Lilemo tseo re bileng lehoatateng ka tsona
1“Joale ra thinya, ra nka leeto le lebang lehoatateng, ra ea ka tsela ea Leoatle la Lehlaka, joalokaha Morena a ne a buile ho 'na. Ra qeta matsatsi a mangata re ntse re potoloha thaba ea Seire.
2“Morena a bua ho 'na, a re: 3‘Le potolohile thaba ena halelele, ho lekane. Thinyetsang leboea. 4Laela sechaba, u re: Le lekhatheng la ho feta meeling ea bana babo lōna, bana ba Esau, ba ahileng Seire. Ba tla le tšoha; ka baka leo, itlhokomeleng. 5Le se ke la ba loantša. Nke ke ka le nea naha ea bona, leha e le ho ka lekanang bohato ba leoto feela, hobane thaba ea Seire ke e neile Esau hore e be ea hae. 6Lijo tseo le tla li ja le li reke ho bona ka chelete; le metsi ao le tla a noa le a reke ho bona ka chelete.’
7“Morena Molimo oa lōna, o le hlohonolofalitse mesebetsing eohle eo le e etsang. O ile a le hlokomela leetong la lōna har'a lehoatata lena le leholo. Ka lilemo tsena tse mashome a mane, Morena Molimo oa lōna, o bile le lōna, 'me ha lea ka la hloka letho.
8“Joale ra feta ho bana babo rōna, bana ba Esau, ba neng ba ahile Seire, ra ea ka tsela e tsamaeang phuleng, e tsoang Elate le Esione-Gebere. Ra thinya, 'me ra nka tsela ea lehoatata la Moabe.
9“Eaba Morena o re ho 'na: ‘Le se ke la futuhela Moabe, le se ke la mo qholotsa hore a loane. Nke ke ka le nea naha ea hae, hore e be ea lōna, hobane Are ke e neile bana ba Lota hore e ba ea bona.’ ”
10Ka nako ena e fetileng, Baemime ba ne ba ahile moo. E ne e le sechaba se seholo, se sengata, sa banna ba balelele joaloka Baanake. 11Le bona, joaloka Baanake, ba ne ba bitsoa Barefaime, empa Bamoabe ba ne ba ba bitsa Baemime. 12Ka nako e fetileng, Bahore le bona ba ne ba ahile Seire, empa bana ba Esau ba ba leleka, ba ba fiela kapele ho bona, 'me bao ba aha naheng ea bona, joalokaha Baiseraele ba entse naheng eo Morena a ba neileng eona.
13“Joale emang, le tšele nōkana ea Serede.” Eaba re tšela nōkana ea Serede.
Ho fihloa mose ho Jorodane
14“Lilemo tseo re li nkileng ho tloha Kadeshe-Barenea, ho fihlela re tšela nōkana ea Serede, e bile mashome a mararo a metso e robeli. Bahlabani bohle ba molōko oo, ba ne ba se ba shoele, joalokaha Morena a ne a ile a ba hlapanyetsa. 15Letsoho la Morena le ile la 'na la ba loantša, 'me la ba timetsa ba le liahelong tsa bona, ho fihlela ba fela.
16“Ha bahlabani bohle ba har'a sechaba ba se ba timetse, 17Morena a bua ho 'na, a re: 18‘Kajeno le tla feta meeling ea Moabe, ka tsela ea Are. 19Ha le fihla haufi le bana ba Amone, le se ke la ba futuhela, le se ke la ba qholotsa hore ba loane. Nke ke ka le nea naha ea Baamone, hobane ke e neile bana ba Lota hore e be ea bona.’ ”
20Naha ena e ne e bitsoa ea Refaime, hobane ka nako e fetileng Barefaime ba ne ba ahile ho eona, empa Baamone bona ba ne ba ba bitsa Basamasume. 21Baamone e ne e le sechaba se seholo, se sengata, sa batho ba balelele, joaloka Baanake, empa Morena o ile a fiela Baanake kapele ho Baamone, 'me Baamone ba nka naha ea bona, ba aha ho eona. 22Morena o ile a etsa joalo le ho bana ba Esau, ba neng ba ahile Seire. O ile a fiela Bahore kapele ho bona, bana ba Esau ba ba leleka, 'me ba aha naheng ea bona, ho fihlela kajeno-ea-bokajeno. 23Le Baafa ba neng ba ahile metsaneng e il'o fihla Gasa, ba ile ba timetsoa ke Bakafatore ba neng ba e-tsoa Kafatore, 'me ba aha naheng ea bona.
24“Emang, le tsoele pele leetong la lōna, le tšele molatsoana oa Arenone. Bonang, Sihone oa Moamore, khosi ea Heshebone, eena le naha ea hae, ke neelane ka eena matsohong a lōna. Mo futuheleng, naha ea hae e be ea lōna. 25Ho tloha kajeno ke tla etsa hore lichaba tsohle tse katlas'a leholimo li be le letsoalo, le le tšabe. Bohle ba tla thōthōmela, ba phakhasele kapele ho lōna, ha ba utloa lebitso la lōna.
Iseraele o hlōla khosi Sihone
26“Ha ke le lehoatateng la Kedemote ka rōmela maqosa ho Sihone, khosi ea Heshebone, ho isa molaetsa oa khotso, ka re: 27‘Re lumelle re fete har'a naha ea hao. Re tla itsamaela feela ka 'mila o moholo; ha re na ho khelohela ka letsohong le letona kapa ka ho le letšehali. 28Lijo tseo re tla li ja, u tla re rekisetsa tsona ka chelete; le metsi ao re tla a noa, u tla re rekisetsa 'ona ka chelete. Re ikōpela ho feta ka tsela feela. 29Joalokaha bana ba Esau ba ahileng Seire, le Bamoabe ba ahileng Are, ba ile ba re lumella ho feta, re lumelle re fete, re be re e'o tšela Jorodane, re kene naheng eo Morena Molimo oa rōna, a re neang eona.’
30“Empa Sihone, khosi ea Heshebone, a se ke a re lumella ho feta naheng ea hae, hobane Morena Molimo oa rōna, o ne a ile a thatafatsa moea oa hae, a etsa hore pelo ea hae e be manganga, e le hore a tle a neelane ka eena matsohong a lōna, joalokaha ho etsahetse kajeno.
31“Eaba Morena o re ho 'na: ‘Bona, ke qalile ho neelana ka Sihone le naha ea hae ho lōna; qalellang ho e hapa, e tle e be lefa la lōna.’
32“Sihone a tsoa a e-na le sechaba sa hae sohle, a re futuhela, a re loantšetsa pel'a Jahase. 33Morena Molimo oa rōna, a neelana ka eena ho rōna. Ra mo hlōla hammoho le bara ba hae, le sechaba sa hae sohle. 34Ka eona nako eo ra hapa metse ea hae eohle, 'me motse o mong le o mong o nang le baahi ra o ripitla ho hang, ra bolaea banna, le basali, le bana, ra se ke ra siea le ea mong. 35Ra inkela likhomo feela, 'moho le khapo ea metse eo re e hapileng. 36Ho tloha Arōoere e pel'a khohlo ea Arenone, le ho tloha motseng o kahar'a khohlo eo, ho ea fihla Gileade, ha hoa ka ha e-ba le motse o ileng oa re hlōla, hobane Morena Molimo oa rōna, o ne a neelane ka eona eohle ho rōna. 37Ke naheng ea Baamone feela, moo le sa kang la atamela teng; le sebakeng sohle se ka mahlakoreng a nōkana ea Jaboko, le metseng e naheng e maralla, le hohle-hohle moo Morena a ileng a re hanela ho ea teng.
