ESAEA 26

Re na le motse o matla,

ka marako le metero ea oona

Molimo oa re pholosa.

₂Bulang menyako ea motse,

chaba se lokileng se kene,

chaba se tšepahalang se kene.

₃U boloka khotso

ea ba maikutlo a tsitsitseng,

hobane bona ba fela ba u tšepile.

₄Itšepele Morena kamehla eohle,

hobane Morena Molimo,

ke Fika la mehla eohle.

₅Ba tulong tse phahameng

oa ba theola,

motse o phahameng a o kokobetse,

a o heletse o oele fatše,

a o theolele tlase, lerōleng.

₆O tla hatakeloa ka maoto,

o hatakeloe ke maoto a mafutsana,

o hatakeloe ke mehato ea bahloki.

₇Tsela ea ea lokileng

ha e na makukuno,

uena Ea Lokileng

u batalatsa tsela ea hae.

₈Oho, Morena, re u emetse,

re tsamaea tseleng

ea likahlōlo tsa hao;

lebitso la hao le botumo ba hao

ke tsona tseo re li labalabelang.

₉Moea oa ka o u tsetselela bosiu,

pelo ea ka le eona

e u hlōlōhetsoe haholo.

Ha kahlōlo tsa hao

li phethoa lefatšeng,

baahi ba lefatše

ba tla ithuta ho loka.

₁₀Leha ba khopo ba ka hauheloa,

ha ba ke be ba ithute ho loka;

leha ba ka phela naheng ea toka,

ba tsoela pele

ho 'na ba etsa bokhopo,

botlotlehi ba Morena

ba se ke ba bo bone.

₁₁Tsoho la hao

le phahamisitsoe, Morena,

empa batho bana bona

ha ba le bone;

ak'u ba bontše

ha u chesehela chaba sa hao,

ba bone, 'me lihlong li ba aparele,

mollo o chesang lira tsa hao

o ba timetse.

₁₂Morena, u re thèèla khotso,

hoba mesebetsi eohle ea rōna

e phethiloe ke uena.

₁₃Oho, Morena Molimo oa rōna,

babusi ba bang ba kile ba re busa,

empa ke bitso la hao feela

leo re le tlōtlang.

₁₄Ba shoele,

ba ke ke ba hlola ba phela,

ba mabitleng,

ba ke ke ba hlola ba tsoha;

u ba otlile, ua ba ua ba timetsa,

ua etsa hore

ba se hlole ba hopoleha.

₁₅Oho, Morena,

u se atisitse sechaba,

u se atisitse, ua tlōtleha ke hona;

ua namisa meeli ea naha.

₁₆Morena, ba tlile ho uena

ba tsielehile,

ha u ba khalema eaba baa u rapela.

₁₇Joalokaha moimana

ea khatheng la ho beleha

a ee a meneke,

a llisoe ke mahlaba a hae,

le rōna re bile joalo

mahlong a hao Morena.

₁₈Re ne re le baimana,

re meneka ke mahlaba,

empa ha re pepa

ra beleha moea feela.

Fatše la rōna

ha rea le tlisetsa pholoho,

ba tla aha ho lona

le bona ha baa tsoaloa.

₁₉Bafu ba lōna

ba tla boela ba phele,

litōpō tsa bona

li tla boela li tsoha.

Lōna ba phelang lerōleng,

tsohang le bine;

kahobane phōka ea hao

e tšoana le phōka ea hoseng,

fatše le tla boela

le tsosa bafu ba lona.

₂₀Ikeleng chaba sa ka,

le kene kamoreng tsa lōna,

ha le se le kene,

le ikoalle kahar'a tsona,

le ipate ho se hokae,

khalefo e b'e fele.

₂₁Bonang, Morena o tsoa

ka leahong la hae,

ho ahlōlela baahi ba lefatše

libe tsa bona.

Fatše le tla hlahisa mali

a tšolletsoeng holim'a lona,

ba bolaetsoeng ho lona

le ke ke la hlola le sa ba pata.