Boporofeta bo nyatsang Egepeta
1Ka letsatsi la leshome le metso e 'meli la khoeli ea leshome selemong sa leshome, lentsoe la Morena la fihla ho 'na, la re: 2“Uena ngoan'a motho, talima Faro, khosi ea Egepeta, u mo porofetele, u be u porofetele le naha eohle ea Egepeta. 3U 'molelle, u re: ‘Morena Molimo o bua tjena:
“ ‘Uena Faro, khosi ea Egepeta,
moraparapa oa khanyapa
o phelang linōkeng,
o ithorisang ka ho re:
“Nōka ena ke ea ka,
ke 'na ka seqō ea iketselitseng eona,”
tseba, uena Faro,
hore kea u loantša!
4Ka lilope mehlahare ea hao
ke tla e qalipa,
tlhapi tsa nōka ea hao
ke li khomarise mahehefeng a hao;
ke u hōhōlele kantle
ho linōka tsa hao,
tlhapi tsohle tsa nōka ea hao
li khomaretse mahehefeng a hao.
5Ke tla u akhela kahar'a lehoatata,
uena le litlhapi tsohle
tsa linōka tsa hao.
U tla re pōlōpōqō!
kahar'a 'manana,
ho se be ea u nkang hore a u epele.
Tōpō sa hao se tla jeoa ke libatana,
se jeoe ke matlaka a sōllang holimo.
6“ ‘Baahi bohle ba Egepeta ba tla tseba,
ba tsebe hore ruri Morena ke 'na,
hobane Baegepeta
e n'e le lere la Iseraele,
e le lere la lehlaka, motemekoane.
7Ha Baiseraele ba itšoarella ka uena,
u il'a peperana,
ua ba hlaba ka mahafing;
ha ba leka ho ikokotlela ka uena,
eaba ua robeha,
ba tsoenetseha matheka.
8“ ‘Ka baka lena, Morena Molimo o bua tjena: Ke tla u bolaea ka sabole, ke bolaee sechaba sa hao le liphoofolo tsa sona. 9Naha ea Egepeta e tla fetoha nanaola, 'me Baegepeta ba tla tseba hore ke 'na Morena, hobane Faro eena o itse: “Nōka ena ke ea ka, e entsoe ke 'na.” 10Ka baka lena he, kea u loantša, uena le linōka tsa hao, 'me naha ea Egepeta ke tla e ripitla, ke e fetole nanaola, ho tloha Migedole ho ea fihla Sefene, le ho ea fihla meeling ea Kushe. 11Ha ho motho kapa phoofolo e tla ke e hate holim'a eona, 'me Egepeta ha e ka ke ea hlola e e-ba le baahi ka lilemo tse mashome a mane. 12Har'a linaha tsohle tse sentsoeng, Egepeta ke tla e etsa nanaola e fetang tsohle, 'me har'a metse e ripitliloeng, metse ea Egepeta e tla ba masupi ka lilemo tse mashome a mane. Ke tla qhalanya Baegepeta har'a lichaba tse ling, ke ba hasanye har'a linaha lisele.
13“ ‘Leha ho le joalo Morena Molimo o bua tjena: Etlare ha ho fetile lilemo tse mashome a mane, ke phuthe Baegepeta har'a lichaba tseo ke ba qhalantseng har'a tsona. 14Ke tla ba khutlisa bothōpuoeng, ke ba busetse Patarose, naheng ea baholo-holo ba bona, 'me teng ba tla thea 'muso o fokolang. 15E tla ba 'muso o fokolang ho feta mebuso eohle, 'me o ke ke oa hlola o busa lichaba tse ling, hobane ke tla o fokolisa hoo o ke keng oa hlola o tseba ho busa lichaba tse ling. 16Egepeta e ke ke ea hlola e e-ba setšehetso sa sechaba sa Iseraele, empa etlare ha Baiseraele ba e bona, e ba hopotse sebe sa bona sa ho batla thuso ho eona. Kahoo Baiseraele ba tla tseba hore ke 'na Morena Molimo.’ ”
Khosi Nebukadenesare o tla hlōla naha ea Egepeta
17Ka letsatsi la pele la khoeli ea pele selemong sa mashome a mabeli a metso e supileng, lentsoe la Morena la fihla ho 'na, la re: 18“Uena ngoan'a motho, Nebukadenesare, khosi ea Babilona, o ile a etsa hore mabōtho a hae a futuhele motse oa Tire ka sekhahla se seholo. Meqeqeko eo bahlabani ba neng ba e jere e ile ea ba phumola mafatla, mahetla a bona a phumoha libèbè. Empa eena le bahlabani ba hae ha ho moputso oo ba ileng ba o fumana ka ho futuhela Tire. 19Ka baka lena, Morena Molimo o bua tjena: Naha ea Egepeta ke tla e nea Nebukadenesare, khosi ea Babilona. O tla hapa matlotlo a eona, a lobele lintho tsa eona, 'me tsena e be moputso oa bahlabani ba hae. 20Ke mo neile naha ea Egepeta e le moputso oa mosebetsi oo a ileng a nketsetsa oona, ho rialo Morena Molimo.
21“Mohl'a tsatsi leo, ke tla matlafatsa sechaba sa Iseraele, ke rarolle leleme la hao, u bue moo bohle ba ntseng ba utloa, 'me ba tla tseba hore ke 'na Morena.”
