Motho o nyelisa thato ea Molimo
1Ka letsatsi la leshome la khoeli ea bohlano selemong sa bosupa, ba bang ba baholo ba Iseraele ba tla botsa Morena, 'me ba lula fatše kapele ho 'na.
2Eaba lentsoe la Morena le fihla ho 'na, le re: 3“Uena ngoan'a motho, bua le baholo ba Iseraele, u re ho bona: ‘Morena Molimo o bua tjena: Na le tlile ho mpotsa? Kea le hlapanyetsa, ho rialo Morena Molimo, ha nka ke ka le lumella ho mpotsa.’
4“Na u tla ba ahlōla, uena ngoan'a motho? Na u tla ba ahlōla? Ba bolelle manyala ao bo-ntat'a bona ba a entseng, 5u re ho bona: ‘Morena Molimo o bua tjena: Mohla ke neng ke khetha Iseraele, ke ile ka hlapanyetsa litlōhōlō tsa ntlo ea Jakobo, ka ba ka iponahatsa ho tsona ha li le naheng ea Egepeta. Ka bua le tsona ke phahamisitse letsoho la ka, ka re: “Ke 'na Morena Molimo oa lōna.” 6Mohlang oo ke ne ke li hlapanyetse hore ke tla li ntša naheng ea Egepeta, ke li ise naheng eo ke li khethetseng eona, e phallang lebese le mahe a linotši, e fetang linaha tsohle ka botle. 7Eaba ke re ho litlōhōlō tseo: “Motho ka mong a furalle manyala a hohelang mahlo a hae, 'me le se ke la itšilafatsa ka melingoana ea bohata ea Egepeta. Ke 'na Morena Molimo oa lōna.”
8“ ‘Empa ba ile ba mphetohela, ba se ke ba 'mamela; motho ka mong a hana ho furalla manyala a hohelang mahlo a hae, leha e le hona ho furalla melingoana ea bohata ea Egepeta. Eaba ke re: Ke tla hlatsetsa khalefo ea ka holim'a bona, bohale ba ka bo felle holim'a bona, hona naheng eo ea Egepeta. 9Empa ka boulela lebitso la ka, hore le se ke la silafatsoa mahlong a lichaba tseo ba neng ba phela har'a tsona, ka iponahatsa ho Baiseraele ka ho ba ntša naheng ea Egepeta, moo lichaba tseo li ntseng li bona.
10“ ‘Ka baka lena, ke ile ka ba ntša naheng ea Egepeta, ka ba isa lehoatateng. 11Ke ile ka ba nea litaelo tsa ka, ka ba ruta melao eo ereng ha motho a e boloka a phele. 12Ka ba nea le Lisabatha tsa ka hore e be sesupo pakeng tsa ka le bona, ba tle ba tsebe hore ke 'na Morena ea ba halaletsang.
13“ ‘Empa sechaba sa Iseraele se ile sa mphetohela ha se le lehoatateng. Ha sea ka sa boloka litaelo tsa ka, se ile sa nyelisa melao ea ka, eo ereng ha motho a e boloka a phele. Baiseraele ba ile ba silafatsa Lisabatha tsa ka hampe. Eaba ke re: Ke tla hlatsetsa khalefo ea ka holim'a bona, ke ba timeletse hona moo lehoatateng. 14Empa ka boulela lebitso la ka, hore le se ke la silafatsoa mahlong a balichaba ba boneng ha ke ntša Baiseraele naheng ea Egepeta. 15Empa hona moo lehoatateng ka ba hlapanyetsa, ka re ha nka ke ka ba isa naheng eo ke ba neileng eona, e phallang lebese le mahe a linotši, e fetang linaha tsohle ka botle. 16Ke kahobane ba nyelisitse melao ea ka, ha baa ka ba boloka litaelo tsa ka, ba silafalitse Lisabatha tsa ka, 'me lipelo tsa bona li hapiloe ke melingoana ea bohata.
