1Joale khosi le Hamane ba tla moketeng oa lijo oa Esetere. 2Ka tsatsi la bobeli la mokete oa veine, khosi ea boela ea re ho Esetere: “Oho, mofumahali Esetere, thapeli ea hao ke efe? E tla ananeloa. Kōpo ea hao ke efe? E tla phethoa, esita leha eba ke halofo ea 'muso oa ka.”
3Eaba mofumahali Esetere oa araba, o re: “Oho, khosi ea ka, haeba u nkhauhetse, 'me eba u ka khahloa ho etsa joalo, thapeli ea ka, le kōpo ea ka, ke hore bophelo ba ka, le ba sechaba sa heso, bo baballoe. 4Rōna le sechaba sa heso, re se re rekisitsoe hore re timetsoe, re bolaoe, re ripitloe. Haeba re ne re rekisitsoe hore re be makhoba le makhabunyane, nkabe ke khutsitse, hobane leha re ne re ka hlokofatsoa ho ne ho ke ke ha tšoana leha khosi e ne e lahleheloa ke rōna.”
5Eaba khosi Ahashuerushe o araba mofumahali Esetere, o re: “Ke mang eena eo? O kae eena eo ea bileng le sebete sa ho etsa joalo?”
6Esetere a re: “Mohlorisi eo, le sera seo se re hloileng, ke Hamane enoa ea khopo!”
Hamane a tšoha hoo khosi le mofumahali ba ileng ba lemoha. 7Khosi ea ema e lōlōma ke bohale, ea siea mokete hoja ho nooa veine, ea ea ka serapeng sa ntlo ea khosi. Hamane eena a sala, a kōpa mofumahali Esetere hore a mpe a baballe bophelo ba hae, hobane o ne a lemohile hore khosi e mo reretse bobe.
8Khosi ea khutla serapeng sa ntlo ea khosi, ea boela moketeng oa ho noa veine. Hamane eena o ne a oetse holim'a setulo sa sofa seo Esetere a neng a lutse ho sona.
Eaba khosi e re: “Na ke hore o tla be a bete mofumahali ke ntse ke le kamoo ka tlung?”
Hang-hang hoba khosi e rialo, mahaole a khurumetsa sefahleho sa Hamane. 9Harebona, e leng e mong oa mahaole a sebeletsang khosi, a re: “Bonang! Lapeng ha hae, Hamane o hlomme sefate seo ho fanyehoang batho ho sona, se bophahamo ba limethara tse mashome a mabeli a metso e 'meli. O se hlometse ho fanyeha Moredekai ea neng a bolelle khosi taba tse ileng tsa e tsoela molemo.”
Eaba khosi e re: “Fanyehang Hamane hona sefateng seo!”
10Eaba ba fanyeha Hamane hona sefateng sona seo Hamane a neng a se etselitse Moredekai. Joale khalefo ea khosi ea kokobela.
