PHALLO 29

₁“Sena ke seo u tla se etsa ho Arone le ho bara ba hae, ha u ba halaletsa, hore e tle e be baprista ba ka. Nka pohoana e le 'ngoe, le lipheleu tse peli, tse se nang sepha; ₂le bohobe bo sa lomosoang, le likuku tse sa lomosoang, tse lubiloeng ka ole; le moqathane o sa lomosoang, o tlotsitsoeng ka ole; tsena u li etse ka phofo ea koro e thumisehileng. ₃U tla li kenya ka serōtōng, u li tlise ka sona serōtō seo, 'moho le pohoana le lipheleu tse peli.

₄“Joale u atametse Arone le bara ba hae pel'a monyako oa Tente ea Morena; u ba hlatsoe ka metsi. ₅U nke liaparo, u apese Arone seaparo se fihlang maotong, le seaparo se aparoang tlas'a setipe, le setipe, le mokhabiso oa sefuba; ebe u mo tlama thekeng ka leqhama le tlamang setipe. ₆U mo roese katiba hloohong, ebe u bea moqhaka o halalelang holim'a katiba eo. ₇U nke ole ea ho tlotsa, u e tšèlè holim'a hlooho ea hae, ebe ua mo tlotsa. ₈Joale u atametse bara ba hae, u ba apese liaparo tse fihlang maotong. ₉U tlame Arone le bara ba hae ka maqhama, u ba roese lituku, 'me e tla ba baprista ka molao oa mehla eohle. Ka mokhoa o joalo u tla halaletsa Arone le bara ba hae.

₁₀“Joale u tla tlisa pohoana kapele ho Tente ea Morena, ebe Arone le bara ba hae ba bea matsoho a bona holim'a hlooho ea pohoana. ₁₁U tla hlaba pohoana ena e le kapele ho Morena, monyakong oa Tente ea Morena. ₁₂U tla nka mali a mang a pohoana, u qopetse monoana oa hao ho 'ona, ebe u tlotsa manaka a aletare ka 'ona. Mali a mang u a tšollele mothèong oa aletare. ₁₃U tla nka mohlehlo, le phapohane, le liphieo tse peli, 'moho le tšōtso ea tsona, u li chesetse holim'a aletare. ₁₄Ha e le nama ea pohoana ena, le letlalo la eona, le mosoang oa eona, u tla li chesetsa kantle ho liahelo tsa lōna. Hona ke sehlabelo se etsetsoang tefelo ea sebe.

₁₅“Joale u nke pheleu ea pele, Arone le bara ba hae ba tle ba bee matsoho a bona holim'a hlooho ea pheleu eo. ₁₆U tla hlaba pheleu eo, ebe u nka mali a eona, u foke aletare ho e pota-pota. ₁₇U khabele nama ea pheleu eo; u hlatsoe likahare tsa eona, le litlhakoana tsa eona, u li bee holim'a nama e khabetsoeng, le holim'a hlooho ea eona. ₁₈Pheleu eo eohle u tla e chesetsa holim'a aletare, e be sehlabelo sa secheso, se monko o monate, se amohelehang ho Morena.

₁₉“Joale u nke pheleu ea bobeli, Arone le bara ba hae ba bee matsoho a bona holim'a hlooho ea eona. ₂₀U tla hlaba pheleu eo; u nke mali a mang a eona, u tlotse ntlha ea tsebe ea Arone ea letsoho le letona; le lintlha tsa litsebe tsa bara ba Arone tsa matsoho a matona; le holim'a menoana e metona ea matsoho a bona a matona; le holim'a menoana e metona ea maoto a bona a matona, 'me ka mali a mang u foke aletare ho e pota-pota. ₂₁U tla nka mali a mang a aletareng, le ole e tlotsang, ebe u foka Arone le liaparo tsa hae; u foke le bara ba hae le liaparo tsa bona. Kahoo Arone le bara ba hae ba tla halalela, hammoho le liaparo tsa bona.

₂₂“U tla nka mafura a pheleu, le mafura a mohatla oa eona, le mohlehlo, le phapohane, le liphieo tse peli, 'moho le tšōtso ea tsona, le sephaka sa letsoho le letona, hobane ena ke pheleu ea mokete oa khalaletso. ₂₃U nke le senkhoa se le seng sa bohobe, le kuku e le 'ngoe e lubiloeng ka ole, le moqathane o le mong; u li nke ka serōtōng sa bohobe bo sa lomosoang se kapele ho Morena. ₂₄Tsena tsohle u li nee Arone le bara ba hae, ba tle ba nyehele ka tsona, ka ho li akhotsa kapele ho Morena. ₂₅U tla boela u li nka matsohong a bona, 'me u li chesetse aletareng, holim'a sehlabelo sa secheso se chesetsoang Morena, se monko o monate, se amohelehang ho Morena. ₂₆U tla nka sefuba sa pheleu ena ea khalaletso ea Arone, u nyehele ka sona ka ho se akhotsa kapele ho Morena, 'me e tla ba seabo sa hao.

