LIPOLELO 4

₁“Joale lōna Baiseraele, mamelang melao le litaelo tseo ke le rutang tsona, hore le li phethe, e le hore le tle le phele, le kene naheng eo Morena Molimo oa bo-ntat'a lōna, a le neang eona hore e be ea lōna. ₂Le se ke la eketsa letho ho tseo ke le laelang tsona, kapa la fokotsa letho ho tsona, e le hore le tle le bōlōke melao ea Morena Molimo oa lōna, eo ke le laelang eona.

₃“Le bone ka mahlo a lōna, seo Morena a ileng a se etsa tabeng ea Baale-Peore, hobane monna e mong le e mong ea ileng a latela Baale-Peore, Morena Molimo oa lōna, o ile a mo timetsa. ₄Empa lōna ba ileng ba khomarela Morena Molimo oa lōna, le ntse le phela bohle, le kajeno-ea-bokajeno.

₅“Bonang, ke le rutile melao le litaelo, joalokaha Morena Molimo oa lōna, a ntaetse, e le hore le tle le etse joalo naheng eo le eang ho eona, hore e be ea lōna. ₆Ka baka leo, e bolokeng, 'me le e phethe, hobane hona ho tla bontša bohlale ba lōna, le kutloisiso ea lōna, mahlong a lichaba tse tla utloa melao ena eohle, 'me li re: ‘Ruri sechaba sena se seholo ke sechaba se bohlale, se nang le kutloisiso.’

₇“Ke sechaba sefe se teng, se seholo, se nang le Molimo ea haufi le sona, joaloka Morena Molimo oa rōna, ea bang haufi le rōna, kamehla ha re ipiletsa ho eena? ₈Ke sechaba sefe se teng, se seholo, se nang le melao, le litaelo tse lokileng, joaloka molao oo ohle, oo ke o hlahisang kapele ho lōna kajeno?

₉“Feela le itlhokomele, le be hlokolosi, esere la lebala lintho tseo le li bonang ka mahlo a lōna, kapa tsa hlakoha lipelong tsa lōna ka matsatsi 'ohle a bophelo ba lōna. Empa lōna le li tsebise bana ba lōna, le litlōhōlō tsa lōna. ₁₀Mohla le neng le eme kapele ho Morena Molimo oa lōna, Horebe, Morena a re ho 'na: ‘Nkhobokanyetse sechaba, ke tle ke etse hore se mamele lipolelo tsa ka, e le hore se tle se ithute ho ntšaba ka matsatsi 'ohle a ho phela ha sona lefatšeng, le hore se tle se rute bana ba sona.’

₁₁“La na la atamela, la ema mosikong oa thaba, 'me thaba ea e-cha ke mollo, lelakabe la ea fihla holimo-limo; thaba ea apareloa ke maru a matšo, le lefifi la bonka-ntjana. ₁₂Morena a bua le lōna a le kahar'a mollo. Le ile la utloa molumo oa mantsoe feela, empa la se ke la bona ea buang. Le ile la utloa lentsoe la hae feela.

₁₃“O ile a le phatlalletsa selekane sa hae, seo a ileng a le laela ho se phetha; e leng Melao e leshome, eo a ileng a e ngola holim'a matlapa a mabeli. ₁₄Ka eona nako eo, Morena a ntaela hore ke le rute melao le litaelo tseo, e le hore le tle le li phethe ha le fihla naheng eo le eang ho eona, hore e tle e be ea lōna.

₁₅“Ka baka leo, itlhokomeleng, hobane mohl'a Morena a buang ho lōna a le kahar'a mollo, thabeng ea Horebe, ha lea ka la bona ea buang. ₁₆Le se ke la itšilafatsa, la iketsetsa setšoantšo se betliloeng, se ka bang le sebōpeho sefe kapa sefe, se tšoanang le monna kapa mosali. ₁₇E ka ba se tšoanang le phoofolo efe kapa efe e lefatšeng, kapa se tšoanang le nonyana efe kapa efe e fofang; ₁₈kapa se tšoanang le eng kapa eng e hahabang holim'a lefatše; kapa se tšoanang le tlhapi efe kapa efe e metsing, katlase ho lefatše. ₁₉Esita leha le ka lelaletsa mahlo a lōna leholimong, la bona letsatsi, le khoeli, le linaleli, e leng mabōtho 'ohle a leholimo, le se ke la khelosoa, la khumama kapele ho tsona, la li sebeletsa. Tsena ke tseo Morena Molimo oa lōna, a li abetseng lichaba tsohle tse katlas'a leholimo lohle. ₂₀Empa lōna Morena o le ntšitse sebōping se qhibilisang tšepe, sa Egepeta, hore lōna le be sechaba seo e leng sa hae, joalokaha ho le joalo kajeno.

₂₁“Ho feta mona, Morena o ile a nkhalefela ka baka la lōna, 'me a hlapanya hore nke ke ka tšela Jorodane, le hore nke ke ka kena naheng e ntle, eo Morena Molimo oa lōna, a le neang eona, hore e be lefa. ₂₂'Na ke tla shoela naheng ena, nke ke ka tšela Jorodane, empa lōna le tla tšela, 'me naha e ntle e be ea lōna. ₂₃Itlhokomeleng, esere la lebala selekane sa Morena Molimo oa lōna, seo a se entseng le lōna, eaba le iketsetsa setšoantšo se betliloeng, se nang le sebōpeho sa ntho efe kapa efe, eo Morena Molimo oa lōna, a le hanetseng eona. ₂₄Morena Molimo oa lōna, ke mollo o timetsang, ke Molimo ea boulelang.