17“ ‘Leha ho le joalo ke ile ka ba hauhela, ka se ke ka ba timetsa, kapa hona ho ba felisa, ha ba le lehoatateng. 18Empa ke ile ka re ho bana ba bona ha ba le lehoatateng: “Le se ke la tsamaea ka litaelo tsa bo-ntat'a lōna, kapa la mamela melao ea bona, kapa la itšilafatsa ka melingoana ea bohata. 19Ke 'na Morena Molimo oa lōna; tsamaeang ka litaelo tsa ka, le hlokomele ho mamela melao ea ka. 20Halaletsang Lisabatha tsa ka, hore e tle e be sesupo pakeng tsa ka le lōna. Ka hona le tla tseba hore ke 'na Morena Molimo oa lōna.”
21“ ‘Empa le bana ba bona ba mphetohetse: Ha baa ka ba tsamaea ka litaelo tsa ka, ha baa ka ba hlokomela ho mamela melao ea ka, eo ereng ha motho a e boloka a phele. Ba silafalitse le Lisabatha tsa ka. Eaba ke re: Ke tla hlatsetsa khalefo ea ka holim'a bona, bohale ba ka bo felle holim'a bona hona moo lehoatateng. 22Empa ka baka la ho boulela lebitso la ka hore le se ke la silafatsoa mahlong a lichaba tse boneng ha ke ntša Baiseraele naheng ea Egepeta, ha kea ka ka ba isa letsoho. 23Ke ile ka ba hlapanyetsa ha ba le lehoatateng, hore ke tla ba qhalanya har'a balichaba, ke ba hasanye har'a linaha, 24hobane ha baa ka ba phetha melao ea ka, ba nyelisitse litaelo tsa ka, ba silafatsa Lisabatha tsa ka, ba sebeletsa melingoana ea bo-ntat'a bona ea bohata.
25“ ‘Ka ba nea le litaelo tse sa lokang, le melao e neng e ke ke ea ba phelisa. 26Ka ba tlohela ba itšilafatsa ka limpho tsa bona, ba etsa sehlabelo sa secheso ka matsibolo a bona, e le hore ba tle ba tšabe, 'me ba tsebe hore ke 'na Morena.’
27“Ka baka lena, uena ngoan'a motho, bolella sechaba sa Iseraele, u re ho sona: ‘Morena Molimo o bua tjena: Bo-ntat'a lōna ba ile ba 'nyefola, ba mphuralla. 28Hoba ke ba fihlise naheng eo ke ikanneng hore ke tla ba nea eona, ba ile ba etsetsa mahlabelo a bona libakeng tsohle tsa borapeli, le tlas'a lifate tsohle tse talana. Ba ile ba mphephetsa ka linyehelo tsa bona hore ke ba halefele. Ba chesa mokubetso oa bona o monko o monate, ba etsa linyehelo tsa bona tsa lino. 29Eaba ke re ho bona: Libaka tseo tsa borapeli, tseo le eang ho tsona, ke eng?’ ” Le kajeno-ea-bokajeno libaka tse li bitsoa Libaka tsa Borapeli.
30“Ka baka lena, e-re ho ba ntlo ea Iseraele: ‘Morena Molimo o bua tjena: Na le tla itšilafatsa joaloka bo-ntat'a lōna, le khumamele melimo ea bona e nyonyehang? 31Ha le etsa linyehelo ka limpho tsa lōna, le etsa sehlabelo sa secheso ka bara ba lōna, le ntse le tsoela pele ho itšilafatsa ka melingoana ea lōna ea bohata ho fihlela kajeno-ea-bokajeno, na lōna ba ntlo ea Iseraele ke tla le lumella ho mpotsa? Kea hlapanya, ho rialo Morena Molimo, ha nka ke ka le lumella ho mpotsa.
32“ ‘Le re: “Re rata ho ba joaloka balichaba, re be joaloka baahi ba linaha tse ling ba khumamelang lehong le lejoe.” Empa seo le se nahanang ha se ka ke sa etsahala.
