ESERA 10

₁Ha Esera a ntse a rapela, a etsa maipolelo, a lla, a itihela fatše kapele ho Tempele ea Molimo, letšoele le leholo la Baiseraele, e le banna, le basali, le bana, la phuthehela ho eena, 'me batho bao ba lla habohlōkō. ₂Eaba Shekaniea, mora oa Jehiele, e leng e mong oa bara ba Elame, o re ho Esera: “Re sitetsoe Molimo oa rōna, re nyetse basali ba balichaba ba ahileng naheng ena, empa ha e le tabeng ena, tšepo e sa le teng bakeng sa Baiseraele. ₃Ka baka leo, a re etseng selekane le Molimo oa rōna, re khutlise basali bana bohle, le bana ba bona, ho ea ka keletso ea mong'a ka, le ea bohle ba hlomphang melao ea Molimo oa rōna, 'me hona ho etsoe ka molao. ₄Ema ka maoto, hobane tabeng ena boikarabelo ke ba hao, 'me re tla u thusa. Tsoha molōta, u etse joalo.”

₅Eaba Esera oa ema, o etsa hore baprista ba baholo, le Balevi, le Baiseraele bohle, ba hlapanye hore ba tla etsa joalo, ho latela polelo ea Shekaniea. Ba fela ba hlapanya. ₆Esera a tloha kapele ho Tempele ea Molimo, a kena ka kamoreng ea Johanane, mora oa Eleashibe. Ha a se a kene, ha aa ka a ja bohobe kapa a noa metsi, hobane o ne a ntse a lla ka baka la litšito tsa ba neng ba thōpiloe.

₇Naheng eohle ea Juda le Jerusalema, ba phatlalletsa ba neng ba thōpiloe hore ba phuthehele Jerusalema. ₈Ho ea ka keletso ea mahosana le ea baholo, ha thoe mang kapa mang eo matsatsi a mararo a tla feta a e-s'o tle, a jeoe lintho tsa hae tsohle, le eena a be a lelekoe har'a sechaba sa ba neng ba thōpiloe.

₉Eaba banna bohle ba Juda le ba Benjamine, ba phuthehela Jerusalema matsatsi a mararo a e-s'o fete. Ka letsatsi la mashome a mabeli la khoeli ea borobong, sechaba sohle sa lula lebaleng le kapele ho Tempele ea Molimo, se ntse se thōthōmela ka baka la taba ena, se bile se qhaqhasèla ka baka la pula ea litloèbèlèlè. ₁₀Moprista Esera a ema, a re ho sona: “Le sitiloe ka ho nyala basali ba balichaba, 'me le ekelitse libe tsa Baiseraele. ₁₁Ka baka leo, inyatseng kapele ho Morena Molimo oa bo-ntat'a lōna, le phethe thato ea hae, le ikhetholle ho sechaba sa naha ena, le arohane le basali bana ba balichaba.”

₁₂Sechaba sohle sa araba ka mantsoe a phahameng, sa re: “Ho lokile! Re tla etsa joalokaha u boletse! ₁₃Empa sechaba sena se sengata haholo, le pula ke ea litloèbèlèlè, 'me re sitoa ho emakantle. Le mosebetsi ona hase oa letsatsi le le leng, kapa a mabeli feela, hobane tabeng ena re sitiloe haholo. ₁₄Baetapele bohle ba sechaba ba ke ba eme ka maoto; bohle ba metseng ea rōna, ba nyetseng basali ba balichaba, ba tle ka nako e beiloeng, 'me ba tle le baholo, le baahlōli ba motse o mong le o mong, ho fihlela khalefo ea Molimo oa rōna, tabeng ena, e re fapoha.” ₁₅Ke bo-Jonathane feela, mora oa Asaele, le Jahasiea, mora oa Tikefa, ba neng ba hanyetsa taba ena, 'me ba tlatsitsoe ke Meshulame le Shabetai oa Molevi.

