PHALLO 5

₁Kamora' tsena Moshe le Arone ba ea ho Faro, ba re ho eena: “Morena, Molimo oa Iseraele, o re: ‘Lokolla sechaba sa ka, se tle se e'o nketsetsa mokete lehoatateng.’ ”

₂Faro a re: “Morena eo ke mang, eo ke tšoanelang ho mamela lentsoe la hae, ebe ke lokolla Baiseraele? 'Na ha ke tsebe Morena; ebile ha nka ke ka lokolla Baiseraele!”

₃Eaba ba re ho eena: “Molimo oa Baheberu o teane le rōna; re lumelle joale, rea kōpa, re nke leeto la matsatsi a mararo, re ee lehoatateng, re e'o etsetsa Morena Molimo oa rōna, sehlabelo, esere a re bolaea ka lefu la seoa, kapa ka sabole.”

₄Empa khosi ea Egepeta ea re ho eena: “Uena Moshe le uena Arone, ke'ng ha le tlohelisa batho mosebetsi oa bona? Khutlelang mesebetsing ea lōna!” ₅Faro a boela a re: “Bonang kamoo batho ba naha ena ba seng ba le ba bangata kateng! Joale le ba tlohelisa mesebetsi ea bona!”

₆Ka lona letsatsi leo Faro a laela bahlorisi ba sechaba, le baokameli ba basebetsi, a re: ₇“Le se hlole le nea batho bana seteroi sa ho etsa litene, joaloka pele; ba tla ipokellela sona ka bobona. ₈Empa palo ea litene tseo ba neng ba li etsa pele, eona ba 'ne ba e etse; le se ke la e fokotsa le hanyenyane feela, hobane ba botsoa; ke ka baka lena ba ntseng ba lla, ba re: ‘Re lokolle, re e'o etsetsa Molimo oa rōna sehlabelo.’ ₉Le belese banna ka mosebetsi o boima ho feta pele, ba tle ba sebetse oona feela, ba se ke ba mamela lipuo tsena tsa leshano.”

₁₀Bahlorisi ba sechaba le baokameli ba basebetsi ba tsoa, ba ea bua le sechaba, ba re: “Faro o buile tjena: ‘Ha ke sa tla hlola ke le nea seteroi! ₁₁Lōna, ka bolōna, tsamaeang le e'o ipatlela seteroi moo le ka se fumanang teng, empa mosebetsi oa lōna ha o na ho fokotsoa le hanyenyane feela!’ ” ₁₂Joale batho ba phasa-phasa le naha ea Egepeta, ba thonaka lirite bakeng sa seteroi. ₁₃Bahlorisi ba ba sunya mangoele, ba re: “Phethang mosebetsi oa lōna oa letsatsi le leng le le leng, joaloka pele ha seteroi se ne se le teng!” ₁₄Baokameli ba bana ba Iseraele, bao bahlorisi ba khethiloeng ke Faro ba neng ba ba beile holim'a bona, ba khakhathoa, ha thoe: “Ke ka baka la'ng ha kajeno le maobane le sa phetha mosebetsi oa lōna joaloka pele, e leng oo le o baletsoeng oa ho etsa litene?”

₁₅Baokameli ba bana ba Iseraele ba fihla, ba lla ho Faro, ba re: “Ke ka baka la'ng ha u etsa bahlanka ba hao tjee? ₁₆Bahlanka ba hao ha ba sa neoa seteroi, empa ho thoe ho bona: ‘Etsang litene!’ Bona, bahlanka ba hao baa khakhathoa; feela molato ke oa sechaba sa hao.”

₁₇Empa Faro a re: “Le botsoa! Le botsoa! Ke ka baka lena le reng: ‘Re lokolle, re e'o etsetsa Morena sehlabelo.’ ₁₈Tsamaeang hona joale, le e'o sebetsa; le ke ke la neoa seteroi, empa palo e baliloeng ea litene eona le tla e etsa.”

₁₉Baokameli ba bana ba Iseraele ba iphumana ba le tsietsing, ha ho thoe: “Le ke ke la fokotsa palo ea litene tsa letsatsi le leng le le leng le hanyenyane feela.”

₂₀Ha ba e-tsoa ho Faro ba teana le Moshe le Arone, ba neng ba ba emetse, ₂₁'me ba re ho bona: “Morena a ke a le bone, a le ahlole, hobane le entse hore re be batho ba khopo mahlong a Faro, le mahlong a bahlanka ba hae, la ba nea sabole matsohong, hore ba re bolaee!”

₂₂Eaba Moshe o khutlela ho Morena, o re: “Morena, u etselitse'ng sechaba see hampe? Ke ka baka la'ng u ileng ua nthōma? ₂₃Haesale ke e-tla ho Faro ho bua ka lebitso la hao, Faro o entse sechaba sena hampe, empa ha u e-s'o etse letho ho lopolla sechaba sa hao.”