Josefa o hlalosa litoro
1Ha tsena li se li fetile, moqhatsetsi oa khosi ea Egepeta le moapehi oa eona ba khopisa morena oa bona, khosi ea Egepeta. 2Faro a halefela basebeletsi bao ba hae ba babeli, e leng moqhatsetsi e moholo, le moapehi e moholo, 3'me a ba bea tlung ea mookameli oa balebeli, e ka chankaneng, moo Josefa a neng a koaletsoe teng. 4Mookameli oa balebeli ba chankana a laela Josefa hore a ba sebeletse, a ba fepe, 'me ba qeta nako e itseng ba ntse ba koaletsoe.
5Ka bosiu bo bong, ba neng ba koaletsoe chankaneng, e leng moqhatsetsi le moapehi oa khosi ea Egepeta, bobeli ba bona ba lora litoro; monna ka mong a lora toro ea hae, e nang le tlhaloso ea eona.
6Hoseng, ha Josefa a kena ka ho bona, a ba sheba, a bona ba tšoenyehile. 7Eaba o botsa basebeletsi bao ba Faro ba neng ba koaletsoe le eena tlung ea mong'a hae, o re: “Ke'ng ha lifahleho tsa lōna li hloentse kajeno?”
8Ba re ho eena: “Re lorile litoro, 'me ha ho ea ka re hlalosetsang tsona.”
Josefa a re ho bona: “Na litlhaloso hase tsa Molimo? Mpolelleng litoro tseo, kea le kōpa.”
9Eaba moqhatsetsi e moholo o phetela Josefa toro ea hae, o re ho eena: “Torong ea ka ke bone sefate sa morara se le kapele ho 'na, 10'me sefateng seo sa morara ho ne ho e-na le makala a mararo. Eare ha se fuputsa, sa be se se se thunya hang-hang, 'me morara o butsoa. 11Senoelo sa Faro se ne se le ka letsohong la ka; eaba ke nka morara, ke o tlhotlela ka senoelong seo sa Faro, ka se nea Faro letsohong.”
12Josefa a re ho eena: “Tlhaloso ea eona ke ena: makala a mararo ke matsatsi a mararo. 13Kamora' matsatsi a mararo Faro u tla u ntša chankaneng, a u busetse mosebetsing oa hao, 'me u tla nea Faro senoelo sa hae letsohong joaloka pele, ha u ne u le moqhatsetsi oa hae. 14Feela u 'ne u nkhopole ha u se u lokolohile. Kea u kōpa, u ntsoele molemo, u bue ka 'na ho Faro, u 'ntše tlung ena. 15Ruri 'na ke utsoitsoe naheng ea Baheberu, 'me le mona ha kea etsa letho la hore ebe ba nkentse chankaneng.”
16Ha moapehi e moholo a bona hore tlhaloso eo ea thabisa, le eena a re ho Josefa: “Le 'na ke ile ka lora toro. Ke ne ke roetse lirōtō tse tharo tsa bohobe; 17serōtōng se kaholimo-limo ho ne ho e-na le mefuta eohle ea lijo tseo ke li apehetseng Faro, empa linonyana li ne li li ja, li li ntša ka serōtōng se hloohong ea ka.”
18Josefa a arabela, a re: “Tlhaloso ea eona ke ena: lirōtō tse tharo ke matsatsi a mararo. 19Kamora' matsatsi a mararo, Faro u tla u ntša chankaneng, a u khaole hlooho, a u leketlise sefateng, 'me linonyana li tla ja nama ea hao.”
20Joale ka letsatsi la boraro, leo e neng e le letsatsi la tsoalo ea Faro, Faro a etsetsa bahlanka ba hae bohle mokete. A ntša moqhatsetsi e moholo le moapehi e moholo chankaneng, moo bahlanka ba hae ba ntseng ba bona. 21A busetsa moqhatsetsi e moholo mosebetsing oa hae oa boqhatsetsi, 'me a nea Faro senoelo letsohong, 22empa Faro a fanyeha moapehi e moholo joalokaha Josefa a ne a ba hlaloselitse.
23Moqhatsetsi e moholo a se ke a hlola a hopola Josefa, a mo lebala.
