Isaka o nyala Rebeka
1Aborahama o ne a se a tsofetse, a atetsoe ke litšiu, 'me Morena o ne a mo hlohonolofalitse linthong tsohle. 2Joale Aborahama a re ho mohlanka oa hae, ea sebelitseng tlung ea hae halelele ho feta bohle, ea neng a okamela tsohle tseo a nang le tsona: “Ak'u bee seatla sa hao katlas'a serope sa ka, 3ke tle ke u hlapantše ka Morena, Molimo oa leholimo le Molimo oa lefatše, hore u ke ke ua nkela mora oa ka mosali ho barali ba Bakanana bao ke ahileng har'a bona, 4empa u tla ea naheng ea heso, le ho bang ka 'na, 'me u nkele mora oa ka Isaka, mosali teng.”
5Eaba mohlanka o re ho eena: “Mohlomong mosali eo a ke ke a lumela ho tla le 'na naheng ena; na joale ke tla tšoanela ho khutlisetsa mora oa hao naheng eo u tsoang ho eona na?”
6Aborahama a re ho eena: “Hlokomela hore u se ke ua khutlisetsa mora oa ka moo. 7Morena, Molimo oa leholimo, ea ileng a ntlosa tlung ea ntate le naheng eo ke ileng ka tsoalloa ho eona, o ne a bue le 'na, 'me a ntlhapanyetsa, a re: ‘Litlōhōlō tsa hao ke tla li nea naha ena.’ Ke eena ea tla rōmela lengeloi la hae ho u etella pele, 'me u tla nkela mora oa ka mosali hona teng. 8Empa haeba mosali eo a se rate ho tla le uena, e tla ba uena u lokolohile kanong ena eo u nketselitseng eona; feela ha e le mora oa ka, u se ke ua mo khutlisetsa moo.” 9Eaba mohlanka o bea seatla sa hae katlas'a serope sa Aborahama, mong'a hae, 'me a mo hlapanyetsa tabeng ena.
10Joale mohlanka a nka likamele tse leshome likameleng tsa mong'a hae, 'me a tsamaea a nkile mefuta eohle ea lintho tsa bohlokoa tsa mong'a hae. A ea Mesopotamia, motseng oa Nakore. 11A khumamisa likamele kantle ho motse, pel'a seliba, mantsiboea, e leng nako eo basali ba khang metsi ka eona.
12Eaba o re: “Morena Molimo oa mong'a ka Aborahama, ak'u nkatlehise kajeno, kea u rapela, u hauhele mong'a ka Aborahama. 13Bona, ke eme pel'a seliba, 'me barali ba batho ba motse ona ba tla tla ho kha metsi. 14Ho ke ho etsahale hore moroetsana eo ke tla re ho eena: ‘Ak'u rōle nkho ea hao ke noe,’ ebe o re ho 'na: ‘Noa, 'me ke tla noesa le likamele tsa hao,’ e be eena eo o mo khethetseng mohlanka oa hao Isaka. Ka hona ke tla tseba hore u hauhetse mong'a ka.”
15Eare a e-s'o qete ho bua, Rebeka, morali oa Bethuele ea tsoetsoeng ke Mileka, mosali oa Nakore, moena oa Aborahama, a hlaha a beile nkho lehetleng. 16Moroetsana enoa o ne a le motle haholo, a e-s'o lihuoe letsoèlè. A theohela selibeng, a tlatsa nkho ea hae, a nyoloha.
17Eaba mohlanka o mathela ho eena ho mo khahlanyetsa, o re: “Kea u rapela, ak'u mphe metsinyana nkhong ea hao ke noe.”
18Moroetsana a re: “Noa, monghali,” 'me a phakisa a theola nkho ea hae lehetleng, a mo noesa.
19Ha moroetsana a qetile ho mo fa metsi hore a noe, a re: “Ke tla khella le likamele tsa hao, ho fihlela le tsona li khotsoe.” 20A phakisa a tšollela metsi a ka nkhong ea hae senoellong sa liphoofolo, a boela a mathela selibeng ho kha metsi, 'me a khella likamele tsa hae kaofela. 21Monna eo a mo shebisisa a khutsitse, ho ithuta hore na Morena o atlehisitse leeto la hae kapa che.
