25Le se ke la bo ja, e le hore le tle atlehe 'moho le litlōhōlō tsa lōna, ha le etsa se lokileng mahlong a Morena.
26“Ke feela lintho tse halalelang tsa lōna, le likano tsa lōna, tseo le ka li isang sebakeng seo Morena a tla se khetha. 27Le nyehele ka nyehelo ea lōna ea secheso, le ka nama, le ka mali, holim'a aletare ea Morena Molimo oa lōna. Mali a tse hlabiloeng tsa lōna le a qhalle kaholim'a aletare ea Morena Molimo oa lōna, empa nama eona le e je. 28Hlokomelang, le utloe mantsoe ana 'ohle ao ke le laelang 'ona, e le hore lōna le litlōhōlō tsa lōna le tle le atlehe kamehla, ha le etsa se setle le se lokileng mahlong a Morena.”
Ho se ke ha rapeloa melimo ea bohata
29“Ha Morena Molimo oa lōna, a se a fietse kapele ho lōna lichaba tseo le eang ho ea li hapa, le se le li lelekile, le tla aha naheng ea tsona. 30Itlhokomeleng, le se ke la tšoasoa ke leraba, kamora' hoba li felisoe kapele ho lōna. Le se ke la botsa tsa melimo ea lichaba tseo, la re: ‘Lichaba tsee li sebeletsa melimo ea tsona joang, le rōna re tle re li etsise?’ 31Le se ke la etsa joalo ho Morena Molimo oa lōna. Manyala 'ohle ao Morena a a hloileng, lichaba tsena li a etselitse melimo ea tsona, tsa ba tsa e etsetsa sehlabelo sa secheso ka bara le barali ba tsona.
32“Tsohle tseo ke le laelang tsona le hlokomele ho li phetha. Le se ke la eketsa letho, kapa la fokotsa letho ho tsona.”
