Moredekai o kopa thuso ea Esetere
1Ha Moredekai a tsebile litaba tsena, a hahola liaparo tsa hae, a apara tse mahoashe, a itšela ka molora, 'me a matha seterateng se seholo sa motse, a ntse a hoeletsa, a re: “Sechaba se se nang molato sea ripitloa!” 2A fihla a ema ka pele ho heke ea ntlo ea khosi; hobane o ne a sa lumelloe ho kena ka lebaleng la eona a apere tse mahoashe 'me a itšetse ka molora. 3Naheng e 'ngoe le e 'ngoe, eo mangolo a khosi a ileng a phatlalatsoa ho eona, ea e-ba seboko se seholo le tšiamo le bofifi har'a Bajuda, ba ileng ba ala tse mahoashe, ba robala moloreng.
4Makhabunyane le mahaole a mofumahali a tla ho mo tsebisa. Ha Esetere a utloa tse etsahalang, a ferekana. Eaba o romela liaparo ho Moredekai, hore a apare, a hlobole tse mahoashe. Empa eena a hana. 5Joale Esetere a bitsa Hakrathaeose, lehaole la hae, le neng le mo sebeletsa; a mo roma ho ea ho Moredekai ho batlisisa litaba.
7Joale Moredekai a mo bolella tsohle tse etsahetseng, le tsa chelete eo Hamane a e tšepisitseng khosi, ea litalenta tse likete tse leshome tse tla kenngoa polokelong ea bokhosi, hore ho tle ho timetsoe Bajuda. 8A mo nea le kopi ea lengolo le phatlalalitsoeng Shushane, le amanang le timetso ea bona, hore a e'o le bontša Esetere. A ba a mo bolella hore o laela Esetere hore a ee ka pele ho khosi, ho ea mo etsetsa thapeli, le ho batlela sechaba sa habo thuso ho khosi. A romela molaetsa o reng: “Hopola matsatsi a bofutsana ba hao, ha u ne u feptjoa ka letsoho la ka. Hobane Hamane, eo 'musong e leng oa bobeli ka boemo, o re qositse ho khosi hore re bolaoe, ipiletse ho Morena, e be u re buella ho khosi, 'me u pholose bophelo ba rona.”
9Hakrathaeose a fihla, a bolella Esetere mantsoe ana kaofela. 10Esetere a boela a re ho Hakrathaeose: “E-ea ho Moredekai, u re: 11Lichaba tsohle tsa 'muso oa khosi li tseba hore mang kapa mang, e ka ba monna kapa mosali, ea kenang ka seotloaneng se kahare sa khosi, a sa bitsoa, ha a ka ke a fumana monyetla oa ho pholoha; haese feela eo khosi e ka mo supang ka lere la eona la khauta; ke eena ea tla pholoha. Empa ha e le 'na, e se e le matsatsi a mashome a mararo ke e-s'o ka ke bitsoa hore ke ee ho khosi.”
12Hakrathaeose a bolella Moredekai lipolelo tsohle tsa Esetere. 13Eaba Moredekai o araba Hakrathaeose, a re: “E-ea ho eena Esetere, u re: U se ke ua hopola hore uena feela, 'musong oohle, ho fapana le Bajuda bohle, u tla phonyoha. 14Haeba ka nako ena u ka khutsa tu! thuso le tšireletso li tla hlahela Bajuda li e-tsoa sebakeng se seng, empa ha e le uena le lelapa la ntat'ao le tla timetsoa. Ke mang ea ka tsebang haeba u beiloe litulong tseo, u beeloa nako e kang ee?”
15Esetere a boela a romela ea neng a tlile ho eena, hore a re ho Moredekai: 16“Tsamaea, u e'o phutha Bajuda bohle ba teng mona Shushane. Ka matsatsi a mararo, bosiu le motšeare, le itime lijo ka baka la ka, le se ke la ja letho, kapa ho noa letho. Le rona le makhabunyane a ka re tla itima lijo ka mokhoa o joalo. Joale ke hona ke tla ea ho khosi, esita leha nka bolaoa.”
17Moredekai a tsamaea, 'me a phetha tsohle-tsohle tseo Esetere a mo laetseng tsona.