22Eare hoba likamele li qete ho noa, monna eo a nka lesale la khauta le etsang boima ba likeramo tse hlano le halofo, le lipetja tsa khauta, tse peli tsa matsohong, tse etsang boima ba likeramo tse lekholo le leshome. 23Eaba o re: “U morali oa mang? Ak'u mpolelle hle. Na tlung ea ntat'ao re ka fumana sebaka sa ho robala?”
24Moroetsana a mo araba, a re: “Ke morali oa Bethuele, ea tsoetsoeng ke Mileka, le Nakore.” 25A boela a re ho eena: “Re na le seteroi le furu e lekaneng, le moo le ka robalang teng.”
26Eaba monna eo oa inama, o khumamela Morena, 27o re: “Ho bokoe Morena, Molimo oa mong'a ka Aborahama, ea sa kang a lebala mohau oa hae le botšepehi ba hae ho mong'a ka. Ha e le 'na, Morena o ntsamaisitse tseleng e nkisang tlung ea bana babo mong'a ka.”
28Joale moroetsana, a matha, a ea bolella ba ntlo ea 'm'ae tsena. 29Rebeka o ne a e-na le khaitseli ea hae, e bitsoang Labane; eaba Labane o mathela ho monna eo ea selibeng. 30Ha Labane a bona lesala le lipetja tse matsohong a khaitseli ea hae, 'me a utloa mantsoe a khaitseli ea hae, Rebeka, ha a re: “Monna eo o buile tjena le tjena ho 'na,” a ea ho monna eo; a mo fumana a eme pel'a likamele, selibeng. 31Labane a re: “Kena, uena ea hlohonolofalitsoeng ke Morena; u emetse'ng kantle? Ke se ke u lokiselitse ntlo le sebaka sa likamele.”
32Monna eo a kena ka tlung. Labane a qhanolla likamele, a li fa seteroi le furu; a fa monna eo metsi ho hlatsoa maoto a hae le ho hlatsoa maoto a banna ba neng ba e-na le eena. 33Eaba ho beoa lijo kapele ho eena, hore a je, empa eena a re: “Ha nka ke ka ja ke e-s'o bolele litaba tsa ka.”
Labane a re: “Bua.”
34Eaba o re: “Ke mohlanka oa Aborahama. 35Morena o hlohonolofalitse mong'a ka haholo, o mo entse hore e be morui. O mo file mehlape ea linku le ea likhomo, le silefera le khauta, le bahlanka le makhabunyane, le likamele le litonki. 36Sara, mohats'a mong'a ka, o ile a tsoalla mong'a ka mora boqhekung ba hae, 'me mong'a ka o neile mora enoa tsohle tseo a nang le tsona. 37Joale o ile a ntlhapantša, a re: ‘U se ke ua nkela mora oa ka mosali ho barali ba Bakanana, bao ke ahileng naheng ea bona. 38U tla ea tlung ea ntate le ho bang ka 'na, 'me u nkele mora oa ka mosali.’
39“Eaba ke re ho mong'a ka: ‘Mohlomong mosali eo a ke ke a lumela ho tla le 'na.’
40“Empa eena a re ho 'na: ‘Morena eo ke mo khahlisang ka metsamao ea ka, o tla rōma lengeloi la hae le tsamaee le uena, 'me a atlehise leeto la hao. U tla nkela mora oa ka mosali ho bang ka 'na, tlung ea ntate. 41Joale e tla ba u lokolohile kanong ea hao, ha u ka fela ua fihla ho bang ka 'na. Le teng haeba ba sa u nee mosali eo, e tla ba u lokolohile kanong ea hao.’
42“Kajeno ha ke fihla selibeng ke ile ka re: ‘Morena, Molimo oa mong'a ka Aborahama, haeba joale u ka atlehisa leeto la ka, 43ho ke ho etsahale tjena. Ke eme selibeng mona. Ha moroetsana a ka tla ho kha metsi, ke tla re ho eena: Ak'u mphe metsinyana nkhong ea hao, ke noe. 44Ha a ka re: Noa, 'me ke tla khella le likamele tsa hao, e tla ba ke eena mosali eo Morena a mo khethetseng mora oa mong'a ka.’
45“Eare ke e-s'o qete ho bua ka pelong ea ka, ka bona Rebeka a e-tla, a beile nkho lehetleng la hae, 'me a theohela ka selibeng, a kha metsi. Eaba ke re ho eena: ‘Kea u rapela, ak'u mphe metsi ke noe.’
