Lefu la Sara
1Sara o ile a phela lilemo tse lekholo le mashome a mabeli a metso e supileng; tsena ke lilemo tsa bophelo ba Sara. 2Sara a shoela Kiriate-Areba, e leng Heborone, naheng ea Kanana. Aborahama a ea mo aparela bofifi, a mo llela.
3Aborahama a siea mofu oa hae, a ea bua le Bahete, a re: 4“Ke molata le mojaki har'a lōna; mpheng setša sa mabitla, ke tle ke e'o epela mofu oa ka ho sona.”
5Bahete ba araba Aborahama, ba re: 6“Ak'u re mamele, monghali. U khosana e matla har'a rōna; epela mofu oa hao lebitleng le letle-letle har'a mabitla a rōna. Ha ho le ea mong oa rōna ea tla u hanela ka lebitla, ho epela mofu oa hao.”
7Aborahama a ema, a isa hlompho ho Bahete, beng ba naha. 8A bua le bona, a re: “Haeba le utloisisa hore ke e'o epela mofu oa ka, 'mameleng he. Nkōpeleng Eferone, mora oa Sohara, 9hore a 'nee lehaha la Makapela, leo e leng la hae, le sebakeng seo tšimo ea hae e fellang ho sona. A ke a 'nee lona moo lōna le leng teng, ka theko e lokelang, e be setša sa ka sa mabitla.”
10Eferone o ne a lutse har'a Bahete, 'me Eferone oa Mohete a araba Aborahama moo Bahete bohle ba neng ba le khotla, khorong ea motse, ba ntseng ba utloa, a re: 11“Che, monghali, ak'u 'mamele. Ke u nea tšimo eo, ke u nea le lehaha le ho eona; ke u nea lona moo sechaba sa heso se leng teng. Epela bafu ba hao.”
12Aborahama a isa hlompho ho beng ba naha, 13'me a bua ho Eferone, moo beng ba naha ba ntseng ba utloa, a re: “Haeba u rata ha ke e reka, ak'u 'mamele hle. Ke tla reka tšimo eo ka chelete; e amohele, 'me ke tla epela bafu ba ka ho eona.”
14Eferone a araba Aborahama, a re: 15“Monghali, ak'u 'mamele. Tšimo eo theko ea eona e leng silefera e etsang boima ba likilo tse 'ne le halofo, hoo ke eng ho rōna le uena? Epela bafu ba hao.”
16Aborahama a lumellana le Eferone, 'me a mo lekanyetsa silefera eo a ileng a e bolela moo Bahete ba ntseng ba utloa, e leng silefera e etsang boima ba likilo tse 'ne le halofo, ho ea ka boima bo neng bo sebelisoa ke bahoebi.
17Tšimo ea Eferone e Makapela e pel'a Mamore, ke hore tšimo le lehaha le neng le le ho eona, le lifate tsohle tse neng li le tšimong ka bonamo ba eona, tsena tse neeloa 18Aborahama hore e be leruo la hae. Hona ha etsoa moo Behete bohle, ba neng ba le khotla, khorong ea motse oa Hete, ba ntseng ba bona. 19Kamora' tsena Aborahama a epela mosali oa hae Sara ka lehaheng la tšimo ea Makapela, e pel'a Mamore, e leng Heborone e naheng ea Kanana. 20Tšimo le lehaha le ho eona, tsa neoa Aborahama ke Bahete, hore e be setša sa hae sa mabitla.
