Bana babo Josefa ba khutlela Egepeta le Benjamine
1Naheng ea Kanana tlala e ne e le ea bo-ja-likata. 2Eare ha ba qetile ho ja koro eo ba neng ba e setse Egepeta, ntat'a bona a re ho bona: “Khutlelang Egepeta, le e'o re sella hape.”
3Eaba Juda oa araba, o re: “Monna eo o re hlokomelisitse a tiile, a re: ‘Le ke ke la bona sefahleho sa ka, haese ha le tlile le moen'a lōna.’ 4Haeba u re lumella ho ea le moen'a rōna, re tla theoha, re e'o u sella. 5Empa ha u sa lumele, ha re ka ke ra theoha, hobane monna eo o itse ho rōna: ‘Le ke ke la bona sefahleho sa ka, haese ha le tlile le moen'a lōna.’ ”
6Iseraele a re: “Le nketselitse'ng hampe, ka ho tsebisa monna eo hore ngoan'abo lōna e mong o teng?”
7Ba araba, ba re: “Monna eo o ile a re botsisisa tsa rōna le tsa bang ka rōna, a re: ‘Na ntat'a lōna o sa phela? Na le sa na le ngoan'abo lōna e mong?’ Seo re 'moleletseng sona e bile karabo ea lipotso tsena. Re ne re ka tseba joang hore qetellong o tla re: ‘Tloong le moen'a lōna’?”
8Joale Juda a re ho ntat'ae, Iseraele: “Ntumelle ho tsamaea le mohlankanyana, 'me re tla ea, e le hore re tle re phele, re se ke ra shoa, rōna le uena, le bana ba rōna. 9Ke itlama ka eena; u tla 'matla ho 'na. Ha ke sa mo khutlisetse ho uena, ka 'mea matsohong a hao, ke tla ba molato ho uena bophelong ba ka bohle. 10Hoja ha rea ka ra lieha, joale re ka be re se re boetse habeli.”
11Joale ntat'a bona Iseraele a re ho bona: “Ha ho tlameha ho ba joalo, etsang tjena: Nkang litholoana tse khahlehang tsa naha ena, le li tšèlè ka mekotleng ea lōna, le li ise ho monna eo e le mpho: e be litlolo, mahe a linotši, boroku, 'mira, le litholoana tsa sefate sa hoki, le tsa sefate sa mofuta oa perekisi. 12Nkang chelete e lekanang le ea pele habeli, le busetse le chelete e neng e khutle e kentsoe ka melomong ea mekotla ea lōna, mohlomong e ne e khutle ka phoso. 13Nkang le eena moen'a lōna, le tsamaee le khutlele ho monna eo. 14Molimo ea matla 'ohle a ke a le fumantše mohau ho monna eo, e le hore a tle a khutlise ngoan'abo lōna e mong, esita le eena Benjamine, empa haeba 'na ke amohuoa bana, ke hle ke ba amohuoe.”
15Kahoo banna bana ba nka limpho, ba nka le chelete e lekanang le ea pele habeli, le eena Benjamine, ba tsamaea ba theohela Egepeta, 'me ba ea itlhahisa kapele ho Josefa. 16Ha Josefa a bona Benjamine a e-na le bona, a re ho mookameli oa lelapa la hae: “Isa banna bana lapeng ha ka. U hlabe phoofolo, u e phehe, hobane ke tla ja lijo tsa motšeare le bona.” 17Monna eo a etsa kamoo Josefa a boletseng kateng, a isa banna bao tlung ea Josefa.
18Banna bao ba tšoha, hobane ba ne ba isitsoe tlung ea Josefa, 'me ba re: “Ke ka baka la chelete e neng e busetsoe ka mekotleng ea rōna ka lekhetlo la pele, re tlisitsoeng mona, hore a tle a re lōhele mano, a re tšoare, a re etse makhoba a hae, a nke le litonki tsa rōna.”
19Joale ba atamela mookameli oa lelapa la Josefa, ba bua le eena a le monyako oa ntlo, 20ba re: “Oho, moren'a ka, ke 'nete re ne re theohele koano lekhetlo la pele ho tla sela. 21Eare ha re fihla moo re robalelitseng teng, re qhaqholla mekotla ea rōna, e mong le e mong oa rōna a fumana chelete ea hae ka molomong oa mokotla oa hae, e ntse e le boimeng ba eona ba pele; joale re e khutlisitse. 22Re tlile le chelete e 'ngoe hape, eo re tla sela ka eona. Ha re tsebe ea ileng a kenya chelete ea rōna ka mekotleng ea rōna.”
23Eena a re: “Khobang matšoafo; se tšabeng! Molimo oa lōna, le Molimo oa ntat'a lōna, ke eena ea le neileng letlotlo leo le ka mekotleng ea lōna. Ke ile ka amohela chelete ea lōna.” Joale a ba tlisetsa Simeone.
24Monna eo a ba isa tlung ea Josefa, a ba fa metsi, ba itlhatsoa maoto; a fepa le litonki tsa bona. 25Eaba bona ba lokisa limpho, ba emela hore Josefa a tle lapeng, motšeare o moholo, kaha ba ne ba utloile hore ba tla tla ja le eena.
26Ha Josefa a se a fihlile hae, ba mo nea limpho tseo ba tlileng le tsona, ba inama kapele ho eena. 27Joale a ba botsa bophelo, a re: “Na ntat'a lōna, monna-moholo eo le ileng la bua ka eena, o ea hantle? Na o ntse a phela?”
28Ba re: “Mohlanka oa hao, ntat'a rōna, o ea hantle; o sa ntse a phela.” Ba inama, ba itihela fatše.
29Ha a phahamisa mahlo, a bona ngoan'abo Benjamine, eo ba nyantseng letsoele le le leng le eena, 'me a re: “Na eo ke moen'a lōna oa ho fela, eo le ileng la bua ka eena ho 'na?” Eaba o re ho Benjamine: “Molimo a ke a u hauhele, mora oa ka!” 30Josefa a phakisa a tloha, kaha maikutlo a hae a ne a tšoenyehile ka baka la ngoan'abo, a batla moo a ka llelang teng; eaba o kena ka kamoreng e kahare, o llela kateng.
31Eaba oa iphotla, oa tsoa, 'me a itiisa, a re: “Tlisang lijo!”
32Ba 'meela tsa hae a le mong, le tsa bona ba le bang, le tsa Baegepeta ba jang le eena ba le bang, hobane Baegepeta ha ba lokele ho ja le Baheberu, kaha hoo ke manyala ho Baegepeta. 33Kahoo Baheberu ba lulisoa ba shebane le eena, e moholo ho ea ka tokelo ea hae ea boholo ba hae, le e monyenyane ho ea ka bonyenyane ba hae. Banna bao ba shebana ba maketse. 34Eaba Josefa o laela hore ba abeloe lijo tse kapele ho eena, 'me seabo sa Benjamine sa feta tsa ba bang bohle hahlano. Ba e-noa, 'me ba thaba le eena.
