Botle ba Tempele e ncha
1Ka letsatsi la mashome a mabeli a motso o mong la khoeli ea bosupa, Morena a bua ho moporofeta Hagai, a re: 2“Bua ho Serubabele, mora oa Shealetiele, 'musisi oa Juda, le ho Joshua, mora oa Jehosadake, Moprista e Moholo, le ho masalla 'ohle a sechaba, u ba botse, u re: 3‘Na ho sa na le ea mong har'a lōna ea ka hopolang kamoo Tempele ee e neng e le ntle kateng mehleng ea pele? Kajeno le e bona e le joang? Na ha le bone e se letho? 4Empa joale beta pelo, uena Serubabele!’ ho rialo Morena. ‘Beta pelo, uena Joshua, mora oa Jehosadake, Moprista e Moholo! Betang pelo, lōna sechaba sohle sa naha ena!’ ho rialo Morena. ‘Sebetsang, hobane ke na le lōna,’ ho rialo Morena oa mabōtho. 5‘Joalokaha ke ne ke le tšepise mohla le tsoang Egepeta, ke ntse ke e-na le lōna ka Moea, le se tšabe letho.’
6“Morena oa mabōtho o bua tjena: ‘Haufinyane ke tla boela ke reketlisa maholimo le lefatše, le maoatle le mobu o sebataōlo. 7Ke tla sisinya lichaba tsohle, 'me matlotlo a lichaba kaofela a tla tlisoa ka Tempeleng, e be e tlale tlōtla ea ka,’ ho rialo Morena oa mabōtho. 8‘Silefera ke ea ka, le eona khauta ke ea ka,’ ho rialo Morena oa mabōtho. 9‘Tlōtla ea Tempele ena e ncha e tla feta tlōtla ea Tempele ea pele,’ ho rialo Morena oa mabōtho. ‘Ke tla tlisa khotso ka tlung ena,’ ho rialo Morena oa mabōtho.”
Moporofeta o botsa baprista
10Ka letsatsi la mashome a mabeli a metso e mene la khoeli ea borobong, ka selemo sa bobeli sa puso ea Dariuse, Morena a bua ho moporofeta Hagai, a re: 11“Morena oa mabōtho o bua tjena: ‘Botsa baprista hore na Molao o re'ng: 12Ha motho a ka phuthela nama e halalelitsoeng ka lemeno la kobo ea hae, ebe lemeno leno le thetsa bohobe, kapa lesheleshele, kapa veine, kapa ole, kapa sejo se seng feela, na tseo le tsona li tla halaletsoa?’ ”
Baprista ba mo araba, ba re: “Che!”
13Eaba Hagai o re: “Haeba motho ea silafalitsoeng ke ho ama setōpō a ka thetsa e 'ngoe ea lintho tseo tse boletsoeng, na li ka silafala?”
Baprista ba mo araba, ba re: “E, li tla silafala.”
14Eaba Hagai o re: “ ‘Ho joalo le ho batho bana, le ho sechaba sena se kapele ho 'na,’ ho rialo Morena. ‘Mesebetsi eohle ea matsoho a sona e joalo, le tseo se nyehelang ka tsona ka Tempeleng li silafetse.
Morena o ba tšepisa tlhohonolofatso ea hae
15“ ‘Joale kea le kōpa: Ho tloha kajeno nahanang se ileng sa etsahala mehleng ea pele, le e-s'o ka le tsosa Tempele ea Morena. Ho ne ho le joang? 16Ha motho a ne a e-ea setheng sa mabele, seo a lekanyang hore se etsa boima ba likilo tse makholo a mabeli, o ne a fumana tse lekholo feela. Ha e mong a ne a e-ea morifing oa veine, ho ea kha lilethara tse lekholo, o ne a fumana tse mashome a mane feela. 17Ke ile ka senya lijalo tsa lōna ka phori, le ka boroku, le ka sefako, empa ha lea ka la khutlela ho 'na,’ ho rialo Morena. 18'Ho tloha kajeno, ho tloha hona ka tsatsi lena la mashome a mabeli a metso e mene la khoeli ea borobong, hopolang letsatsi lena leo ka lona ho neng ho etsoe mothèo oa Tempele ea Morena. Hopolang letsatsi lena hantle: 19Na ho sa na le peō e setseng ka sesiung? Ho fihlela joale lifate tsa morara, le tsa feiee, le tsa likharenate, le tsa mohloaare, ha li e-s'o behe litholoana!
“ ‘Ho tloha ka tsatsi lena, ke tla le hlohonolofatsa.’ ”
Morena o etsetsa Serubabele tšepiso
20Ka letsatsi la mashome a mabeli a metso e mene la khoeli, Morena a boela a bua ho Hagai, a re: 21“Bolella Serubabele, 'musisi oa Juda, hore ke tla reketlisa maholimo le lefatše. 22Ke tla phethōla literone tsa likhosi, ke felise matla a mebuso ea balichaba. Ke tla phethōla likariki tsa ntoa le ba li palameng; lipere li tla shoa, le bapalami ba tsona ba bolaeane ka lisabole tsa bona.
23“Mohl'a tsatsi leo, uena mohlanka oa ka, Serubabele, mora oa Shealetiele, ke tla u nka, ke u sebelise joaloka lesale la ka la tiiso, hobane ke u khethile,” ho rialo Morena oa mabōtho.
