ESAEA 13

₂Phahamisang mokhele

holim'a thaba e phōllatsi,

ba hōoeletseng,

le ba hoèhlè ka letsoho,

e le hore ba kene

khorong tsa mahosana.

₃Mokhetho oa bahlabani ba ka

ke se ke o laetse,

bahale ba ka ke ba bitsitse,

ho phethahatsa khalefo ea ka,

bona ba thabelang ho hlōla ha ka.

₄Ho utloahala molumo oa letšoele

har'a lithaba,

molumo o kang

oa sekhakhathahali sa batho!

Ho utloahala molumo oa mebuso,

lereberebe la mebuso

ea lichaba li phuthehile!

Moren'a mabōtho

o khōbōkanya mabōtho a ntoa!

₅A tsoa naheng e hōle,

pheletsong tsa leholimo,

Morena o tla ka lihlomo

tsa khalefo ea hae,

hore fatše lohle a tle a le timetse.

₆Bokollang,

tsatsi la Morena le se le le haufi!

Le tla e le la timetso,

le e-tsoa ho Ea Matla 'ohle!

₇Ka baka leo, matsoho 'ohle

a tla tepella,

batho bohle ba felloe ke tšepo.

₈Ba tla keneloa ke tšabo,

mahlaba le bohlōkō li tla ba menya;

ba tla meneka

sa mosali a kena tlung,

motho a shebane le oa habo

ka ho makala,

fahleho tsa bona li fubele,

li fubele sa malakabe.

₉Bonang, tsatsi la Morena

ke lena lea tla!

Le tla ka sehlōhō le ka khalefo,

ka bohale bo tlōkōmang,

le tla ho fetola lefatše

e be nanaola;

ka tsatsi leo

baetsalibe o tla ba timetsa.

₁₀Naleli tsa leholimo

le Makolobe a tsona,

khanya ea tsona

e ke ke ea bonahala,

tsatsi le tla fifala ha le chaba,

khanya ea khoeli le eona e be sieo.

₁₁Lefatše ke tla le otla,

ke le otlele bokhopo ba lona,

ba khopo le bona ke ba otle,

ke ka otlele libe tsa bona,

boikakaso ba ba itjang

ke bo felise,

boikhōhōmōso ba bompoli

ke bo kokobetse.

₁₂Ke tla etsa hore motho a hlokehe,

sa khauta e hloekisitsoe,

a hlokehe sa khauta ea Ofire.

₁₃Ke tla etsa hore

maholimo a thōthōmele,

fatše le be le suthe

malulong a lona,

tsena li tla bakoa

ke khalefo ea Moren'a mabōtho,

mohl'a tsatsi la bohale

bo tlōkōmang ba hae.

₁₄Joaloka khama e balehang setsomi,

joaloka linku tse hlokang molisa,

motho ka mong

o tla khutlela chabeng sa habo,

motho ka mong

a balehele naheng ea habo.

₁₅Bohle ba tla thōpuoa

ba tla phehletsoa ka lerumo,

bohle ba tla tšoaroa

ba bolaoe ka sabole.

₁₆Bana ba bona ba tla thuakoa

ba ntse ba ba bona,

matlo a bona a lobeloe,

basali ba bona ba betoe.

₁₇Ke tla hlohleletsa Bamede

ba ba tsohele matla,

Bamede ba sa tsotelleng

bohlokoa ba silefera,

bona bao khauta

e ke keng ea ba hohela.

₁₈Liqha li tla rōbōka bacha,

ba fetohe litsekana,

baimana bona ba ba hlokele mohau,

leha e le hona

ho utloela bana bohlōkō.

₁₉Uena Babilona, tlōtla ea mebuso,

mokhabo oo Bakalatiea

ba leng motlōtlō ka oona,

Molimo o tla u timetsa

sa Sodoma le Gomora!

₂₀U ke ke ua hlola u e-ba le baahi,

u tla ba hloka ka melōko le melōko,

ha ho Moarabia

ea tla hloma tente ea hae moo,

le balisa ba ke ke ba etsa

metebo ea bona moo.

₂₁Batana tsa lehoatata

li tla botha moo,

liphōōkō le tsona li hahele teng,

ebe moo limpshe li phelang teng,

lithotsela li tlōlake teng;

li tlolake li nyakaletse.

₂₂Mafiritšoane a tla ngaea

ka qhobosheaneng tsa hao,

phokojoe li ngaee

ka matlung a hao a bokhosi.

Nako ea timelo ea Babilona

e atametse,

matsatsi a eona a ke ke a lelefatsoa.