₂₇“U tla halaletsa sefuba seo u nyehelang ka sona, le sephaka seo sa seabo, e leng tse tsoang pheleung ea khalaletso ea Arone le ea bara ba hae. ₂₈Hona e tla ba molao oa mehla eohle, o tlamang bana ba Iseraele ho fana ka seabo ho Arone le ho bara ba hae. E tla ba seabo se tsoang ho bana ba Iseraele, sa mahlabelo a bona a teboho, a leng seabo se etsetsoang Morena.

₂₉“Liaparo tsa Arone tse halalelang e tla ba tsa bara ba hae kamora' lefu la hae, e le hore ba tle ba li apare ha ba tlotsoa, ba halaletsoa hore e be baprista. ₃₀Mora oa hae ea tla mo hlahlama setulong sa boprista, 'me a kena ka Tenteng ea Morena ho sebeletsa, o tla apara liaparo tsena ka matsatsi a supileng.

₃₁“U tla nka nama ea pheleu ea khalaletso, u e phehele ka sebakeng sena se halalelang. ₃₂Arone le bara ba hae ba tla ja nama ea pheleu, le bohobe bo ka serōtōng, ba le monyakong oa Tente ea Morena. ₃₃Ba je lintho tseo tefelo ea libe e entsoeng ka tsona, ha ba ne ba beoa, ba halaletsoa. Bao e seng baprista ba se ke ba li ja, hobane lia halalela. ₃₄Haeba ho fihlela ka la hosasane ho e-na le nama e setseng ea mokete oa khalaletso, kapa bohobe, u chese tsena tse setseng; li se ke tsa jeoa, hobane lia halalela.

₃₅“U tla etsa joalo ho Arone le ho bara ba hae, ho ea kamoo ke u laetseng kateng. Mokete oa khalaletso ea bona o nke matsatsi a supileng. ₃₆Ka tsatsi le leng le le leng u tla nyehela ka pohoana, e le sehlabelo se etsetsoang tefelo ea sebe; u hloekise aletare, ha u etsa sehlabelo sa tefelo ea sebe, 'me u e tlotse hore e halalele. ₃₇Ka matsatsi a supileng u tla etsa sehlabelo sa tefelo ea sebe aletareng, u e halaletse. Kahoo aletare e tla halalela ka ho fetisisa, 'me tsohle tse tla ama aletare ena li tla halalela.

₃₈“Sena ke seo u tla nyehela ka sona aletareng, ka tsatsi le leng le le leng, e le sehlabelo sa kamehla eohle: likonyana tse peli, tse nang le selemo. ₃₉Konyana ea pele u nyehele ka eona hoseng; konyana ea bobeli u nyehele ka eona mantsiboea. ₄₀Ha u nyehela ka konyana ea pele, u be u nyehele le ka phofo e thumisehileng e etsang boima ba kilo e le 'ngoe e lubiloeng ka lethara e le 'ngoe ea ole ea mohloaare; u nyehele le ka lethara e le 'ngoe ea veine. ₄₁Konyana ea bobeli u tla nyehela ka eona mantsiboea, 'me nyehelo ea lijo le ea lino e be joaloka ea hoseng; e be sehlabelo sa secheso, se monko o monate, se amohelehang ho Morena.

₄₂“Sehlabelo sena sa secheso se tla 'ne se etsetsoe Morena kamehla eohle, ho isa melōkong ea lōna e tlang; se etsetsoe monyakong oa Tente ea Morena, moo ke tla kopana le uena, ke be ke bue le uena hona teng. ₄₃Ke tla kopana le bana ba Iseraele hona teng, 'me Tente ena ea Morena e tla halaletsoa ke tlōtla ea ka.

₄₄“Ke tla halaletsa Tente ea Morena, le aletare, 'me ke tla halaletsa Arone le bara ba hae, hore ba tle ba sebeletse e le baprista ba ka. ₄₅Ke tla aha har'a bana ba Iseraele, ke be Molimo oa bona. ₄₆Ba tla tseba hore ke 'na Morena Molimo oa bona, ea ba ntšitseng naheng ea Egepeta, hore ke tle ke ahe har'a bona. Ke 'na Morena Molimo oa bona.