Baiseraele thabeng ea Sinai
1Ka khoeli ea boraro bana ba Iseraele ba tsoile naheng ea Egepeta, ka lona letsatsi leo ba fihla lehoatateng la Sinai. 2Ha ba tloha Refidime ba fihla lehoatateng la Sinai, 'me ba hloma moo lehoatateng. Baiseraele ba hloma kapele ho thaba.
3Eaba Moshe o nyolohela ho Molimo, 'me Morena a 'mitsa a le thabeng, a re: “U tle u bue tjena ho ba ntlo ea Jakobo, 'me u bolelle bana ba Iseraele, u re: 4‘Le bone tseo ke li entseng Egepeta, le kamoo ke ileng ka le pepa kateng ka mapheo a ntsu, ka le tlisa ho 'na. 5Ha feela le ka mamelisa lentsoe la ka, 'me la bōlōka selekane sa ka, le tla ba sechaba sa ka se khethehileng har'a lichaba tsohle, hobane lefatše lohle ke la ka. 6Le tla ba baprista ba Morena, le be sechaba se halalelang.’ Ana ke 'ona mantsoe ao u tšoanetseng ho a bua ho bana ba Iseraele.”
7Moshe a theoha, a bitsa baholo ba sechaba, a ba bolella mantsoe ana 'ohle ao Morena a mo laetseng 'ona. 8Sechaba sohle sa arabela hong, sa re: “Sohle seo Morena a se buileng re tla se phetha.” Moshe a ea bolella Morena mantsoe 'ohle ao sechaba se a buileng.
9Joale Morena a re ho Moshe: “Bona, ke tla ho uena ke le kahar'a leru le letšo, e le hore batho ba tle ba nkutloe ha ke bua le uena, 'me ba tle ba u kholoe kamehla.” Moshe a bolella Morena mantsoe ao sechaba se a buileng.
10Eaba Morena o re ho Moshe: “E-ea ho sechaba, u re se itlhoekise kajeno le hosasane; se hlatsoe le liaparo tsa sona. 11Se itokisetse letsatsi la boraro, hobane ka letsatsi la boraro Morena o tla theohela holim'a thaba ea Sinai, moo batho bohle ba tla 'mona. 12U tle u beele sechaba meeli e potapotang thaba, u re: ‘Hlokomelang le se ke la nyolohela thabeng, kapa la thetsa mosiko oa eona; ruri ea tla thetsa thaba o tla bolaoa. 13Ho se be motho ea mo amang ka letsoho: a tlepetsoe ka majoe, kapa a hlajoe ka metsu, a shoe; leha e ka ba motho, kapa phoofolo, a se ke a phela. E tle ere ha ho letsoa lenaka batho ba nyolohele thabeng’.”
14Eaba Moshe o theohela ho batho a e-tsoa thabeng, a hloekisa sechaba, 15'me sa hlatsoa liaparo tsa sona. Joale Moshe a re ho sona: “Itokisetseng letsatsi la boraro, ho se be monna ea tla kena likobong tsa mosali.”
16Ka letsatsi la boraro, e sa le hoseng, ha e-ba teng lialuma le mahalima, le leru le letšo holim'a thaba, le molumo o moholo oa lenaka; sechaba sohle se liahelong sa thōthōmela. 17Eaba Moshe o se ntša liahelong ho khahlanyetsa Molimo; sa emisa tlas'a thaba. 18Thaba ea Sinai ea fōqōha mosi, 'me oa e aparela kahohle, kaha Morena a ne a theohetse ho eona, a le kahar'a mollo. Mosi oa fōqōha joaloka mosi oa sebōpi, 'me thaba eohle ea reketla haholo. 19Ha molumo oa lenaka o eketseha, o utloahala haholo, Moshe a bua, 'me Molimo a mo arabela ka lentsoe le kang letōlō. 20Morena a theohela holim'a thaba ea Sinai, tlhōrōng ea eona, a bitsetsa Moshe teng, eaba Moshe oa nyoloha.
21Eaba Morena o re ho Moshe: “Theoha, u hlokomelisa sechaba esere mohlomong sa phunyeletsa ho tla bona Morena, 'me sa e-shoa ka bongata. 22Baprista bohle ba tla atamela pel'a Morena ba ke ba itlhoekise, esere a ba otla.”
23Moshe a re ho Morena: “Batho ba sitoa ho tla pel'a thaba ea Sinai, hobane u ile ua re laea, ua re: ‘Etsetsang thaba meeli, 'me le e halaletse.’ ”
24Eaba Morena o re ho eena: “Tsamaea, u theohe, u nyolohe hape, u e-na le Arone, 'me baprista le sechaba ba se ke ba phunyeletsa ho tla ho Morena, esere khalefo ea hae ea ba tlōkela.”
25Eaba Moshe o theohela ho sechaba, oa se bolella.