₂₅“Haekare ha le tsoetse bana, le e-na le litlōhōlō, le se le phetse ka nako e telele naheng ena, la itšilafatsa ka ho etsa setšoantšo se betliloeng, se ka bang le sebōpeho sefe kapa sefe, 'me la etsa hoo ho khopo, moo Morena Molimo oa lōna, a ntseng a bona, ho mo halefisa; ₂₆leholimo le lefatše ke lipaki tsa hore ruri le tla timela hang-hang, naheng eo le tšelang Jorodane le e-ea ho eona, hore e be ea lōna. Le ke ke la phela halelele naheng eo; le tla timetsoa ho hang. ₂₇Morena o tla le qhalanya har'a lichaba, 'me palo ea lōna e tla fokola har'a lichaba tseo Morena a tla le isa ho tsona. ₂₈Le tla sebeletsa melimo e bōpiloeng ka matsoho a motho; melimo ea lehong, le ea lejoe, e sa boneng, e sa utloeng, e sa jeng e sa fōfōneleng. ₂₉Empa ha le le moo le tla batla Morena Molimo oa lōna. Haeba le 'matla ka lipelo tsa lōna tsohle, le ka moea oa lōna oohle, le tla mo fumana. ₃₀Matsatsing a qetello, ha le le matšoenyehong, 'me lintho tsena li etsahala ho lōna, le tla khutlela ho Morena Molimo oa lōna, 'me le mamele lentsoe la hae. ₃₁Morena Molimo oa lōna, ke Molimo ea mohau, a ke ke a le lahla, kapa a le timetsa, kapa a lebala selekane seo a se hlapanyelitseng bo-ntat'a lōna.

₃₂“Botsisisang tsa matsatsi a khale, a bileng teng le e-s'o be teng, ho tloha mohl'a letsatsi leo Molimo a neng a bōpe motho ka lona lefatšeng; le botse ho tloha pheletsong e 'ngoe ea leholimo ho isa pheletsong e 'ngoe ea leholimo: Na ntho e kholo, e kang ee, e kile ea e-ba teng? Kapa na e kang eona e kile ea utluoa? ₃₃Na sechaba se teng se kileng sa utloa lentsoe la Molimo a bua a le kahar'a mollo, joalokaha lōna le le utloile, sa 'na sa phela? ₃₄Kapa na ho teng molimo o mong o kileng oa leka ho inkela sechaba, har'a sechaba se seng ka meleko, le ka lipontšo, le ka mehlolo, le ka ntoa, le ka matla, le ka letsoho le otlolohileng, le ka litšōso tse kholo, joalokaha Morena Molimo oa lōna, a ile a etsa ho lōna, moo le ntseng le bona, ha le sa le Egepeta?

₃₅“Le bontšitsoe tsena hore le tsebe hore Morena ke eena Molimo, ha ho Molimo e mong kantle ho eena. ₃₆O ile a etsa hore le utloe lentsoe la hae le e-tsoa leholimong, ho le ruta. Mona lefatšeng o ile a le bontša mollo oa hae o moholo, 'me le ile la utloa lipolelo tsa hae li e-tsoa kahar'a mollo. ₃₇Ka baka la hobane o ne a rata bo-ntat'a lōna, o ile a khetha litlōhōlō tsa bona, 'me ka matla a hae a maholo, o ile a le ntša Egepeta ka boeena. ₃₈Lichaba tse kholo, tse matla ho le feta, o ile a li leleka kapele ho lōna ho le tlisa naheng ea tsona, le ho le nea eona, e le lefa la lōna, joalokaha ho le joalo ka letsatsi lena.

₃₉“Ka baka leo he, ho tloha ka letsatsi lena tsebang, 'me le se ke la lebala hore Morena ke eena Molimo ea holimo, leholimong, le ea lefatšeng, katlase ho lefatše. Ha ho na Molimo e mong. ₄₀Le tla bōlōka melao ea hae le litaelo tsa hae, tseo ke le laelang tsona kajeno, e le hore lōna, le bana ba lōna, le tle le atlehe, 'me le phele halelele naheng eo Morena Molimo oa lōna, a le neang eona, hore e be ea lōna kamehla eohle.”

₄₁Moshe a khetha metse e meraro, mose o ka koano ho Jorodane, ka bochabela; ₄₂hore e be moo 'molai ea bolaeang oa habo e se ka morero a tla tšabela teng, kaha 'molauoa e ne e se sera sa hae ka nako e fetileng, 'me ka ho tšabela ho o mong oa metse ena, a tle a phele. ₄₃Motse oa Besere, o lehoatateng, phuleng, e ne e le oa morabe oa Rubene; oa Rama, o Gileade, e le oa morabe oa Gade; oa Golane, o Bashane, e le oa morabe oa Manase.

₄₄Ona ke oona molao oo Moshe a ileng a o bea kapele ho bana ba Iseraele. ₄₅Tsena ke litemoso, le melao, le litaelo, tseo Moshe a ileng a li bolella bana ba Iseraele, ha ba ne ba e-tsoa Egepeta. ₄₆Ba ne ba le khohlong e mose o ka koano ho Jorodane, malebana le Bete-Peore, naheng ea Sihone, khosi ea Baamore, ea neng a ahile Heshebone. Ke eena eo Moshe le bana ba Iseraele ba ileng ba mo hlōla, ha ba ne ba e-tsoa Egepeta. ₄₇Ba ile ba hapa naha ea hae, le naha eo Oge, khosi ea Bashane, e leng likhosi tse peli tsa Baamore, tse neng li ahile mose o koano ho Jorodane, ka bochabela. ₄₈Ba hapa ho tloha Arōoere, e lebōpong la nōkana ea Arenone, ho ea fihla thabeng ea Sione, e leng Heremone. ₄₉Ba hapa le phula eohle e ka koano ho Jorodane, ka bochabela, ho ea fihla Leoatleng la Letsoai, tlas'a mesiko ea Pisega.