Menyaka le maruo ke lefeela
1Ka bua ka pelo, ka re: “Ke tla leka ho itukubetsa har'a menyaka, ke ithabise.” Empa ka fumana hore le hona e nts'e le lefeela. 2Eaba ke re: “Litšeho ke bohlanya! Monyaka oona o thusa'ng?” 3Pelong ea ka ka rera ho ithabisa ka veine, feela ke ntse ke sebetsa ka bohlale; ka rera le ho khomarela bothoto, hore ke tle ke fumane se leng molemo, seo batho ba ka se etsang mona lefatšeng ka nako eohle ea bophelo ba bona.
4Ka iketsetsa mesebetsi e meholo, ka ikhahela matlo, ka itemela masimo a ka a morara. 5Ka iketsetsa lirapa tsa lipalesa le tsa lifate, ka lema lifate tse behang mefuta eohle ea litholoana. 6Ka iketsetsa matšana ao ka metsi a 'ona ke noesetsang lifate tse lemiloeng. 7Ka ithekela makhoba le makhabunyane, 'me makhoba a mang a tsoalloa lapeng ha ka. Ka rua haholo, ka ba le mehlape ea likhomo le ea likhutšoane ho feta bohle ba ileng ba e-ba teng Jerusalema pele ho 'na. 8Ka ipōkellela silefera le khauta, le matlotlo a likhosi le a linaha tse pusong ea ka. Ka iphumanela libini tsa banna le tsa basali, le lintho tsohle tseo batho ba ka ithabisang ka tsona, le basali ba bangata. 9Kahoo ka tuma haholo, ka feta bohle ba bileng teng Jerusalema pele ho 'na, 'me ka lula ke ntse ke le bohlale.
10Ha kea ka ka itima
melakatsoana eohle,
ha kea ka ka ithibela
menyaka eohle.
ke ne ke thabela tsohle
tsa mofufutso oa ka,
hona e le moputso
oa mofufutso oa phatla ea ka.
11Ha ke talima mesebetsi
ea matsoho a ka,
le ho fufuleloa ha ka
ha ke e sebetsa,
tsohle e n'e le lefeela
le kang ho lelekisa moea!
Ha ho na moputso mona lefatšeng.
Bohlale le bothoto ke lefeela
12Maikutlong a ka ka nahana bohlale,
ka nahana bohlanya
le bona bothoto.
Mohlahlami oa khosi
a ka etsa'ng hape,
haese feela ho etsa
se seng se entsoe?
13Ka bona hore bohlale
bo molemo ho feta bothoto,
joalokaha leseli
le le molemo ho feta lefifi.
14Ea bohlale o na le mahlo a chatsi,
athe sethoto se itsamaela lefifing.
Ha e le 'na ka hlokomela hona:
Bohle pheletso ea bona ea tšoana.
15Joale ka bua ka pelo, ka re:
“Se hlahelang sethoto
le 'na se tla ntlhahela;
ke fumana'ng
ka ho ba bohlale haholo?”
Ka bua ka pelo, ka re:
“Hona le hona e nts'e le lefeela!”
16Ea bohlale,
ho tšoana le ea sethoto,
a ke ke a hopoloa
kamehla le mehla;
ka nako e tlang
bobeli ba tla lebaloa.
Mohlalefi o shoa
joalokaha thoto se e-shoa!
Ho sebetsa ka thata ke lefeela
17Eaba ke hloea bophelo, hobane mosebetsi o etsoang mona lefatšeng o n'o le bohlōkō ho 'na. Kaofela ha oona ke lefeela le tšoanang le ho lelekisa moea feela. 18Ka hloea mesebetsi eohle eo ke e entseng mona lefatšeng, hobane ke tlameha ho e siela ea tla ntlhahlama. 19Ke mang ea tsebang haeba eo o tla ba bohlale kapa e be sethoto? Leha ho le joalo o tla laola mesebetsi eohle eo ke e entseng mona lefatšeng ka matla a ka le ka bohlale ba ka. Hona le hona ke lefeela. 20Kahoo ka itšoabela ka baka la mesebetsi eohle eo ke e entseng mona lefatšeng. 21Motho a ka sebetsa ka bohlale ba hae le ka tsebo le ka toka, empa tsena o tla li siea e le lefa la ea sa li sebeletsang. Hona le hona ke lefeela le bomalimabe bo boholo. 22Motho o boelloa ke'ng ka mosebetsi oohle o boima, o mo khathatsang, oo a o etsang mona lefatšeng? 23Matsatsi 'ohle a bophelo ba hae ke a litsietsi, 'me mosebetsi oa hae o tletse masoabi. E, bosiu ha a phomole, 'me hona le hona ke lefeela.
24Ha ho letho le molemo leo motho a ka le etsang, haese hore a je, a noe, a ithabise ka tseo a li sebelitseng. Empa le teng ke ile ka bona hore tsena o li neoa ke Molimo, 25hobane ntle ho Molimo, ke mang ea ka jang, 'me a ithabisa? 26Molimo o nea motho ea mo khahlisang bohlale le tsebo le thabo, empa moetsalibe o neoa mosebetsi o boima oa ho bokella le ho boloka matlotlo, a tle a a siele ea khahlisang Molimo. Hona le hona ke lefeela le tšoanang le ho lelekisa moea feela.
