Moprista e Moholo oa selekane se secha
1Taba-taba ea tseo ke li boletseng ke ena: Re na le Moprista e Moholo ea joalo, ea lutseng ka letsohong le letona la terone ea Ea Holimo-limo, maholimong. 2Ke mosebeletsi oa Sehalalelo, le oa tente ea 'nete e hlomiloeng ke Morena, e seng ke motho.
3Moprista e mong le e mong e Moholo o beetsoe ho nyehela ka limpho le ka mahlabelo; ka baka leo, Moprista oa rōna e Moholo le eena o tlameha ho ba le ho hong hoo a ka nyehelang ka hona. 4Hoja o ne a le lefatšeng, e ne e ke ke ea e-ba moprista, kaha ho na le baprista ba bang ba nyehelang ka limpho, ho ea ka Molao oa Moshe. 5Feela bosebeletsi ba bona ke mohlala le setšoantšo sa tse maholimong, joalokaha Molimo a ile a lemosa Moshe, ha a le lekhatheng la ho hloma Tente, a re: “Bona, u tla etsa tsohle ho latela seo u neng u se bontšoe ha u le thabeng.” 6Joale Jesu o neiloe bosebeletsi bo fetang ba bona, kaha e le 'moelanyi oa Molimo le batho ka selekane se theiloeng holim'a litšepiso tse ntle ho feta tsa pele.
7Ha e ne e ba selekane sane sa pele se ne se sa nyatsehe, ho ka be ho sa ka ha hlokahala hore ho be le selekane sa bobeli. 8Empa joale Molimo o nyatsa sechaba sa hae, ha a re:
“Bonang, matsatsi aa tla,
ho rialo Morena,
ao ka 'ona
ke tla etsa selekane se secha,
ke se etse le ba ntlo ea Iseraele,
le ba ntlo ea Juda.
9Ha se na ho tšoana
le selekane seo ke neng ke se etse
le bahōlō-hōlō ba bona,
ha ke ne ke ba tšoere ka letsoho,
ke ba ntša naheng ea Egepeta.
Kahobane ha baa ka ba tiisetsa
selekaneng sa ka,
le 'na ha kea ka ka ba natsa,
ho rialo Morena.
10Selekane seo ke tla se etsa
le ba ntlo ea Iseraele,
hoba matsatsi ao a fete,
ho rialo Morena, ke sena:
Ke tla kenya molao oa ka
maikutlong a bona,
ke o ngole
kahar'a lipelo tsa bona;
ke be Molimo oa bona,
bona e be sechaba sa ka.
11Motho ha a sa tla hlola
a ruta ea ahisaneng le eena,
leha e le ngoan'abo,
a re: ‘Tseba Morena!’
hobane ba tla ntseba bohle,
ho tloha ho ea eisehang
ho isa ho ea hlomphehang.
12Ke tla ba tšoarela
makhopo a bona,
ha ke sa tla hlola
ke hopola libe tsa bona.”
13Ha e le moo a bua ka selekane se secha, ke hobane sa pele o se tsofalitse; 'me ntho e tsofalang, e onelang, eba e haufi le ho fela.
