Molimo o khetha Esekiele ho ba molebeli
1Lentsoe la Morena la boela la fihla ho 'na, la re: 2“Uena ngoan'a motho, bua le sechaba sa heno, u re ho sona: ‘Ha ke etsa hore naha e futuheloe ka sabole, baahi ba naha eo ba ee ba khethe e mong oa bona, ba mo etse molebeli. 3Ha a bona naha e futuheloa ka sabole, o ee a letse lenaka, a hlabele sechaba mokhosi. 4Mang le mang ea utloang molumo oa lenaka, empa a sa tsotelle mokhosi oo, 'me eba o bolaoa ka sabole, e tla ba ke eena ea ipolaileng. 5Ka ho se natse mokhosi o hlajoang ke lenaka, ke eena ea ipolaileng. Empa hojane a ela mokhosi oo hloko a ka be a ile a pholoha. 6Le teng haeba molebeli a bona ho futuheloa sechaba ka sabole, feela a sa letse lenaka ho hlabela sechaba mokhosi, eba motho e mong o bolaoa ka sabole, motho eo o tla shoa ka baka la bokhopo ba hae, empa mali a motho eo 'ona ke tla a batla ho molebeli eo.’
7“Joale uena ngoan'a motho, ke u entse molebeli oa ntlo ea Iseraele; ka baka leo, ha u utloa lentsoe le tsoang ho 'na, u ba nee keletso ea ka. 8Ha 'na ke re ho ea khopo: ‘Ruri u tla shoa,’ eba uena ha u mo eletse, kapa ua mo khalemella litsela tsa hae tse khopo, motho eo ea khopo o tla shoa ka baka la sebe sa hae, 'me mali a hae 'ona ke tla a batla ho uena. 9Empa ha u eletsa ea khopo, feela a sa khutle bokhopong ba hae, o tla shoa ka baka la sebe sa hae, empa uena u tla be u ipholositse.
Boikarabelo ba motho ka mong
10“Ka baka leo, uena ngoan'a motho, bua le ba ntlo ea Iseraele, u re: ‘Lōna le re: “Litlōlo tsa rōna le libe tsa rōna lia re imela, lia re ja. Re ka phela joang?” ’ 11E-re ho bona: ‘Kea hlapanya, ho rialo Morena Molimo, ha ke thabele lefu la ea khopo, empa ke thabela ha ea khopo a khutla litseleng tsa hae a tle a phele. Khutlang! Khutlang litseleng tsa lōna tse khopo! Ke ka baka la'ng, lōna ba ntlo ea Iseraele le ratang ho shoa?’
12“Ka baka leo, uena ngoan'a motho, e-re ho sechaba sa heno: ‘Ho loka ha ea lokileng ho ke ke ha mo pholosa ha a etsa sebe, le ea khopo ha a furalla bokhopo ba hae a ke ke a oa. Ea lokileng ha a etsa sebe a ke ke a phela ka baka la ho loka hoo a ho entseng pele.’ 13Ha ke re ho ea lokileng ruri o tla phela, empa a itšepela ho loka ha hae, 'me a etsa bobe, ha ho le e 'ngoe ea lintho tse lokileng tseo a li entseng e tla hlola e sa hopoloa; o tla shoa ka baka la bokhopo boo a bo entseng. 14Le teng ha ke re ho ea khopo: ‘Ruri u tla shoa,’ eba joale o khutla libeng tsa hae, o etsa ho lokileng le ho nepahetseng, 15o khutlisa se neng se beiloe paneng, o khutlisa le seo a neng a se utsoitse, o boloka litaelo tse phelisang, ha a sa hlola a etsa bokhopo, ruri o tla phela, a ke ke a shoa. 16Ha ho le se seng sa libe tseo a ileng a li etsa pele se tla hlola se sa hopoloa. O entse ho lokileng, ho nepahetseng, 'me ruri o tla phela.
17“Empa sechaba sa heno se re: ‘Tsela ea Morena ha ea loka,’ athe ke tsela ea sona e sa lokang. 18Ha ea lokileng a furalla ho loka ha hae, a etsa bokhopo, o tla shoa ka baka la bokhopo boo. 19Empa ha ea khopo a furalla bokhopo ba hae, a etsa ho lokileng, ho nepahetseng, ka ho etsa joalo o tla phela. 20Feela lōna ba ntlo ea Iseraele le re: ‘Tsela ea Morena ha ea loka.’ Ke tla ahlōla e mong le e mong oa lōna ho ea ka litsela tsa hae.”
Litaba tsa ho haptjoa ha Jerusalema
21Ka letsatsi la bohlano la khoeli ea leshome selemong sa leshome le metso e 'meli sa ho thōpuoa ha rōna, motho e mong ea neng a ile a phonyoha Jerusalema a fihla ho 'na, a re: “Motse o hapiloe!” 22Ka la maobane, mantsiboea, motho eo a e-s'o ka a fihla ho 'na, matla a tsoang ho Morena a ne a ile a ntsukutla. Hoseng, motho eo a e-s'o ka a fihla ho 'na, Morena a rarolla leleme la ka, ka tseba ho bua.
Libe tsa sechaba
23Lentsoe la Morena la fihla ho 'na, la re: 24“Uena ngoan'a motho, sechaba se ahileng lithakong tsa naha ea Iseraele se re: ‘Aborahama o ne a le mong to! empa naha ena o ile a e fuoa. Rōna re bangata, 'me le rōna naha ena re e filoe hore e be lefa la rōna.’ 25Ka baka leo, e-re ho sona: ‘Morena Molimo o bua tjena: Le ja nama e e-s'o ka e fopha mali; le tšepile melingoana ea lōna, le tšolla mali; joale naha ee e ka ba ea lōna joang? 26Le tšepile lisabole tsa lōna, le etsa lintho tse manyala, kaofela ha lōna lea feba; joale naha ee e ka ba ea lōna joang?’
27“E-re ho sona: ‘Morena Molimo o bua tjena: Kea hlapanya, masalla a ahileng lithakong a tla bolaoa ka sabole, ba har'a naha ke tla ba neella libatana li ba harole; ba liqhobosheaneng le ba mahaheng ba tla bolaoa ke lefu la seoa. 28Naha ke tla e fetola nanaola, e be lefeella, matla ao e ikhantšang ka 'ona a fele. Lithaba tsa Iseraele li tla fetoha matsoatlare, ha ho ea tla feta ho tsona. 29Ha ke se ke fetotse naha nanaola, e le lefeella, ka baka la manyala 'ohle ao ba a entseng, ke hona ba tla tseba hore ke 'na Morena.’
Litholoana tsa molaetsa oa moporofeta
30“Uena ngoan'a motho, sechaba sa heno se buisana ka uena se le pel'a marako le menyakong ea matlo, se re: ‘Tloong le mamele molaetsa o tsoang ho Morena.’ 31Sechaba sena se tla ho uena, joalokaha batho ba 'ne ba phuthehe, ba lule kapele ho uena, ba mamele lipolelo tsa hao, empa ba sa li phethe. Ka melomo ea bona ba bua joalokaha eka ke batho ba nang le lerato, empa lipelo tsa bona li nyoretsoe ho rua ka bolotsana. 32Ho batho bao uena u sebini feela se binang ka lentsoe le monate, se tsebang ho letsa seletsa. Lipolelo tsa hao tsona baa li utloa, empa ha ba li phethe.
33“Ha tsena li phethahala, 'me li tla fela li phethahale, ke hona ba tla tseba hore moporofeta o ne a le teng har'a bona.”