46“A phakisa a theola nkho ea hae lehetleng, 'me a re: ‘Noa, 'me ke tla noesa le likamele tsa hao.’ Ka noa, 'me a noesa le likamele.
47“Ka nt'o 'motsa, ka re: ‘U morali oa mang?’
“A araba, a re: ‘Ke morali oa Bethuele, ea tsoetsoeng ke Nakore le Mileka.’
“Eaba ke mo roesa lesale nkong, le lipetja matsohong. 48Joale ka inama, ka khumamela Morena, 'me ka boka Morena Molimo oa mong'a ka Aborahama, ea ileng a ntsamaisa ka tsela e nepahetseng, hore ke tl'o nkela mora oa mong'a ka morali oa moena oa hae.
49“Joale, ha le rata ho bontša mohau le botšepehi ho mong'a ka, mpolelleng. Le teng haeba ho se joalo, mpolelleng, e le hore ke tle ke tsebe ho thinyetsa ka letsohong le letona kapa ka ho le letšehali.”
50Eaba bo-Labane le Bethuele baa araba, ba re: “Taba ena e tsoa ho Morena; re ke ke ra bua le uena hampe kapa hantle. 51Rebeka ke enoa kapele ho uena; mo nke, 'me u tsamaee le eena, e e'o ba ngoetsi ea mong'a hao, ho ea kamoo Morena a boletseng kateng.”
52Ha mohlanka oa Aborahama a utloa mantsoe ana, a inama kapele ho Morena. 53Eaba mohlanka o ntša mekhabiso ea silefera le mekhabiso ea khauta, le liaparo, o li nea Rebeka. A nea le khaitseli ea hae le 'm'ae limpho tsa bohlokoa.
54Joale eena le banna ba nang le eena ba e-ja, ba e-noa, 'me ba hlola bosiu moo. Ha ba tsoha hoseng, mohlanka a re: “Ntokolleng, ke khutlele ho mong'a ka.”
55Labane, khaitseli ea Rebeka, le 'm'ae ba re: “Moroetsana ha a ke a lule le rōna matsatsi a se makae, bonyane matsatsi a leshome; kamorao ho moo a ka tsamaea.”
56Empa a re ho bona: “Le se ke la ntiehisa, kaha Morena o atlehisitse leeto la ka; ntokolleng, ke khutlele ho mong'a ka.”
57Ba re: “Re tla bitsa moroetsana, re utloe maikutlo a hae.”
58Joale ba bitsa Rebeka, 'me ba re ho eena: “Na u tla tsamaea le monna eo?”
Eena a araba, a re: “Ke tla tsamaea le eena.”
59Eaba ba lokolla khaitseli ea bona Rebeka, le mohōlisi oa hae, le mohlanka oa Aborahama le banna ba hae. 60Ba hlohonolofatsa Rebeka, ba re ho eena:
“Khaitseli ea rōna,
u ke u be 'm'a likete tsa likete;
litlōhōlō tsa hao
li ke li hape metse,
li hape metse ea lira tsa tsona.”
61Eaba Rebeka le makhabunyane a hae baa ema, ba palama likamele, ba tsamaea le monna eo. Mohlanka a nka Rebeka, a tsamaea.
62Isaka o ne a e-tsoa Selibeng sa Lakai-Roi, kaha o ne a ahile naheng e ka boroa. 63Mantsiboea Isaka a ea naheng ho ea imamela, 'me eitse ha a phahamisa mahlo, a talima, a bona likamele li e-tla. 64Rebeka a phahamisa mahlo, 'me eare ha a bona Isaka a thōlōha kamele. 65Eaba o re ho mohlanka: “Ke mang monna eloa ea tsamaeang mola, ea tlil'o re khahlanyetsa?”
Mohlanka a araba, a re: “Ke mong'a ka.”
Joale Rebeka a nka lesira la hae, a ikhurumetsa. 66Mohlanka a bolella Isaka lintho tsohle tseo a ileng a li etsa. 67Isaka a isa Rebeka ka tenteng ea 'm'ae Sara; eaba oa mo nka, e ba mosali oa hae, 'me a mo rata. Isaka a tšeliseha kamora' lefu la 'm'ae.