Molimo oa otla, oa tšoarela
33“ ‘Kea hlapanya, ho rialo Morena Molimo, ruri ke tla le busa ka letsoho le matla, le otlolohileng, ke hlatsetse khalefo ea ka holim'a lōna. 34Ke tla le ntša har'a balichaba, ke le phuthe linaheng tseo ke neng ke le qhalanyelitse ho tsona ka letsoho la ka le matla, le otlolohileng, ka hlatsetsa khalefo ea ka holim'a lōna. 35Ke tla le tlisa Lehoatateng la Lichaba, 'me hona teng ke le ahlōle fahleho li talimane. 36Joalokaha ke ile ka ahlōla bo-ntat'a lōna lehoatateng la naha ea Egepeta, le lōna ke tla le ahlōla, ho rialo Morena Molimo.
37“ ‘Ke tla le busa ka thata, ke etse hore le ikokobeletse selekane sa ka. 38Ba mphetohelang, ba mphurallang, ke tla ba tlosa har'a lōna. Le hoja ke tla ba ntša naheng eo ba phelang ho eona, ba ke ke ba hlola ba kena naheng ea Iseraele. Kahoo le tla tseba hore ke 'na Morena.
39“ ‘Ha e le lōna ba ntlo ea Iseraele, Morena Molimo o bua tjena: Motho ka mong a ee, a sebeletse molingoana oa hae oa bohata! Empa hamorao le tla nkhopola; ha le sa tla hlola le silafatsa lebitso la ka le halalelang ka limpho tsa lōna le ka melingoana ea lōna ea bohata. 40Bohle ba ntlo ea Iseraele ba tla ntšebeletsa holim'a thaba ea ka e halalelang, e leng thaba e phahameng ea Iseraele, 'me ke tla ba amohella teng, ho rialo Morena Molimo. Hona moo ke tla batla linyehelo tsa lōna tsa lilopotsiea tsa lōna, hammoho le limpho tsohle tsa lōna, tse halalelang. 41Ha ke se ke le ntšitse har'a balichaba, ke le phuthile linaheng tsohle tseo ke neng ke le qhalanyelitse ho tsona, ke tla le amohela le le mokubetso o monko o monate, 'me ka lōna ke bonahatse khalalelo ea ka ho lichaba. 42Kahoo le tla tseba hore ke 'na Morena, ha ke le fihlisa naheng ea Iseraele, naha eo ke hlapantseng ka re ke tla e nea bo-ntat'a lōna. 43Hona moo le tla hopola boitšoaro ba lōna le liketso tsa lōna tsohle, tseo le ileng la itšilafatsa ka tsona, 'me le tla inyonya ka baka la bobe bohle boo le bo entseng. 44Lōna ba ntlo ea Iseraele, le tla tseba hore ke 'na Morena, ha ke le etsetsa tsena ka baka la ho boulela lebitso la ka, e seng ho ea ka tsela tsa lōna tse khopo, kapa ka liketso tsa lōna tse mpe, ho rialo Morena Molimo.’ ”
Mollo oa boroa
45Lentsoe la Morena la fihla ho 'na, la re: 46“Uena ngoan'a motho, talima boroa, u rute, u hanyetse naha e ka boroa, u porofetele moru oa naha e ka boroa. 47E-re ho moru o ka boroa: ‘Mamela lentsoe la Morena. Morena Molimo o bua tjena: Ke lekhatheng la ho hotetsa mollo o tla chesa lifate tsa hao tsohle tse talana, le tse omeletseng. Lelakabe le laimang ha le ka ke la tingoa, le tla chesa bohle ho tloha boroa ho ea lebōea. 48Batho bohle ba tla bona hore ke 'na Morena ea o hotelitseng; ha o ka ke oa tingoa.’ ”
49Eaba ke re: “Oho, Morena Molimo! Ba ntse ba bua ka 'na, ba re: ‘Na ha a ipolelle litšoantšo feela?’ ”
