ESAEA 27

₁Ka tsatsi leo,

Morena o tla bolaea khanyapa,

a e bolaee ka sabole e bohale,

e kholo, e sefea,

khanyapa, nōha e chalametsang,

khanyapa, nōha e bōthang e ikharile,

ke eena ea tla bolaea

sebata sa leoatleng.

₂Ka tsatsi leo, ho tla thoe:

“Binelang rapa sa morara

se behang haholo.

₃Ke 'na Morena,

mohlokomeli oa sona,

ke se noesetsa ka linako tsohle,

ke se lebela motšeare le bosiu,

hore ho se be le ea mong

ea ka se senyang.

₄Ho halefa ha kea halefa.

Ha ho ne ho eme hlabahlabane,

ho eme le meutloa kapele ho 'na,

ke ne ke tla e futuhela ke e loantše,

ke e hatakele kaofela ha eona,

ke e chese.

₅Ho seng joalo, a ba ke ba tle ho 'na,

'na ke be setšabelo sa bona,

ba tle ho 'na ke etse khotso le bona.

E, ba tle ho 'na

ke etse khotso le bona.”

₆Ka matsatsi a tlang

Jakobo o tla hlōma,

Iseraele a thunye, a etse lipalesa,

fatše lohle le tlale tholoana tsa hae.

₇Na Morena o il'a otla Iseraele

joalokaha a il'a otla

ba ileng ba mo otla?

Na o bolailoe

joaloka ba ileng ba 'molaea?

₈U mo otlile

ka ho mo lelekela naheng esele,

ua mo fefola ka moea o matla,

joaloka mohla

moea oa bochabela o fokang.

₉Molato oa Jakobo

o tla hlakoloa tjena,

ena e be tsela

ea ho felisa sebe sa hae:

Ha a felisa

lialetare tsohle tsa majoe,

a li sila, a li etsa thuethue

sa phofo ea mokoetla,

melimo ea bohata,

le tšoantšo tsa Ashera,

li se li le sieo.

₁₀Motse o hahelelitsoeng

o fetohile lithako,

ke motse o siiloeng,

o furaletsoeng sa lehoatata,

ke moo manamane a fulang teng,

a be a bōthe, a itjelle makala.

₁₁Makala a motse oo

ha a omme a ee a rojoe,

basali ba a roalle,

ba bese mollo ka 'ona.

Chaba sena ke sa batho

ba hlokang kutloisiso,

kahoo 'Mōpi oa sona

a ke ke a se utloela bohlōkō,

'Mōpi oa sona

a ke ke be a se hauhela.