Baiseraele ba hlorisoa ke Baegepeta
1Ana ke mabitso a bara ba Iseraele, ba ileng ba ea Egepeta le Jakobo, e mong le e mong a ile le lelapa la hae: 2Rubene, le Simeone, le Levi, le Juda; 3le Isakare, le Sebulone, le Benjamine; 4le Dane, le Nafthali, le Gade, le Ashere. 5Batho bohle ba lelōko la Jakobo e ne e le mashome a supileng. Josefa eena o ne a se a le Egepeta.
6Josefa a shoa, le bana babo bohle, le molōko oo 'ohle. 7Bana ba Iseraele ba beleha haholo, ba ata, ba ngatafala, ba e-ba matla haholo, hoo ba ileng ba tlala naha eohle ea Egepeta.
8Khosi e ncha, e neng e sa ka ea tseba Josefa, ea busa Egepeta. 9Eaba e re ho batho ba eona: “Bonang, sechaba sena sa bana ba Iseraele se sengata ho re feta, se bile se matla ho re feta. 10Tloong: A re se sebetseng ka bohlale, esere sa 'na sa ngatafala, 'me ha ntoa e ka qhōma sa thusa lira tsa rōna, sa re loantša, sa tsoa naheng ena.”
11Eaba ba se beela balebeli ho se sebelisa ka thata, hore ba se hlōkōfatse ka mesebetsi ea bona e boima. Baiseraele ba hahela Faro metse ea Pitome le Ramesese, eo ho bōlōkoang lijo ho eona. 12Empa leha Baiseraele ba ntse ba tujoa hakaalo, bona ba 'na ba ngatafala, ba tlala hohle. Baegepeta ba tšoha bana ba Iseraele, 13ba ba sebelisa hampe, e le makhoba. 14Ba ba sulafaletsa bophelo ka ho ba sebelisa ka thata mosebetsing oa ho etsa litene ka letsopa, le mesebetsing eohle ea masimong; le mesebetsing eohle ea bona, eo ba neng ba ba sebelisa eona ka thata.
15Joale khosi ea Egepeta ea bua le babelehisi ba neng ba belehisa basali ba Baheberu; lebitso la e mong oa bona e ne e le Shifera, oa bobeli e le Pua; 16ea re: “Ha le belehisa basali ba Baheberu, le hlahlobe bana; ha e le oa moshanyana le 'molaee, ha e le oa ngoanana le mo tlohele a phele.” 17Empa babelehisi ba ne ba tšaba Molimo, 'me ba se ke ba etsa kamoo khosi ea Egepeta e ba laetseng kateng, ba tlohela bana ba bashanyana ba phela. 18Eaba khosi ea Egepeta e bitsa babelehisi, e re ho bona: “Ke ka baka la'ng ha le etsa ntho e tjee, le tlohela bana ba bashanyana ba phela?”
19Babelehisi ba re ho Faro: “Ke hobane basali ba Baheberu ha ba tšoane le basali ba Baegepeta; bona baa potlaka, 'me ba beleha 'melehisi a e-s'o fihle ho bona.”
20Molimo a baballa babelehisi bao, 'me Baiseraele ba 'na ba ngatafala, ba ba matla haholo. 21Le babelehisi bao Molimo a ba fa bana, kaha ba ne ba tšaba Molimo.
22Joale Faro a laela sechaba sa hae sohle, a re: “Bashanyana bohle ba Baheberu ba tla tsoaloa, le ba akhele ka nōkeng, empa banana bohle bona le ba tlohele ba phele.”