₁₆Ba neng ba thōpiloe ba etsa joalo. Eaba moprista Esera o khetha banna bao e neng e le lihlooho tsa malapa a bo-ntat'a bona, lelapeng ka leng a khetha monna a le mong, 'me bana bohle ba qōlloa ka mabitso. Ka letsatsi la pele la khoeli ea leshome, ba kopana ho hlahloba taba ena. ₁₇Ka letsatsi la pele la khoeli ea pele, ba qeta ho hlahloba taba ea banna ba nyetseng basali ba balichaba.

₁₈Bara ba baprista, ba ileng ba fumanoa ba nyetse basali ba balichaba, ke bana: Har'a bara ba Jeshua, mora oa Josadake, le ba bana babo, e ne e le Maasiea, le Eleesere, le Jaribe, le Gedaleea. ₁₉Ba hlapanya hore ba tla leleka basali ba bona. Ka baka la molato oa bona ba nyehela ka pheleu e tsoang mohlapeng oa bona, ba nyehela ka baka la sebe sa bona. ₂₀Har'a bara ba Imere e ne e le Hanani, le Sebadiea. ₂₁Har'a bara ba Harime e ne e le Maasiea, le Elia, le Shemaea, le Jehiele, le Usiea. ₂₂Har'a bara ba Pashahure e ne e le Eleunai, le Maasiea, le Ishemaele, le Netanele, le Josabada, le Elasa.

₂₃Har'a Balevi e ne e le Josabada, le Shimei, le Kelaea ea neng a bitsoa Keleta, le Petahiea, le Juda, le Eleesere.

₂₄Har'a libini e ne e le Eleashibe, 'me har'a balebeli ba monyako e le Shalome, le Teleme, le Uri.

₂₅Har'a Baiseraele, ho bara ba Paroshe e ne e le Rameea, le Jesiea, le Malakiea, le Miamine, le Eleasare, le Malakiea, le Benaea. ₂₆Har'a bara ba Elame e ne e le Mataneea, le Sekariea, le Jehiele, le Abade, le Jeremote, le Elia. ₂₇Har'a bara ba Satu e ne e le Eleunai, le Eleashibe, le Mataneea, le Jeremote, le Sabada, le Asisa. ₂₈Har'a bara ba Bebai e ne e le Jehohanane, le Hananiea, le Sabai, le Atalai. ₂₉Har'a bara ba Bani e ne e le Meshulame, le Maloke, le Adaea, le Jashube, le Sheale, le Ramoke. ₃₀Har'a bara ba Pahate-Moabe e ne e le Adena, le Kelala, le Benaea, le Maasiea, le Mataneea, le Besalele, le Binui, le Manase. ₃₁Har'a bara ba Harime e ne e le Eleesere, le Jishiea, le Malakiea, le Shemaea, le Shimeone, ₃₂le Benjamine, le Malōke, le Shemariea. ₃₃Har'a bara ba Hashume e ne e le Matenai, le Matata, le Sabada, le Elefelede, le Jeremai, le Manase, le Shimei. ₃₄Har'a bara ba Bani e ne e le Maadai, le Amorame, le Uele, ₃₅le Benaea, le Bedeea, le Kehohi, ₃₆le Faniea, le Meremote, le Eleashibe, ₃₇le Mataneea, le Matenai, le Jaasau, ₃₈le Bani, le Binui, le Shimei, ₃₉le Shelemiea, le Nathane, le Adaea, ₄₀le Makenadebai, le Shashai, le Sharai, ₄₁le Asariele, le Shelemiea, le Shemariea, ₄₂le Shalōme, le Amariea, le Josefa. ₄₃Har'a bara ba Nebo e ne e le Jeiele, le Matiteea, le Sabada, le Sebina, le Jadai, le Joele, le Benaea.

₄₄Bana bohle ba ne ba nyetse basali ba balichaba, 'me ba leleka basali bao hammoho le bana ba bona.