Boporofeta malebana le Jerusalema
1Bona ke boporofeta malebana le Khohlo ea Pono:
Ebe joale molato ke ofe
ha e le moo
le hloeletse holim'a matlo?
2Uena motse o tletseng meferefere!
Motse oa lerata le melilietsane!
Babolauoa ba hao
ha baa bolaoa ka sabole,
babolauoa ba hao
ha baa shoela ntoeng.
3Babusi ba hao bohle
ba balehile 'moho,
ba thōpiloe ba e-s'o fule ka liqha.
Bohle ba fumanoeng kahare ho uena
ba tšoeroe 'moho,
le hoja ba ne ba balehetse hōle.
4Ka baka leo, ke ile ka re:
“Se keng la ncheba,
ke lle sa 'mokotsane;
se ikhathatseng ka ho ntšelisa,
ha morali oa chaba sa heso
a timelitsoe.”
5Tsatsi lena ke la mekutu,
la ho hatakeloa, le la tšabo,
tsatsi le laotsoeng ke Morena,
Molimo oa mabōtho,
ka Khohlong ea Pono,
rata la ho heletsoa ha marako
le tla utloahala koana mahaheng.
6Elame ea jara sehlajoe sa metsu,
ea futuha le ka bapalami ba lipere,
Kire eona ea ntša thèbè ea eona.
7Khohlo tsa hae tse ntle
li tletse kariki tsa ntoa,
bapalami bona ba teile thekō
khorong ea motse,
8qhobosheane tsa Juda
tsona li helelitsoe.
Tsatsing leo la hlahloba hlomo
li le ka Tlung ea Moru,
9la bona bongata ba kheo tsa lerako
la Motse oa Davida,
la thiba metsi a Letšana le Katlase.
10Matlo a Jerusalema le a balile,
la heletsa matlo hore le tiise lerako.
11Pakeng tsa marako a mabeli
la haha letamo,
la le hahela ho thibela metsi
a Letšana la Khale;
empa la se ke la natsa
Moetsi oa lona,
kapa la tsotella
ea le rerileng khale-khale.
12Ka tsatsi leo Morena,
Moren'a mabōtho, a le bitsa,
a le bitsetsa ho lla
le ho ba bofifing,
ho beola moriri
le ho apara tse mahoashe.
13Empa ea e-ba thabo,
ea e-ba nyakallo,
ha hlajoa makhomo,
ha hlajoa manku,
ha jeoa linama, ha nōoa veine!
“A re jeng, re inoelleng,”
lōna la rialo,
“hobane hosasane
re tla be re shoele!”
14Morena oa mabōtho o ile a senola tsena, moo ke utloang, a re: “Ruri bokhopo bona bo ke ke ba tšoareloa ho fihlela le e-shoa,” ho rialo Morena Molimo oa mabōtho.
Ho khalemeloa Shebena
15Morena Molimo oa mabōtho, a bua, a re:
“E-ea ho Shebena,
e leng ramatlotlo,
le molebeli oa ntlo ea khosi,
u re ho eena:
16‘U etsa'ng moo,
ka tumello ea mang,
ha u ntse u ichekela lebitla,
u le cheka moo ho phahamileng,
u ipetlela lebitla
la phomolo lefikeng?’
17“Bona, Morena o khatheng
la ho u tšoara,
a u akhele hōle, uena senatla tooe!
18Ruri o tla u phutha-phutha
ka thata sa pilikoane,
a u lahlele har'a naha e nammeng.
U tla ea shoela naheng eo,
le kariki tseo u itlōtlang ka tsona
li felle moo,
uena ea tlontlolotseng
lapa la mong'a hao.
19Ke tla u tlosa tulong tsa hao,
ke u hlobolise boemo ba hao.
20“Ka tsatsi leo, ke tla bitsa mohlanka oa ka Eleakime, mora oa Hilekiea. 21Ke tla mo apesa seaparo sa hao, ke mo tlame ka senyepa sa hao, le matla a hao a ho busa a be matsohong a hae. Eena e tla ba ntata ho baahi ba Jerusalema le ho ba ntlo ea Juda. 22Ke tla mo nea linotlolo tsa ntlo ea Davida; ha a butse ha ho ea tla koala, ha a koetse ha ho ea tla bula. 23Ke tla mo khokhothela sebakeng se tiileng joalokaha eka ke thakhisa, 'me e be terone e tlōtlehang ea lapa la ntat'ae. 24Tlōtla eohle ea lapa labo e tla ba holim'a hae; ea litlōhōlō le ea litlōhōloana, ea lijana tsohle tse nyenyane, le ea lipitsa tsohle tsa mepotjoana.
25“Ka tsatsi leo,” ho rialo Morena oa mabōtho, “thakhisa e khokhothetsoeng moo ho tiileng e tla khokhotholloa, e khaoloe, e oele fatše, 'me tsohle tse neng li itšoareletse ka eona li tla senyeha,” ho rialo Morena.
